Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Bibele Leyi Endliweke Yi Tiya

Bibele Leyi Endliweke Yi Tiya

Timbhoni ta Yehovha ti teka Bibele ku ri yona buku ya nkoka ku tlula hinkwato. Ti yi dyondza nkarhi ni nkarhi naswona ti tirhisa yona ku dyondzisa van’wana mahungu lamanene ya mfumo wa Xikwembu. (Matewu 24:14) Leswi vulaka leswaku ti tirhisa Tibibele ta tona nkarhi hinkwawo. Hikwalaho,Timbhoni ti endle matshalatshala leswaku Bibele ya Vuhundzuluxeri Bya Misava Leyintshwa Bya Matsalwa Yo Kwetsima leyi pfuxetiweke ya 2013, yi va leyi kokaka mahlo yi tlhela yi tiya.

Bibele leyintshwa a yi fanele ku endliwa yi tiya. Loko vayimeri va ndhawu yo kandziyisela eka yona va Timbhoni eWallkill, New York, le U.S.A. va burisane ni muungameri wa khampani yin’wana yo hlanganisa tibuku hi makungu ya vona u te, “Bibele leyi mi yi lavaka a yi kona.” A tlhela a ku, “Swi khomisa tingana ku vona Tibibele to tala leti kokaka mahlo kambe ti nga tiyanga.”

Tibibele tin’wana ta Vuhundzuluxeri Bya Misava Leyintshwa leti a ti kandziyisiwa enkarhini lowu hundzeke a ti nga tiyanga naswona minkarhi yin’wana loko ku hisa a ti kwamuka. Vakandziyisi va ringete ku kambisisa swifunengeto, swo namarheta hi swona ni swo hlanganisa swo hambana-hambana leswaku va endla Bibele yo tiya ehansi ka maxelo man’wana ni man’wana. Hi ku ya hi ndzavisiso wa vona, va endle Tibibele ti nga ri tingani kutani va ti rhumela Timbhoni ta le matikweni lawa ku hisaka swinene ni lawa ku titimelaka swinene leswaku va ti ringeta.

Endzhaku ka tin’hweti ta tsevu Tibibele leti ti tlherisiwile leswaku ti ya kamberiwa. Kutani vakandziyisi va antswise ndlela leyi va tiendlaka ha yona ivi va rhumela tin’wana leswaku ti ya ringetiwa. Tibibele hinkwato leti ringetiweke a ti ri 1 697. Exikarhi ka tona i nhlayo yitsongo ya leti onhakeke hi xihoxo. Hi xikombiso, yin’wana yi rivariwe ehandle nivusiku ku ri karhi ku na mpfula naswona yin’wana yi wele endzeni ka mati ya ndhambi leyi a yina na xidzedze. Sweswo hinkwaswo swi kombise leswaku ti tiye ku fikela kwihi.

Hi 2011, loko ta ha ringetiwa, Timbhoni ti xave michini leyintshwa ya rivilo lerikulu leyi hlanganisaka tibuku leswaku ti yi tirhisa etindhawini ta tona to kandziyisela eWallkill ni le Ebina, eJapani. Pakani ya kona a ku nga ri ku fikelela nhlayo leyikulu ntsena kambe ni leswaku ku kandziyisiwa Tibibele leti fanaka etindhawini letimbirhi.

Swifunengeto Swo Olova Swi Ni Swiphiqo

Eku sunguleni ka 2012, Timbhoni ti sungule ku endla Bibele ya Vuhundzuluxeri Bya Misava Leyintshwa hi Xinghezi leyi nga ni xifunengeto lexi nga ngheniki mati leyi humesiweke hi 1984 hi muvala wo tshwuka ni wa ntima etindhawini timbirhi ta tona to kandziyisela. Hambiswiritano, michini leyintshwa yi tirhise glu ni dzovo ku namarheta xifunengeto lexi a xi nga si ringetiwa naswona swifunengeto leswi yi swi endleke swi petsekile endzhaku ka loko swi hlanganisiwe ni matluka ya Bibele. Matshalatshala yo sungula yo lulamisa xiphiqo lexi ma tsandzekile kutani ntirho wo kandziyisa wu yimisiwile.

Vaendli va swin’wana swa swifunengeto leswi va xiye leswaku ku petseka ka swona i xiphiqo lexi tolovelekeke naswona a swi olovi ku xi lulamisa. Ematshan’weni yo va Timbhoni ti tirhisa xifunengeto xo tsindziyela, a ti tiyimisele ku endla Bibele leyi nga ni xifunengeto xo olova lexi a xi ta endla leswaku yi languteka kahle. Endzhaku ka tin’hweti ta mune ku ri karhi ku ringetiwa ti-glu ni madzovo yo hambana-hambana, ku hetelele ku kumiwe ndlela leyinene yo hlanganisa leyi a yi ta endla leswaku ku kandziyisiwa ka Tibibele leti nga ni swifunengeto swo olova leswi a swi nga ta kukumuka wu ya emahlweni.

Ntirho Wo Kandziyisa Wu Tlhela Wu Yimisiwa

Hi September 2012, ntirho wo kandziyisa Bibele leyi se a yi humesiwile wu tlhele wu yimisiwa leswaku ku fambisiwa Tibibele hinkwato kutani ku yimeriwa ku kandziyisiwa ka Bibele ya Vuhundzuluxeri Bya Misava Leyintshwa leyi pfuxetiweke. Ku kunguhuhatiwe leswaku yi humesiwa hi October 5, 2013, eka nhlangano wa lembe ni lembe wa Watch Tower Bible and Tract Society of Pennsylvania.

Tindzawulo to kandziyisa ti rhumeriwe rungula leri lavaka ku kandziyisiwa ra Bibele leyi pfuxetiweke leri rhumeriweke hi khompyuta hi ra Ravuntlhanu, August 9, 2013 kutani hi siku leri landzelaka ti sungule ku ri kandziyisa. Bibele leyi heleleke yo sungula ku kandziyisiwa yi hetiwe hi August 15. Eka mavhiki ya nkombo lama landzeleke, ndzawulo yo kandziyisa eWallkill ni le Ebina ti tirhe vusiku ni nhlikanhi leswaku ti kandziyisa ni ku rhumela Tibibele to tlula 1 600 000 leswaku vanhu hinkwavo lava va teke eka nhlangano wa lembe ni lembe va ti kuma.

Hambileswi Bibele leyi pfuxetiweke yi endliweke yi saseka yi tlhela yi tiya kambe yi tamele rungula leri ponisaka vutomi. Hi siku leri landzeleke, wansati un’wana wa le United States, loyi a kumeke Bibele leyintshwa, u te: “Hikwalaho ka leswi yi pfuxetiweke, ndzi kota ku yi twisisa kahle.”

DYONDZA SWO TALA

Vhidiyo: Ku Fikelela Xilaveko Xa Tibibele

Vona ndlela leyi ndzawulo yo kandziyisa ya le Japani yi pfunaka ya yona leswaku yi fikelela xilaveko xa Tibibele emisaveni hinkwayo.

Bibele—Yi Tamele Rungula Rihi?

Hi rihi rungula ra nkoka leri Bibele yi ri tameleke?