Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Malembe Ya Dzana Ya Vuyimbeleri Lebyi Dzunisaka Xikwembu

Malembe Ya Dzana Ya Vuyimbeleri Lebyi Dzunisaka Xikwembu

“Ndzi lava leswaku u ya eColumbia Studios le New York City kutani u yimbelela rin’wana ra tinsimu ta hina. Va ta ri rhekhoda. U nga byeli munhu leswi u swi endlaka.”

William Mockridge

Eku heleni ka 1913, William Mockridge u endle ntirho lowu, lowu a wu nga tolovelekanga lowu a nyikiweke wona hi Charles Taze Russell. * Risimu rero, leri van’wana a va ri vitana “The Sweet By-and-By,” ri humesiwe eka rikoti ya 78-rpm. Endzhakunyana, William u twe leswaku risimu rero a ri ta chayiwa loko ku sungula ku tlanga “Photo-Drama of Creation,” ku nga vhidiyo ya tinkulumo ta Bibele leti rhekhodiweke ni vuyimbeleri lebyi a byi fambisana ni swifaniso leswi famba-fambaka swin’we ni leswi pendiweke eka tislayidi leti nga tinghilazi. Vhidiyo ya “Photo-Drama” yi sungule ku hlalerisiwa vanhu eNew York City hi January 1914.

Risimu ra William i rin’wana ta tinsimu to tlula 50 leti vatlangi va gramafoni a va ti tlanga etindhawini to hambana-hambana laha a va hlalerisa vanhu vhidiyo ya Xinghezi ya “Photo-Drama.” Hambileswi tinsimu to tala a ti qhambiwe hi van’wana, tin’wana to hlayanyana ku katsa ni leyi rhekhodiweke hi William, a ti endliwe hi Swichudeni swa Bibele naswona ti yimbeleriwe ku tirhisiwa marito lama nga ebukwini ya swona ya tinsimu leyi nge Hymns of the Millennial Dawn.

Ku Yingiserisisa Marito Ya Tinsimu

Ku ringana malembe yo tala, Timbhoni ti tirhise tinsimu eka vugandzeri bya tona leti tsariweke hi van’wana. Kambe loko swi boha a ti cinca marito leswaku ma fambisana ni ndlela leyi a ti ma twisisa ha yona Matsalwa.

Hi xikombiso, risimu rin’wana leri a ri tlangiwa eka vhidiyo ya “Photo-Drama” a yi ri ni nhloko-mhaka leyi nge “Our King Is Marching On,” leri a ri sekeriwe eka risimu leri nge “Battle Hymn of the Republic.” Ndzimana yo sungula ya risimu ra “Battle Hymn” a ri sungurisa xileswi: “Mahlo ya mina ma vone ku vangama ka ku ta ka Hosi.” Hambiswiritano, Swichudeni swa Bibele swi cince marito wolawo ma hlayekisa xileswi: “Mahlo ya mina ma nga vona ku vangama ka vukona bya Hosi.” Ku cinca loku a ku kombisa leswi a ti pfumelaka eka swona leswaku ku fuma ka Yesu Kreste a ku nga katsi ntsena ku ta ka yena kambe ni vukona byakwe ku ringana nkarhi wo karhi lowu vekiweke.Matewu 24:3.

Loko ku ta humesiwa buku ya tinsimu leyi nge Singing and Accompanying Yourselves With Music in Your Hearts hi 1966, ku endliwe matshalatshala yo susa tinsimu leti a swi tiviwa leswaku ti huma eka swihlovo swin’wana kumbe eka vukhongeri byin’wana. Hi lembe rero, Timbhoni ti hlele ntlawa lowutsongo wa okhestra kutani wu rhekhoda tinsimu hinkwato ta 119 leti nga ebukwini yoleyo. Mavandlha ma tirhise tinsimu teto leswaku ma fambisana na tona loko ma yimbelela eminhlanganweni ya wona naswona Timbhoni tin’wana a ti tsakela ku ti yingisela loko ti ri ekaya.

Hi 2009, Timbhoni ta Yehovha ti kandziyise buku ya tinsimu leyintshwa leyi nge Yimbelelelani Yehovha. Marito ya tona ma rhekhodiwe hi tindzimi to tala. Hi 2013 Timbhoni ti sungule ku kandziyisa tivhidiyo ta tona to sungula ta tinsimu ta vana. Rin’wana ra tinsimu ta vana ri ni nhloko-mhaka leyi nge Pray Anytime. Vanhu lava nghenaka eka website ya jw.org va kopa tinsimu minkarhi yo tlula miliyoni n’hweti yin’wana ni yin’wana.

Vanhu vo tala va ti tlangele swinene tinsimu leti. Wansati un’wana la vuriwaka Julie u tsale leswi malunghana ni buku ya tinsimu leyi nge Yimbelelelani Yehovha: “Tinsimu letintshwa ti saseke ngopfu! Loko ndzi ri ndzexe, ndzi tlanga leti phofulaka ndlela leyi ndzi titwaka ha yona. Hikwalaho, ndzi xiya leswaku vuxaka bya mina na Yehovha bya kula naswona se ndzi tiyimisele swinene ku n’wi endlela hinkwaswo leswi nga ematimbeni ya mina.”

Manana un’wana la vuriwaka Heather u tsale leswi malunghana ni ndlela leyi vhidiyo leyi nge Pray Anytime yi pfuneke n’wana wa yena wa malembe ya nkombo ni wa malembe ya nhungu: “Yi va pfune leswaku va khongela, ku nga loko ri loko siku ri sungula kumbe loko va ri na hina, kambe nkarhi wun’wana ni wun’wana loko va titwa va lava ku vulavula na Yehovha.”

^ ndzim. 3 Charles Taze Russell (1852–1916) u rhangele Swichudeni swa Bibele, hilaha Timbhoni ta Yehovha a ti vitaniwa hakona hi nkarhi wolowo.