Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Tivhidiyo Leti Hundzuluxeriwaka Hi Madzana Ya Tindzimi

Tivhidiyo Leti Hundzuluxeriwaka Hi Madzana Ya Tindzimi

Timbhoni ta Yehovha ti tiveka ngopfu hi ntirho wa tona wo hundzuluxela. Hi November 2014, se a hi hundzuluxele Bibele hi tindzimi ta 125 ni minkandziyiso leyi sekeriweke eBibeleni hi tindzimi ta 742. Ntirho wa hina wo hundzuluxela wu katsa ni tivhidiyo. Hi January 2015, vhidiyo leyi nge Ku Endliwa Yini eHolweni Ya Mfumo? a yi kumeka hi tindzimi ta 398 naswona leyi nge Ha Yini U Fanele U Dyondza Bibele? a yi kumeka hi tindzimi ta 569. Ha yini ntirho lowu wu endliwile naswona wu endliwe njhani?

Hi March 2014, Huvo leyi Fumaka ya Timbhoni ta Yehovha yi kombele marhavi emisaveni hinkwayo leswaku ma rhekhoda tivhidiyo hi tindzimi to tala leti nga ta pfuna eka ntirho wa tidyondzo ta Bibele.

Ku hundzuluxela vhidiyo swi katsa swilo swo hlayanyana. Xo sungula, ntlawa wa vahundzuluxeri wu hundzuluxela xikripi. Xa vumbirhi, ku hlawuriwa vanhu lava vulavulaka ririmi leri hundzuluxeriwaka leswaku va ta rhekhoda rito ra muntlangi un’wana ni un’wana la nga eka vhidiyo. Kutani ntlawa wa ku rhekhoda wu rhekhoda rungula rero, wu ri lulamisa ni ku hoxa marito lama humelelaka exikirinini. Xo hetelela, rungula leri rhekhodiweke, marito na vhidiyo swa hlanganisiwa swi va vhidiyo leyi heleleke leyi nga ta hoxiwa eka website.

Marhavi man’wana a ma ri ni tindhawu to rhekhodela eka tona ni vatirhi lava leteriweke ku endla ntirho lowu. Kambe, ku vuriwa yini hi tindzimi leti vulavuriwaka ni ku hundzuluxeriwa etindhawini ta le kule?

Emisaveni hinkwayo, lava va tirhaka ku rhekhoda va ye va ya rhekhoda hi ku tirhisa switirhisiwa leswi rhwalekaka. Hi ku tirhisa swikurisamarito, laptop na progreme yo rhekhoda ha yona, mutirhi wo rhekhoda u ta endla xikamarana xo rhekhodela eka xona xa nkarhinyana ehofisini, eHolweni ya Mfumo kumbe ekaya ra makwerhu. Vanhu lava vulavulaka ririmi rero va va vahlayi, valanguteri na vakamberi. Loko ntirho wo rhekhoda wu herile wu tlhela wu pasisiwa, mutirhi wo rhekhoda u phutsaphutsa switirhisiwa swa yena a hundzela endhawini yin’wana.

Hi ku tirhisa endlelo leri, ku kandziyisiwe tivhidiyo hi nhlayo leyi andzisiweke kanharhu ku tlula enkarhini lowu hundzeke.

Vanhu va ti tsakele swinene tivhidiyo leti. Eka vanhu vo tala, i ro sungula ku va va vona tivhidiyo hi ririmi ra vona.

Rin’wana ra tindzimi leti rhekhodiweke a ku ri Xipitjantjatjara, leri vulavuriwaka hi vanhu vo tlula 2 500 eAustralia. Ririmi leri ri rhekhodiwe eAlice Springs, le Xifundzheni xa le N’walungwini wa Australia. Callan Thomas, loyi a pfuneteke eka ku rhekhoda u te: “Vanhu va ti tsakele ngopfu tivhidiyo leti. Va ti hlalele va tsakile naswona a va vutisa leswaku va nga ti kuma kwihi tivhidiyo leti fanaka na tona. Minkandziyiso hi ririmi leri ya kala. Loko va yi yingisela kunene ni loko va yi vona swi va hlamarisa ngopfu.”

Timbhoni timbirhi ta le Cameroon a ti famba hi xikwekwetsu lexitsongo. Ti fike ti nghena emugangeni lowu ku tshamaka vanhu lava vuriwaka Pygmy, laha ti vulavuleke ni hosi tlhelo mudyondzisi exikolweni xa kwalaho. Loko ti xiye leswaku hosi yoleyo yi vulavula Xibassa, ti yi tlangele vhidiyo leyi nge Ha Yini U Fanele U Dyondza Bibele? hi ririmi ra yona eka tablet. Swi yi tsakise ngopfu hosi yoleyo kutani yi kombele minkandziyiso.

Emugangeni wun’wana le Indonesia, mufundhisi wa kwalaho a a venga Timbhoni ta Yehovha naswona u hise minkandziyiso hinkwayo leyi ti yi nyikeke vanhu va kwalaho. Vanhu van’wana emugangeni va xungete ku hisa Holo ya Mfumo. Endzhaku ka sweswo, maphorisa ya mune ma ye ekaya ka Mbhoni yin’wana ya xisati laha ma fikeke ma yi konanisa ku katsa ni ndyangu wa yona. A ma lava ku tiva leswi endliwaka eHolweni ya Mfumo, kutani yi ma kombe vhidiyo leyi nge Ku Endliwa Yini eHolweni Ya Mfumo? hi Xiindonesia.

Endzhaku ka loko ma hlalele vhidiyo, rin’wana ra maphorisa wolawo ri te: “Sweswi ndza swi vona leswaku vanhu va ni langutelo leri hoxeke hi n’wina, kahlekahle a va tivi nchumu hi n’wina.” Phorisa rin’wana ri te: “Ndzi kombela vhidiyo leyi leswaku ndzi ta yi komba van’wana. Vhidiyo leyi yi swi hlamusela kahle leswi mi swi endlaka.” Sweswi, maphorisa wolawo ma ni langutelo lerinene hi Timbhoni naswona ma ti sirhelela.

Loko u nga se ti vona tivhidiyo leti, ha yini u nga ti hlaleli hi ririmi ra wena?

DYONDZA SWO TALA

I Yini Dyondzo Ya Bibele?

Kuma tinhlamulo ta swivutiso malunghana ni nongonoko wa hina wa dyondzo ya mahala ya Bibele.

Ndlela Leyi Minkandziyiso Ya Hina Yi Tsariwaka Yi Tlhela Yi Hundzuluxeriwa Ha Yona?

Hi kandziyisa minkandziyiso hi tindzimi to tlula 700. Ha yini hi endla matshalatshala lawa hinkwawo?