Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Vuyimbeleri Bya Tindzimi To Tala

Vuyimbeleri Bya Tindzimi To Tala

Ku hundzuluxela risimu rin’we ra ririmi ro karhi ri ya eka rin’wana a hi matlangwana. Kambe ku hundzuluxela buku hinkwayo ya tinsimu leyi nga ni tinsimu ta 135 i ntirho lowu nonon’hwaka swinene.

Timbhoni ta Yehovha ti wu sungurile ntirho wolowo naswona ku nga si hela malembe manharhu se a ti hundzuluxele buku hinkwayo ya tona leyintshwa ya tinsimu leyi nge Yimbelelelani Yehovha hi tindzimi ta 116. Nakambe tindzimi tin’wana ta 55 ti hundzuluxele buku ya tinsimu leyi nga ni tinsimu ta 55 naswona tindzimi tin’wana to tala ti karhi ti hundzuluxela tinsimu ta tona.

Ku Hundzuluxela Ni Ku Tsala Tinsimu

Timbhoni ta Yehovha ana se ti hundzuluxela minkandziyiso ya Bibele hi tindzimi ta kwalomu ka 600 naswona ta kwalomu ka 400 ta kumeka eka Internet. Kambe ku hundzuluxela buku ya tinsimu a ku ri ntlhontlho lowu nga tolovelekangiki. Ha yini? Hikuva ndlela leyi tinsimu ti yimbeleriwaka ha yona ebukwini ya tinsimu leyi nge Yimbelelelani Yehovha yi fanele yi nga cinci hambileswi marito ya tona ma hundzuluxeriweke hi tindzimi to tala.

Ku tsala marito ya risimu a swi fani ni ku hundzuluxela rungula ra magazini. Hi xikombiso, loko vahundzuluxeri va hundzuluxela magazini wa Xihondzo Rindza wu ya eka ririmi rin’wana, va tikarhatela ku hlamusela vuxokoxoko hinkwabyo bya ririmi rero hi ndlela leyi pakanisaka. Kambe loko ku hundzuluxeriwa tinsimu ku tirhisiwa endlelo leri hambaneke.

Ndlela Leyi Tinsimu Ti Hundzuluxeriwaka Ha Yona

Vahundzuluxeri va tinsimu va tirhisa endlelo leri hambanekenyana loko va hundzuluxela rungula ra tinsimu hikuva marito ya tona ma fanele ma twisiseka, ma saseka naswona swi olova ku ma tsundzuka.

Mavekelo ya marito lama tirhisiwaka eka risimu ro dzunisa ma fanele ma olova leswaku xiyimbeleri xi kota ku twisisa nhlamuselo ni xikongomelo xa xiga ha xin’we hi ku hatlisa. Eka ririmi rin’wana ni rin’wana, marito ni vuyimbeleri swi fanele swi hlangana naswona swi khuluka kahle onge hiloko ma tsariwe hi ku kongoma hi xiyimbeleri.

Vahundzuluxeri va swi kotisa ku yini ku endla tano? Ematshan’weni yo va hundzuluxela marito ya tinsimu ta Xinghezi lama nga ebukwini ya tinsimu leyi nge Yimbelelelani Yehovha, va lerisiwe ku tsala marito lamantshwa ya tinsimu lama hlamuselaka mongo wa tinsimu ta Xinghezi. Va tirhisa swiga leswi tolovelekeke eka tindzimi ta vona leswi swi olovaka ku swi twisisa ni ku swi tsundzuka hi hala tlhelo va tikarhatela ku namarhela nhlamuselo ya Matsalwa leyi hlamuseriwaka eka risimu ha rin’we.

Goza ro sungula a ku ri ku hundzuluxela tinsimu ta Xinghezi rito hi rito. Endzhaku ka sweswo, Mbhoni leyi nga ni vutshila byo tsala tinsimu yi sungule ku hundzula marito ya tinsimu leti hundzuluxeriweke ma va marito lama tsakisaka ya tinsimu ni lama twalaka hi ririmi rin’wana. Kutani vahundzuluxeri swin’we ni lava hlayaka ku vona loko rungula ri hlayeka va kambisise ntirho lowu endliweke hi mutsari wa tinsimu va ri karhi va tikarhatela ku namarhela leswi Matsalwa ma swi vulaka.

Timbhoni ta Yehovha emisaveni hinkwayo ti tsake ni swikun’wana loko ti kuma buku ya tinsimu leyintshwa naswona yi languteriwe hi mahlo-ngati hi tindzimi tin’wana to tala.

 

DYONDZA SWO TALA

Ndlela Leyi Minkandziyiso Ya Hina Yi Tsariwaka Yi Tlhela Yi Hundzuluxeriwa Ha Yona?

Hi kandziyisa minkandziyiso hi tindzimi to tlula 700. Ha yini hi endla matshalatshala lawa hinkwawo?