Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Xihondzo xo Rindza Xa Xigreenland Xi Bumabumeriwa Eka TV

Xihondzo xo Rindza Xa Xigreenland Xi Bumabumeriwa Eka TV

Hi January 2013, magazini wa Xihondzo xo Rindza wa Xigreenland wu hlanganise malembe ya 40 wu ri karhi wu kandziyisiwa. Xigreenland i ririmi ra Vainuit leri vulavuriwaka hi vanhu va 57 000.

Ku ni Timbhoni ta Yehovha ta kwalomu ka 150 eGreenland kambe Xihondzo xo Rindza xa Xigreeland xi ni vahlayi va 2 300. Leswi swi vula leswaku vahlayi vo tala va Napasuliaq Alapernaarsuiffik, ku nga Xihondzo xo Rindza hi Xigreenland a hi Timbhoni.

Eka mbulavurisano wa le ka thelevhixini, mulanguteri wa hofisi ya vuhundzuluxeri le dorobeni ra Nuuk, u hlamusele a ku: “Vanhu vo tala va le Greenland va yi tsakela swinene Bibele, hi yona mhaka leyi va hlayaka Napasuliaq Alapernaarsuiffik.”

Loko muhaxi a vutisa muhundzuluxeri un’wana wa xisati la vulavulaka ririmi ra Xigreenland malunghana ni leswi a swi tsakeleke hi magazini lowu, u hlamule a ku: “Ndzi vuyeriwe swinene hi ku hlaya magazini lowu. Hi xikombiso, wu ndzi dyondzise ndlela yo hanya vutomi lebyinene ni ku va ni rihanyo lerinene. A ndzi dzaha swinene hambileswi a ndzi swi tiva leswaku swi ta ndzi vabyisa. Kambe Bibele yi hi byela leswaku loko hi lava ku hanya vutomi lebyinene hi fanele hi hlayisa miri ya hina yi tshama yi basile.”

Muhaxi u tlhele a vula leswaku Timbhoni ta Yehovha i khale ti ri kona eGreenland ku sukela exikarhi ka va-1950 naswona a ti kandziyisa tibuku ni tibroxara hi Xigreenland. Ntirho wo hundzuluxela wu endliwa hi vatirhi va ku tirhandzela, va Xidachi ni va Xigreenland naswona pakani ya vona minkarhi hinkwayo i ku endla leswaku vuhundzuluxeri bya Xigreenland byi twisiseka hi ku olova.

Wanuna un’wana loyi ku nga khale a ri Mbhoni le Greenland u te: “Se ndzi ni malembe ya 25 ndzi ri karhi ndzi chumayela vanhu lava vulavulaka Xigreenland naswona ndzi vone nkoka wo va ni minkandziyiso ya ririmi ra vona. Eka tindhawu tin’wana ta le kule swinene leti ku yiwaka eka tona hi xikepe tin’hweti ti nga ri tingani hi lembe, ku ni vanhu lava rhandzaka ku hlaya timagazini ta hina naswona leswi hi nga taliki ku va endzela, nkarhi ni nkarhi hi va rhumela mapapila ni minkandziyiso.”

Ku sukela hi January 2013, Xihondzo xo Rindza xa Xigreenland xi sungule ku kandziyisiwa n’hweti na n’hweti tanihi nkandziyiso wa vanhu hinkwavo ni lowu dyondziwaka evandlheni. Minkandziyiso leyi yi nga hlayiwa ni ku kopiwa eka jw.org/ts ehansi ka xiyenge “Minkandziyiso” ivi u hlawula ririmi leri nge Greenlandic kutani u tlika “Secha.”