Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Tibibele Leti Humaka eJapani

Tibibele Leti Humaka eJapani

Leswaku ku fikeleriwa xilaveko xa Tibibele ta xifunengeto xo tsindziyela ni ta deluxe, Timbhoni ta Yehovha ti hoxe muchini lowuntshwa wo hlanganisa matluka ya tibuku eka vugandliselo bya tona aEbina le Japani.

Eku sunguleni Timbhoni a ti vilela hileswi ku tsekatseka ka misava ni tsunami leyi hlaseleke tiko ra Japani hi March 11, 2011, yi vangeke ku tsemiwa ka gezi minkarhi yin’wana.

Hambiswiritano, ntirho lowu wu ye emahlweni hi September 2011. Endzhaku ka nkarhi lowu nga ehansi ka tin’hweti tinharhu, ku endliwe Tibibele ta Vuhundzuluxeri Bya Misava Leyintswa ta Xichayina hi muchini lowuntshwa wo hlanganisa matluka ya tibuku.

Muchini lowu wa othomethiki wu lehe timitara ta kwalomu ka 400. Loko matluka ma ri karhi ma famba emuchinini, ma hlanganisiwa ma va buku, ma hoxiwa xifunengeto, ma tsemiwa, ma pakiwa, ma hoxiwa emabokisini, mabokisi ma lemiwa ivi ma veketeriwa eka tiphalete.

Ntirhisano Wu Tswala Mihandzu

Ntirhisano ni ku kunguhata swilo hi vukheta hi swona leswi endleke leswaku ntirho lowu wu famba kahle. Hi xikombiso, swiphemu swa muchini lowu swi boheke ku phutseriwa, swi nghenisiwa emabokisini lamakulu, swi layichiwa emabokisini lamakulu ya 34 ya tinsimbi ivi swi rhumeriwa hi xikepe swi suka eYuropa swi ya eJapani.

Swirho swa khume swa le rhavini ra United States ra Timbhoni ta Yehovha swi ye eJapani leswaku swi ya pfuneta entirhweni lowu. Swin’wana swi hete tin’hweti ta tsevu swi dyondzisa vatirhi va le Japani ndlela yo tirhisa ni ku khathalela muchini lowu.

Muchini lowuntshwa wo hlanganisa matluka ya tibuku wu koke rinoko ra tikhampani ta le Japani to hlanganisa tibuku, to gandlisa ni to endla tibuku. Hi March 19, 2012, vanhu lava tlulaka dzana lava humaka etikhampanini teto va valange rhavi ra le Japani. Va hlamarisiwe hi leswi va swi voneke.

Loko va nga si famba, un’wana ni un’wana wa vona u nyikiwe Bibele ya Vuhundzuluxeri Bya Misava Leyintswa leyi endliweke hi muchini lowuntshwa.

Rhavi ra Japani se ri tirhisana ni rhavi ra le United States ni ra le Brazil eka tsima ra misava hinkwayo ro gandlisela Timbhoni ta Yehovha Tibibele ta xifunengeto xo tsindziyela.

‘Ntirho Lowu Nga Ta Landzela Wu Ta Tika Swinene’

Timbhoni ni lava humaka etikhampanini tin’wana lava hoxeke xandla entirhweni lowu va tiphine hi ku tirha swin’we. Mutirhi un’wana loyi a nga riki Mbhoni u te: “N’wina mi fana ni swirho swa ndyangu eka mina.

Hi siku ro hetelela ra ntirho lowu, mutirhi un’wana loyi a nga riki Mbhoni u te: “Ntirho wun’wana lowu ndzi nga ta wu endla wu ta tika swinene hikuva a wu nge tsakisi ku fana ni lowu ndzi wu endleke laha ka Watchtower!

 

DYONDZA SWO TALA

Ntirho Wo Kandziyisa eMisaveni Hinkwayo Wu Pfuna Vanhu Va Dyondza Hi Xikwembu

Timbhoni ta Yehovha ti ni tindhawu to kandziyisela eka tona ta 15 emisaveni hinkwayo, laha ku kandziyisiwaka minkandziyiso leyi sekeriweke eBibeleni hi tindzimi ta kwalomu ka 700.