Nghena endzeni

VANTSHWA VA VUTISA

Ndzi Nga Endla Yini Leswaku Vatswari Va Mina Va Ndzi Tshemba?

Ndzi Nga Endla Yini Leswaku Vatswari Va Mina Va Ndzi Tshemba?

 Leswi u faneleke u swi tiva

Loko u tshembeka swi ta endla leswaku va ku tshemba swinene.

Ku yingisa milawu ya vatswari swi fana ni ku hakela xikweleti. U kolota vatswari va wena ku va yingisa naswona loko u ‘hakela,’ va ta ya va ku tshemba. Hilaha ku fanaka loko u nga tshembeki vatswari va wena a va nge ku ‘tshembi.’

Swi teka nkarhi leswaku va ku tshemba. U fanele u sungula u kombisa leswaku se u ni vutihlamuleri va nga se ku nyika ntshunxeko lowu engetelekeke.

 MHAKA YA XIVIRI: “Tanihi muntshwa, a ndzi swi tiva kahle leswi vatswari va mina va swi languteleke eka mina, a ndzi endla onge ndza swi yingisa leswi vatswari va mina va swi vulaka kambe loko ndzi ri ndzexe a ndzi tiendlela swa mina. Sweswo swi endle leswaku vatswari va mina va nga ha ndzi tshembi. Kambe endzhaku ka nkarhi ndzi swi xiyile leswaku a swi nge ndzi yisi helo: Loko u nga tshembeki va swi vona naswona va ta ya va nga ku tshembi. U fanele u tshembeka leswaku va ta ku tshemba.”​—Craig.

Leswi u nga swi endlaka

Vulavula ntiyiso​—hambiloko swi vava. Hinkwerhu ha swi endla swihoxo kambe ku tiyimelela loko u endle xihoxo swi ta endla leswaku vatswari va wena va nga ha ku tshembi. Loko u tshembeka swi suka embilwini, vatswari va wena va ta swi xiya leswaku se u ni vutihlamuleri naswona wa swi kota ku yimela timhaka ta wena. Swa olova ku tshemba munhu wo tano.

“Loko u endla swihoxo a swi vuli leswaku u nge he tshembiwi kambe loko u tiyimelela a wu nge tshembiwi.”​—Anna.

Bibele yi ri: ‘Hi navela ku tikhoma hi ku tshembeka eka swilo hinkwaswo.’ —Vaheveru 13:18.

  • Tivutise: Loko vatswari va wena va ku vutisa leswaku u ya kwihi u ya endla yini xana u va byela ntiyiso? Kumbe loko va ku vutisa leswaku u huma kwihi a mi endla yini a wu va byeli hinkwaswo?

Vana ni vutihlamuleri. Yingisela milawu hinkwayo. Endla mitirho ya siku ni siku handle ko ba mariri. Fika hi nkarhi lowu mi twananeke ha wona. Endla mitirho ya xikolo hi nkarhi. U nga hundzi nkarhi lowu u nga te u ta vuya hi wona.

“Loko vatswari va ku pfumelela leswaku u ya hungasa ivi va ku byela leswaku u vuya hi 9:00 ni madyambu ivi u vuya hi 10:30 nkarhi lowu taka a va nge he ku pfumeleli leswaku u ya hungusa!”​—Ryan.

Bibele yi ri: “un’wana ni un’wana u ta rhwala ndzhwalo wakwe.”​—Vagalatiya 6:5.

  • Tivutise: Xana wa loloha loko u endla mitirho ya le kaya kumbe swa ku tikela ku yingisa milawu yo karhi hikwalaho ka leswi u nga yi rhandziki?

Lehisa mbilu. Loko u endle leswi nga ta endla leswaku va nga ku tshembi swi ta teka nkarhi leswaku va tlhela va ku tshemba. Lehisa mbilu.

“A ndzi pfilunganyekile loko ndzi ri karhi ndzi kula kambe va nga ndzi nyiki ntshunxeko lowu engetelekeke. Ndzi xiye leswaku ku kula a swi kombisi leswaku se u ni vutihlamuleri. Ndzi byele vatswari leswaku va ndzi nyika nkarhi wo kombisa leswaku ndza tshembeka. Swi teke nkarhi kambe swi ndzi pfunile. Ndzi xiye leswaku malembe a ma vuli leswaku va ta ku tshemba kambe swiendlo hi swona swi nga ta endla va ku tshemba.”​—Rachel.

Bibele yi ri: “Tshamani mi tikombisa leswi n’wina mi nga swona.”​—2 Vakorinto 13:5.

  • Tivutise: I yini leswi u faneleke u swi endla leswaku vatswari va wena va ta ku tshemba’?

 Xiringanyeto: Tivekele pakani, ku nga hava yo hlayisa nkarhi, yo hetisisa vutihlamuleri bya wena eka mitirho leyi u nyikiweke yona, ku khoma nkarhi kumbe swin’wana. Byela vatswari va wena swiboho swa wena naswona va vutise leswi u nga swi endlaka leswaku va ku tshemba. Tikarhatele ku yingisa xitsundzuxo lexi nga eBibeleni lexi nge: “Cukumeta vumunhu bya khale lebyi fambisanaka ni ndlela ya n’wina yo sungula ya ku tikhoma.” (Vaefesa 4:22) Hi ku famba ka nkarhi vatswari va wena va ta swi vona leswaku u endla nhluvuko.