Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Holo Leyintshwa Ya Tinhlengeletano eKhwatini Ra Amazon

Holo Leyintshwa Ya Tinhlengeletano eKhwatini Ra Amazon

Exikarhi ka khwati ra Amazon ku akiwe Holo yo saseka leyintshwa ya Tinhlengeletano ya Timbhoni ta Yehovha. Holo leyi yi akiwe en’walungu wa doroba ra Manaus, eBrazil, laha ndhawu leyi akiweke eka yona yi nga kwalomu ka tihektara ta 52 naswona yi rhendzeriwe hi mirhi yo hambanahambana leyi swinyenyana swa mihlovohlovo swi baka huwa eka yona. Ha yini ku akiwe Holo ya Tinhlengeletano endhawini leyi?

Doroba ra Manaus ri na vaaki va kwalomu ka timiliyoni timbirhi naswona laha ri nga kona i tikhilomitara ta kwalomu ka 1 450 ku suka laha Nambu wa Amazon wu sungulaka kona. Holo leyi yi kota ku amukela Timbhoni ta kwalomu ka 7 000 leti humaka eManaus ni le madorobeni lama nga ekusuhi, ku katsa ni leti tshamaka ekusuhi ni Nambu wa Amazon. Timbhoni tin’wana ti tshama edorobeni leri nga ekule, ra São Gabriel da Cachoeira, leri ku nga mpfhuka lowu tlulaka tikhilomitara ta 800 ku suka evupela-dyambu bya Manaus. Tin’wana loko ti ya etinhlengeletanweni eka Holo leyi, ti famba masiku manharhu hi xikepe!

Ku akiwa ka Holo leyi exikarhi ka xifundzha xa Amazon a ku nga ri matlangwana. A swi katsa ku rhumela tikhotheni ta kwalomu ka 13 leti a ti ri na nhundzu yo aka ha yona ku suka ehlalukweni ra Santos, eSão Paulo, eribuweni ra Brazil kutani ti yisiwa eNambyeni wa Amazon leswaku ti ta yisiwa laha ku akiwaka kona.

Holo leyi leyintshwa ya Tinhlengeletano, leyi ku nga ya vu-27 eka leti nga akiwa eBrazil, yi nyiketeriwe hi Sonto, May 4, 2014, laha a ku ri ni vanhu va 1 956. Vo tala a va nga ha ti koti hi ntsako hikuva a ku ri ro sungula va khomela minhlangano eHolweni ya Tinhlengeletano.

Lava a va ri kona a va kota ku twa ni ku vona xivulavuri. Loku a ku ri ku cinca lokukulu hikuva khale loko va khoma tinhlengeletano ni mintsombano etiholweni leti nga riki ta Timbhoni, vo tala a va nga swi koti ku vona lava a va ri exitejini. Mbhoni yin’wana yi te: “I khale ndzi ya emintsombanweni kambe a ndzi nga koti ku vona tidrama ta Bibele, a ndzo ti yingisela kunene.” Sweswi hinkwavo va kota ku vona leswi endlekaka exitejini.

DYONDZA SWO TALA

Ha Yini Timbhoni ta Yehovha Ti Ya eTinhlengeletanweni Letikulu?

Lembe ni lembe, hi va ni tinhlengeletano tinharhu to hlawuleka. U nga vuyeriwa njhani eka tinhlengeletano leti?

Ha Yini Ku Akiwa Tiholo Ta Mfumo Ta Timbhoni Ta Yehovha Naswona Ti Akiwa Njhani?

Ha yini miako ya hina ya vugandzeri yi vitaniwa Tiholo ta Mfumo? Kuma leswi engetelekeke malunghana ni ndlela leyi miako leyi, leyi nga durhiki yi ma pfunaka ha yona mavandlha ya hina.