Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Tivhidyo Leti Tsakisaka Timbilu

Tivhidyo Leti Tsakisaka Timbilu

“A swi tikomba onge Yehovha a a ri eku yingiseleni ka timbilu ta vatswari.” Yoleyo i ndlela leyi tatana un’wana wa le Malaysia a yi hlamuseleke ha yona vhidiyo ya tipopayi leyi tlhandlamanaka leyi nge Vana Munghana Wa Yehovha.

Ku sukela loko ku humesiwe swiyenge swo sungula, Timbhoni ta Yehovha ti endle tivhidyo ta tipopayi leti tlhandlamanaka leti vulavulaka hi Kalebe ni ndyangu wa ka vona. Tivhidiyo teto leti sweswi ti kumekaka eka website ya jw.org, ti dyondzisa vana tidyondzo ta nkoka ta mahanyelo ni ta moya, to tanihi hi leyi nge ha yini va nga fanelanga va yiva ni ndlela leyi va nga khongelaka ha yona eka Xikwembu.

Vhidiyo yo sungula eka nxaxamelo lowu ana se yi hundzuluxeriwe hi tindzimi ta 131 naswona yi pfuna vana emisaveni hinkwayo.

Marito Yo Tsakisaka Lama Vuriweke Ha Yona

Manana la nga ni vana va ntlhanu u tsale a ku: “Ku sukela loko hi kume DVD leyi nge Yingisa, Kutani U Katekisiwa vhiki leri nga hundza, hi yi hlalela minkarhi ya kwalomu ka 50.”

Millie, xinhwanyetana xa malembe ya 12 xa le Nghilandhi, xi ni makwavo wa mufana loyi a nga ni malembe ya 15 la vuriwaka Thomas, loyi a nga ni vuvabyi bya Down syndrome. Millie u tsale a ku: “Thomas u hoxe tivhidiyo ta Kalebe eka iPad yakwe leswaku a ti hlalerisa vanghana vakwe exikolweni. U rhandza tinsimu naswona u ti yimbelela kahle lerova ti rilisa sesi wakwe. Swa hlamarisa ku swi vona.”

Ava, loyi a vulaka leswaku u ni malembe ya 8 ni tin’hweti ta 9 swin’we ni masiku ya 25, u tsale a ku: “Kalebe ni sesi wakwe va swi kota kahle ku dyondzisa vana.”

Mikaylah u tsale a ku: “Ndzi ni malembe ya tsevu. Ndza nkhensa hikwalaho ka DVD leyi nge Yingisa, Kutani U Katekisiwa. Yi ndzi dyondzisa ku yingisa vatswari va mina hikuva sweswo swi tsakisa Yehovha.”

Yi Ni Tidyondzo Leti Vuyerisaka

Muntshwa un’wana la endlaka tivhidiyo ta tipopayi la nga riki Mbhoni ya Yehovha u hlalele vhidiyo leyi nge Ku Yiva Swi Bihile. Yi n’wi khumbe swinene ngopfu-ngopfu loko a twe leswaku yi endliwe hi ntlawa lowutsongo wa vaendli va tivhidiyo ta tipopayi. U te: “Ndzi tiva vanhu lava tirhelaka tikhampani letikulu ni letitsongo leti endlaka tivhidiyo leti naswona minkarhi yin’wana ndza tivutisa leswaku a swi ta va njhani ku tirhela tikhampani tp tano. Kambe eku heteleleni, ntirho ni matshalatshala ya vona hinkwawo ma endla ntirho lowu hlekisaka vanhu ku ringana tiawara to hlayanyana ntsena, swi helela kwalaho. Tivhidiyo ta n’wina ti cinca vutomi bya vana, ti va dyondzisa ku hambanisa leswinene eka leswo biha naswona ti va pfuna ku endla swiboho leswinene. Mi endla nchumu lowu nga ni xikongomelo, nchumu lowu pfunaka vanhu.”

Vatswari lava nga emisaveni hinkwayo va pfumelelana ni marito wolawo. Manana un’wana u tsale a ku: “Quinn, xifanyentana xa mina xa malembe manharhu, a xi ri eku hlaleleni ka vhidiyo leyi nge Gaining Jehovah’s Friendship. Exikarhi ka risimu, u ndzi langutile hiloko a khumba xifuva xakwe hi xivokwana xakwe a ku: ‘Mama, ku hlalela vhidiyo leyi swi tsakisa mbilu ya mina.’ ”