Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Ku Kandziyisiwa Ka Tibibele Hi Ririmi Ra Vona

Ku Kandziyisiwa Ka Tibibele Hi Ririmi Ra Vona

Timbhoni ta Yehovha ti nyika munhu un’wana ni un’wana loyi a lavaka ku hlaya Bibele ya Vuhundzuluxeri Bya Misava Leyintshwa Bya Matsalwa Yo Kwetsima.

Hambileswi Tibibele ta ntsandza vahlayi ni vuhundzuluxeri byo tala swi kandziyisiweke hi minhlangano yo hambana-hambana leyi hundzuluxelaka ni ku kandziyisaka Tibibele, vusweti ni rivengo leri nga kona exikarhi ka vukhongeri swi sivela vanhu vo tala ku kuma Bibele hi ririmi ra vona. Timbhoni ta Yehovha ti kandziyisa Bibele ya Vuhundzuluxeri Bya Misava Leyintshwa hi tindzimi leti tlulaka 115.

Xiya swikombiso swin’wana:

  • Rwanda: Silvestre na Venantie lava nga ni vana va mune va ri: “Hi swisiwana, xisweswo a hi nge swi koti ku xavela xirho xin’wana ni xin’wana xa ndyangu Bibele. Kambe sweswi un’wana ni un’wana wa hina u ni Bibele ya yena ya Vuhundzuluxeri Bya Misava Leyintshwa hi Xikinyarwanda naswona hi yi hlaya swin’we siku ni siku.”

    Mufundhisi wa Mu-anglican wa kwalaho tikweni u te: “Bibele leyi ndza yi twisisa. Yi antswa ku tlula Tibibele hinkwato leti ndzi tshameke ndzi ti hlaya. Hakunene Timbhoni ta Yehovha ta khathala hi vanhu!”

  • Democratic Republic of the Congo: Tikereke tin’wana a ti pfumeli ku xavisela Timbhoni ta Yehovha Tibibele ta Xilingala, ku nga rin’wana ra tindzimi leti tolovelekeke ngopfu etikweni rero.

    Kutani a swi hlamarisi leswi ku sukela loko ku humesiwe Bibele ya Xilingala ya Vuhundzuluxeri Bya Misava Leyintshwa, Timbhoni ta le Congo ti yi tirhiseke hi ku hiseka ni ku tlhela ti yi fambisela vanhu van’wana. Entiyisweni, ku humesiwa ka Bibele ya Vuhundzuluxeri Bya Misava Leyintshwa entsombanweni wa Timbhoni ta Yehovha swi nyanyule vanhu swinene lerova maphorisa lawa a ma ri kona exitediyamu ma forile leswaku ma ya kuma tikopi ta wona.

  • Fiji: Tibibele ta Xifiji ta durha swinene lerova enkarhini lowu hundzeke Timbhoni ta Yehovha to tala a ti tirhisa Bibele ya Xinghezi ya Vuhundzuluxeri Bya Misava Leyintshwa. Hambiswiritano, hi 2009 vanhu va le Fiji va kume Vuhundzuluxeri Bya Misava Leyintshwa Bya Matsalwa Ya Vukreste Ya Xigriki (Testamente Leyintshwa) hi ririmi ra vona.

    Wanuna un’wana u hlamarisiwe swinene hi ndlela leyi Bibele ya Vuhundzuluxeri Bya Misava Leyintshwa ya Xifiji yi twisisekaka ha yona lerova u kale a yi kombela. Kambe Timbhoni ta kwalaho ti n’wi byele leswaku u fanele a rindza n’hweti emahlweni ko va ku rhumeriwa Tibibele tin’wana edorobeni leri a tshamaka eka rona. Leswi a a nga lavi ku rindza nkarhi wolowo leswaku a kuma Bibele ya yena, u ye eka Mbhoni yin’wana leyi a yi tshama endhawini leyi nga ekule hi tikhilomitara to tlula 35 leyi a yi ta kota ku n’wi nyika Bibele ya Vuhundzuluxeri Bya Misava Leyintshwa. Wanuna loyi u te: “Bibele leyi ya antswa swinene ku tlula leyi hi toloveleke ku yi tirhisa. Yi twisiseka hi ku olova.”

  • Malawi: Endzhaku ka loko Davide a sungule ku dyondza ni Timbhoni ta Yehovha, swirho swa kereke ya kwalaho ya Baptist swi ye ekaya ra yena swi ya teka Bibele leyi a swi n’wi nyike yona. Hikokwalaho, ku humesiwa ka Bibele ya Xichewaya ya Vuhundzuluxeri Bya Misava Leyintshwa swi hetisise ku navela ka yena.

    Leswi Tibibele ti durhaka swinene eMalawi, Davide u tivutisile loko a ta kala a kuma yin’wana. Kambe loko a nyikiwe Bibele ya Vuhundzuluxeri Bya Misava Leyintshwa u te: “Sweswi ndzi ni Bibele yo antswa ku tlula leyi a ndzi ri na yona!”

Emalembeni lama tlulaka 60 lama hundzeke, loko xiphemu xo sungula xa Bibele ya Vuhundzuluxeri Bya Misava Leyintshwa xi humesiwile hi Xinghezi entsombanweni le Dorobeni ra New York, vayingiseri va khuthaziwile: “Yi hlayeni hinkwayo. Yi dyondzeni . . . Yi nyikeni vanhu van’wana.” Leswaku ku endliwa tano, Timbhoni ta Yehovha ti kandziyise tikopi to tlula 175 wa timiliyoni ta Vuhundzuluxeri Bya Misava Leyintshwa. Ku tlula kwalaho, sweswi u nga kota ku hlaya Bibele leyi eka Internet hi tindzimi ta kwalomu ka 50.