Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Ku Pompela Ngati—Leswi Madokodela Ma Swi Vulaka Sweswi

Ku Pompela Ngati—Leswi Madokodela Ma Swi Vulaka Sweswi

Ku ringana makume ya malembe, Timbhoni ta Yehovha a ti soriwa hikwalaho ko ala ku pomperiwa ngati. Ku ala koloko loku sekeriweke eka xileriso xa Bibele xa ku ‘papalata ngati,’ minkarhi yin’wana a ku lwisana ni leswi madokodela a ma ehleketa leswaku i ndlela leyinene yo tshungula vavabyi.Mintirho 15:29.

Hambiswiritano, yi ya yi andza nhlayo ya vativi lava nga ni ntokoto eka swa vutshunguri lava hlamuselaka swivangelo swo tirhisa matshungulelo lama nga laviki ku pompela ngati.

Nkandziyiso wa Spring 2013 wa Stanford Medicine Magazine, ku nga magazini wa Stanford University School of Medicine, a wu ri ni xiviko xo hlawuleka lexi vulavulaka hi ngati, lexi xiphemu xin’wana xa xona a xi ri ni nhloko-mhaka leyi nge “Ku Lwisana Ni Mukhuva Lowu Tolovelekeke—I Yini Leswi Endlaka Leswaku Ku Pompela Ngati Ku Hunguteka?” Mutsari wa xihloko xexo Sarah C. P. Williams u te: “Emalembeni ya khume lama hundzeke, ndzavisiso wo tala wu kombise leswaku eswibedlhele swo tala emisaveni hinkwayo, ngati leyi nyikeriwaka hi vanhu yi tirhisiwa ngopfu ni hi mpimo lowukulu ku tlula lowu lavekaka leswaku ku pfuniwa vavabyi—emakamareni ya vuhandzuri ni le tiwadini ta le swibedlhele.”

Mutsari u tshaha Patricia Ford, M.D., musunguri tlhelo mufambisi wa Center for Bloodless Medicine and Surgery at Pennsylvania Hospital. Dok. Ford u te: “Ku ni mhaka leyi dumeke ngopfu eka swa vutshunguri ya leswaku vanhu va ta fa loko va nga ri na mpimo wo karhi wa ngati emirini wa vona, ngati yoleyo hi yona leyi ponisaka vutomi . . . Mhaka yoleyo i ntiyiso eswiyin’weni swin’wana, * kambe eka vavabyi vo tala ni le swiyin’weni swo tala mhaka yoleyo a hi ntiyiso.”

Dok. Ford, loyi a tshungulaka Timbhoni ta Yehovha ta kwalomu ka 700 lembe ni lembe, u tlhele a ku: “Madokodela yo tala lawa ndzi vulavulaka na wona . . . a ma ri ni langutelo leri hoxeke ra leswaku vavabyi vo tala a va nge hanyi nikatsongo loko va nga pomperiwi ngati . . . Na mina ndzi nga ha va ndzi ehlekete hi ndlela yoleyo. Kambe hi ku hatlisa ndzi dyondze leswaku u nga tshungula vavabyi lava hi ku tirhisa matshungulelo man’wana yo olova.”

Hi August 2012, magazini wa Archives of Internal Medicine wu kandziyise mimbuyelo ya nkambisiso wa vavabyi lava endliweke vuhandzuri bya mbilu exibedlhele xin’wana lowu tekeke malembe ya 28. Timbhoni ta Yehovha ti hatle ti hlakarhela ku tlula vavabyi lava pomperiweke ngati. Timbhoni a ti vanga ni swiphiqo swo tala loko ta ha ri exibedlhele, swi hatle swi vonaka leswaku ti ta pona eka vuhandzuri byebyo naswona ti hanye malembe ya 20 loko ti piminisiwa ni vavabyi lava pomperiweke ngati.

Xihloko xin’wana lexi kandziyisiweke hi April 8, 2013 eka magazini wa The Wall Street Journal xi te: “Vuhandzuri lebyi nga laviki mpompelo wa ngati se i khale byi endliwa eka vavabyi lava alaka ku pomperiwa ngati hikwalaho ka swivangelo swa vukhongeri. Sweswi swibedlhele swi sungula ku tirhisa matshungulelo lawa hi xitalo . . . Madokodela ya vuhandzuri lama khutazaka vuhandzuri lebyi nga laviki mpompelo wa ngati ma vula leswaku matshungulelo lawa ma hunguta swikoxo swo xava ngati, swo yi veka, swo yi tirha, swo yi kambela ni ku yi pompela. Nakambe ma tlhela ma hunguta makhombo yo khomiwa hi switsongwatsongwana leswi kumiwaka hi ku pomperiwa ngati ni swiphiqo leswi endlaka leswaku vavabyi va tshama nkarhi wo leha exibedlhele.”

A swi hlamarisi leswi Robert Lorenz, murhangeri wa ku tirhisiwa ka ngati eCleveland Clinic, a vuleke marito lawa: “U tibyela leswaku u le ku pfuneni ka muvabyi loko u n’wi pompela ngati . . . Kambe hi ku famba ka nkarhi vuyelo byi kombisa leswaku a wu nga ri eku n’wi pfuneni.”

^ ndzim. 5 Leswaku u dyondza hi langutelo ra Timbhoni ta Yehovha malunghana ni ngati, hlaya xihloko lexi nge “Swivutiso Leswi Talaka Ku Vutisiwa—Ha Yini Mi Nga Pfumeli Ku Pomperiwa Ngati?

DYONDZA SWO TALA

I Yini Leswi Bibele Yi Swi Vulaka Malunghana Ni Ku Pomperiwa Ngati?

Bibele yi vula leswaku Xikwembu xi hi nyike nawu wa leswaku hi ‘papalata ngati.’ Wu tirha njhani namuntlha?