Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Ku Pfuna Vanhu Lava Nga Voniki eAfrika

Ku Pfuna Vanhu Lava Nga Voniki eAfrika

Ematikweni man’wana lama ha hluvukaka, vanhu lava nga voniki a va na wona malunghelo lama fanaka ni ya vanhu van’wana lava nga voniki va le matikweni man’wana. Minkarhi yin’wana vanhu van’wana a va na mhaka na vona naswona a va pfuniwi hi swiphiqo leswi va langutanaka na swona leswi vanhu lava vonaka va swi tekaka swi ri leswi tolovelekeke. Hi xikombiso, swi nga ha va tikela ku ya xava swakudya exitolo, ku khandziya bazi swin’we ni ku tirhisa mali. Swi nga tlhela swi va tikela ni ku hlaya. Van’wana va vona a va swi koti ku hlaya minkandziyiso ya Braille. Hambiloko va swi kota, swi nga ha va tikela ku kuma minkandziyiso hi ririmi ra vona.

Timbhoni ta Yehovha ti ni malembe yo tlula 100 ti ri karhi ti kandziyisa minkandziyiso leyi sekeriweke eBibeleni ya vanhu lava nga voniki. Leswaku minkandziyiso ya Braille yi kumeka hi Xichichewa, ku nga ririmi ra le Malawi, Timbhoni ta ha ku rhumela rhavi ra le Malawi michini leyi humaka eNetherlands yo gandlisa ni yo hlanganisa minkandziyiso.

Leo, loyi a nga ni ntokoto eku kandziyiseni ka minkandziyiso ya Braille, u suke erhavini ra Timbhoni ta Yehovha ra le Brazil a ya eMalawi. U letele vanhu va ntlhanu leswaku va kota ku tirhisa michini ni progreme ya khompyuta leyi endliweke hi Timbhoni leswaku yi hundzuluxela marito ma va hi xivumbeko xa Braille. Progreme leyi yi kota ku hundzuluxela rungula ri va hi Braille ya Xichichewa. Leswaku progreme leyi yi kota ku hundzuluxela, lava va yi tirhisaka va fanele va endla leswaku marito ya Xichichewa ma fambisana ni marito ya Braille ya Xichichewa. Kutani progreme yi nga hundzuluxela rungula ri va hi Braille yi tlhela yi cinca xivumbeko xa nkandziyiso leswaku vanhu lava nga voniki va kota ku wu hlaya hi ku olova. Twana leswi van’wana lava tshamaka eMalawi va swi vuleke hi minkandziyiso ya vona ya Braille.

Munyaradzi, i wansati la nga voniki loyi minkarhi yin’wana a haxaka nongonoko wa yena eka xiya-ni-moya. U tlhela a heta tiawara ta 70 n’hweti na n’hweti a ri karhi a dyondzisa van’wana Bibele. U te: “Khale a ndzi kuma minkandziyiso ya Braille hi Xinghezi kambe loko ndzi yi kume hi ririmi ra manana swi ndzi khumbe mbilu. Ndzi khensa matshalatshala ya Timbhoni-kulorhi yo hi pfuna leswaku hi kuma minkandziyiso ya Braille hi ririmi ra hina. Leswi swi kombisa leswaku a hi rivariwanga naswona hi tekiwa hi ri va nkoka.”

Francis, i Mbhoni leyi tshamaka en’walungu wa Malawi. Tanihi leswi a nga voniki, a a tshembele eka vanhu van’wana leswaku va n’wi hlayela. Loko a kuma minkandziyiso yakwe ro sungula ya Braille hi Xichichewa, u tivutisile: “Xana ndzo lorha? Leswi swa tsakisa!”

Loyce, a nga voni naswona i muchumayeri wa nkarhi hinkwawo. U pfune vanhu va 52 leswaku va va ni vutomi lebyinene. Njhani? U tirhisa minkandziyiso ya Braille ku dyondzisa vanhu lava vona va tirhisaka minkandziyiso leyi printiweke, leyi hinkwayo yi kandziyisiwaka hi Timbhoni ta Yehovha.

Loyce a ri karhi a fambisa dyondzo ya Bibele

Leo, muleteri wa le Brazil loyi ku vulavuriweke hi yena eku sunguleni, u te: “Swa ndzi tsakisa ku nyika vanhu minkandziyiso ya Braille leyi sekeriweke eBibeleni swin’we ni ku vona ndlela leyi va tsakeke ha yona loko va yi kuma hi ririmi ra vona. Vo tala va vona va kombise ku khensa eka Yehovha swin’we ni ntsako hileswi va kotaka ku lunghiselela minhlangano ya Vukreste ni ku chumayela hi yona. Sweswi va kota ku tihlayela ni ku va ni dyondzo ya vona vini. Va nga swi kota ku pfuna mindyangu ya vona leswaku yi kula hi tlhelo ra moya. Minkandziyiso leyi yi va pfuna leswaku va va vanghana va Yehovha.”

DYONDZA SWO TALA

Vito Ra Xikwembu Ri Twarisiwa Hi Xiswahili

Vona ndlela leyi vito ra Xikwembu, ku nga Yehovha ri veke kona eBibeleni ya Xiswahili.

Xana U Nga Swi Kota Ku Vona Xikwembu Lexi Nga Vonakiki?

Twana leswaku u nga ma tirhisa njhani ‘mahlo ya mbilu ya wena.’