Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Tiholo Ta Mfumo Ta 3000 Ti Akiwile eNigeria

Tiholo Ta Mfumo Ta 3000 Ti Akiwile eNigeria

Hi Mugqivela March 1, 2014, ntshungu wa vanhu lava tsakeke va 823 a wu hlengeletanile eHolweni ya Tinhlengeletano ya Timbhoni ta Yehovha le Dorobeni ra Benin, leswaku wu tlangela ntirho lowu fikeleriweke eNigeria. Ku sukela hi 1999, loko ku ta va ku endliwe lunghiselelo ro aka Tiholo ta Mfumo ematikweni lama nga evuswetini, Timbhoni ta Yehovha ti ake Tiholo ta Mfumo ta 3000 eNigeria.

Enhlengeletanweni leyi ku vulavuriwe hi matimu yo koma lama katsaka ntirho wo aka tiholo ta Timbhoni ta Yehovha leti a ti ta hlanganyela eka tona eNigeria ku sukela hi 1920. Eku sunguleni, a ti hlangana emakaya ni le tiholweni leti hirhiweke. Holo ya le dorobeni ra Ilesa, leyi akiweke kwalomu ka va-1935, hi yona yo sungula leyi Timbhoni ta Yehovha a ti khomela minhlangano eka yona. Exikarhi ka 1938 na 1990, nhlayo ya mavandlha yi andzile swinene yi andze hi kwalomu ka 200, ku suka eka 14 ku ya eka 2 681 naswona mavandlha yo tala a swi ma tikela ku kuma ndhawu yo hlangana eka yona. Mavandlha man’wana a ma tirhisa Holo ya Mfumo ma ri tsevu. Etindhawini tin’wana, vanhu lava a va va kona eminhlanganweni a va tele swinene lerova van’wana a va yima ehandle va yingisela nongonoko hi mafasitere. Ni sweswi, mavandlha yo tala ma hlangana emakaya ni le swikolweni.

Hi 1990, rhavi ra Timbhoni ta Yehovha ri sungule ku seketela ntirho wo aka tiholo hi ku lombisa mali leyi humaka eka Nkwama wo Aka Tiholo ta Mfumo. Hi 1997, Tikomiti to Aka ta Xifundzha se a ti pfune mavandlha ya 105 leswaku ma aka ni ku pfuxeta tiholo ta wona. Hi 1997 ku fikela hi 1999, ku akiwe tiholo ta 13 hi masiku ya nkombo ku ya eka 15.

Hambileswi ntirho wo aka a wu endliwa hi xihatla, a wu nga swi koti ku fambisana ni ku andza ka Timbhoni ta Yehovha eNigeria. Hi April 1998, rhavi ri ringanyete leswaku ku nga ha laveka Tiholo ta Mfumo ta kwalomu ka 1 114 eNigeria.

Loko Don Trost xirho xa Komiti ya Rhavi, a ri karhi a vulavula ni vayingiseri enhlengeletanweni leyi yo hlawuleka edorobeni ra Benin, u te: “Lowu a ku nga ri ntirho wo olova! A hi tivutisa leswaku, ‘Xana hi ta kala hi wu heta?’” Ku sukela hi 1999, xivutiso xexo xi hlamuriwile loko Mintlawa yo Aka Tiholo ta Mfumo leyi vumbiwaka hi swirho swa tsevu ku ya eka nhungu swi sungule ku pfuneta mavandlha etikweni hinkwaro. Hi xiringaniso, emalembeni ya 14 lama hundzeke, mintlawa leyi yi kote ku aka tiholo ta 17 n’hweti ni n’hweti hi ku tirhisa tipulani to olova.

Endzhaku ko bumabumela vayingiseri hileswi va koteke ku swi fikelela, Makwerhu Trost u vule leswaku ka ha ri ni ntirho wo tala lowu faneleke ku endliwa. Hi 2013, avhareji ya Timbhoni ta Yehovha eNigeria yi tlakuke hi nhlayo yo tlula 8 000. U tlhele a ku: “Lembe ni lembe ku fanele ku akiwa Tiholo Ta Mfumo ta 100 tanihi leswi nhlayo ya vamakwerhu yi andzaka.” Hi 2013, a ku ri ni vamakwerhu vo ringana 351 000 emavandlheni yo tlula 5 700 eNigeria.

DYONDZA SWO TALA

Ha Yini Ku Akiwa Tiholo Ta Mfumo Ta Timbhoni Ta Yehovha Naswona Ti Akiwa Njhani?

Ha yini miako ya hina ya vugandzeri yi vitaniwa Tiholo ta Mfumo? Kuma leswi engetelekeke malunghana ni ndlela leyi miako leyi, leyi nga durhiki yi ma pfunaka ha yona mavandlha ya hina.

Ha Yini Timbhoni Ta Yehovha Ti Nga Wu Vitani Kereke Muako Wa Tona Wa Vugandzeri?

Kuma leswaku vito leri nge “Holo ya Mfumo ya Timbhoni ta Yehovha” ri huma kwihi naswona ha yini hi ri tirhisa.