Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Ntirho Wo Aka eWallkill Ni Le Warwick Wu Ya Emahlweni

Ntirho Wo Aka eWallkill Ni Le Warwick Wu Ya Emahlweni

Mintirho yimbirhi leyikulu yo aka ya Timbhoni ta Yehovha eUnited States yi ya emahlweni hileswi vatirhi vo tirhandzela lava humaka etikweni hinkwaro va tirhaka hi matimba.

Wallkill eNew York: Emuakweni lowu ku tshama Timbhoni to tlula 1 600 naswona hi kona laha ku kandziyisiwaka minkandziyiso ya Timbhoni ta Yehovha eUnited States. Leswaku ku ndlandlamuxiwa mintirho leyi endliwaka eWallkill, vatirhi vo aka lava vo tala va vona ku nga vo tirhandzela, va le ku akeni ka muako lowuntshwa wa swithezi swinharhu lowu nga ta va tihofisi, ndhawu yo paka timovha ni muako wa swithezi swinharhu wo tshama eka wona. Hi 2012, vatirhi vo tirhandzela se a va hete ku aka muako wa switirhisiwa swa gezi ni swa tikhompyuta swin’we ni ku ndlandlamuxa holo yo dyela laha ku nga ta tshama vanhu lava engetelekeke va 200.

Timbhoni ta Yehovha ti ni miako yin’wana leyi vitaniwaka marhavi ematikweni yo tala ku katsa ni le Brazil, Jarimani ni le Mexico. EUnited States, miako ya Timbhoni ta Yehovha yi katsa ntsindza wa dyondzo ePatterson le New York swin’we ni tihofisi eBrooklyn le New York. Loko muako wa Wallkill wu heta ku ndlandlamuxiwa, hi wona lowu nga ta va lowukulu wa Timbhoni ta Yehovha emisaveni hinkwayo.

Warwick, eNew York: Muako lowu wu ta va ntsindza lowuntshwa wa misava hinkwayo wa Timbhoni ta Yehovha. Miako leyi a yi nga ri na nchumu endhawini yoleyo yi mbundzumuxiwile. Timbhoni ti kume ndhawu yin’wana leyi nga ekule hi tikhilomitara ta khume eTuxedo le New York, laha ti nga ta veka michini ni switirhisiwa swo aka. Valawuri va ndhawu yoleyo va ri sayinile papila ra hina leri hlamuselaka ndlela leyi hi nga ta swi sirhelela ha yona swilo leswi hanyaka endhawini yoloye hi nkarhi wo aka. Loko pulani ya muako yi pasisiwa, ku ta endliwa xikombelo xa mpfumelelo wo aka. Kambe sweswi, ntsindza wa Timboni ta Yehovha wu ta hambeta wu tirha wu ri eBrooklyn le New York.