Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Ntirho Wa Vuhundzuluxeri eMexico Ni Le Amerika Xikarhi

Ntirho Wa Vuhundzuluxeri eMexico Ni Le Amerika Xikarhi

Le Mexico ni Ie Amerika Xikarhi, ku ni vahundzuluxeri va kwalomu ka 290 lava humaka ematikweni ya tsevu, lava hundzuluxelaka minkandziyiso leyi sekeriweke eBibeleni hi tindzimi to tlula 60. Ha yini va endla matshalatshala lawa? Hikuva loko vanhu va kuma minkandziyiso leyi sekeriweke eBibeleni hi ririmi leri va ri twisisaka, rungula rolero ri va khumba timbilu.—1 Vakorinto 14:9.

Leswaku vuhundzuluxeri byi va lebyi twisisekaka kahle, vahundzuluxeri van’wana lava a va tirha erhavini ra Timbhoni ta Yehovha ra le Dorobeni ra Mexico va rhurhiseriwe eka tihofisi ta vuhundzuluxeri etindhawini leti ku vulavuriwaka tindzimi ta vona. Xana vuyelo byi ve byihi? Vahundzuluxeri va heta nkarhi wo tala va ri ni vanhu lava vulavulaka tindzimi leti va ti hundzuluxelaka, leswi endlaka leswaku va kota ku hundzuluxela rungula leri twisisekaka kahle.

Vahundzuluxeri va titwa njhani hi ku cinca loku? Federico, muhundzuluxeri wa ririmi ra Xiguerrero Nahuatl, u te: “Eka malembe ya kwalomu ka khume lawa ndzi ma heteke ndzi ri eDorobeni ra Mexico, a ndzi tiva ndyangu wun’we lowu vulavulaka ririmi ra mina. Kambe sweswi, emadorobeni lama nga ekusuhi ni hofisi ya vuhundzuluxeri, vanhu vo tala va vulavula rona!”

Karin, loyi a hundzuluxelaka ririmi leri humaka eka Xijarimani ehofisini ya vuhundzuluxeri exifundzheni xa Chihuahua, le Mexico, u te: “Ku hanya ni Ma-mennonite swi ndzi pfunile ku va ndzi tirhisa ririmi ra manguva lawa. Hi tshama hi tlhela hi tirha edorobeni leritsongo naswona loko ndzi languta ehandle hi fasitere, ndzi kota ku vona vanhu lava nga ta vuyeriwa hi ntirho lowu hi wu endlaka.”

Neyfi, loyi sweswi a tshamaka ehofisini ya vuhundzuluxeri eMérida, le Mexico, u te: “Loko hi fambisa tidyondzo ta Bibele hi Ximaya, hi kota ku xiya swiga leswi Vamaya va nga swi twisisiki. Kutani hi lava ndlela leyinene leyi hi nga swi hundzuluxelaka ha yona leswaku swi twisiseka kahle.”

Lava hlayaka rungula leri hundzuluxeriweke va vuyeriwa njhani? Xiya xikombiso lexi: Ku ringana malembe ya kwalomu ka 40, Elena loyi a vulavulaka Xitlapanec, a a va kona nkarhi na nkarhi eminhlanganweni ya Timbhoni ta Yehovha. Kambe leswi minhlangano ya kona a yi khomiwa hi Xipaniya, a a nga xi twisisi kahle. U te: “Leswi a ndzi swi tiva hileswaku a ndzi fanele ndzi va kona eminhlanganweni.” Hambiswiritano, endzhaku ka loko Elena a dyondze Bibele hi ku pfuniwa hi tibroxara leti a ti ri hi Xitlapanec, ku rhandza ka yena Xikwembu ku kurile ku fika laha hi 2013 a nga tinyiketela hi ku khuvuriwa. Elena u ri: “Ndzi nkhensa Yehovha hileswi a ndzi pfuneke ku twisisa Bibele.”

DYONDZA SWO TALA

Ndlela Leyi Minkandziyiso Ya Hina Yi Tsariwaka Yi Tlhela Yi Hundzuluxeriwa Ha Yona?

Hi kandziyisa minkandziyiso hi tindzimi to tlula 700. Ha yini hi endla matshalatshala lawa hinkwawo?