Nghena endzeni

VANTSHWA VA VUTISA

Ndzi Nga Langutana Njhani Ni Ntshikilelo Wa Mianakanyo?

Ndzi Nga Langutana Njhani Ni Ntshikilelo Wa Mianakanyo?

 I yini leswi u nga swi endlaka?

Anakanya hi xiyimo lexi landzelaka:

A ka ha ri na nchumu lowu tsakisaka Jennifer. Siku ni siku u rila hi ndlela leyi nga lawulekiki ku nga ri na xivangelo lexi twalaka. A nga lavi ku tshama na vanhu naswona a nga swi rhandzi swakudya. Swa n’wi tikela ku etlela kumbe ku yingiserisisa. Jennifer wa tivutisa: ‘Ku humelela yini hi mina? Xana ndzi ta tlhelela exiyin’weni xa mina xa khale?’

Mark a a ri xichudeni lexi nga xikombiso lexinene. Kambe sweswi wa xi venga xikolo naswona a nga ha pasi. Mark a nga ha yi rhandzi mintlangu . Vanghana vakwe va pfilunganyekile. Vatswari va yena va vilela. Xana swo va swa xinkarhana​—kumbe swi to ya swi nyanya?

Xana minkarhi yo tala u titwa ku fana na Jennifer kumbe Mark? Loko swi ri tano, i yini leswi u nga swi endlaka? U nga ha ringeta tindlela leti hatimbirhi:

  1. Ringeta ku langutana ni xiyimo xexo hi wexe

  2. Vulavula ni munhu lonkulu loyi u n’wi tshembaka

Xiringanyeto A ku nga ha va ndzingo, ngopfungopfu loko u titwa u nga lavi ku vulavula. Kambe xana swi ta va swinene ku miyela? Bibele yi ri: “Vambirhi va antswa ku tlula un’we . . . Hikuva loko un’we wa vona o wa, loyi un’wana a nga pfuxa munghana wakwe. Kambe ku ta endleka yini hi loyi a nga un’we loko o wa ku nga ri na loyi a nga ta n’wi pfuxa?”​—Eklesiasta 4:​9, 10.

Hi xikombiso: A hi nge u lahlekile endhawini leyi nga ni vugevenga swinene. I vusiku naswona vanhu lava u nga va tiviki va rindze matlhelo hinkwawo. I yini leswi a wu ta swi endla? U nga ha ringeta ku kuma ndlela yo pona. Kambe xana a ku nga ta va vutlhari ku kombela mpfuno eka munhu loyi u n’wi tshembaka?

Ku titwa u tshikilelekile emianakanyweni swi nga fana ni ndhawu yoleyo leyi nga ni khombo. I ntiyiso leswaku u nga ha tshamela ku va ni gome swa xinkarhana swi tlhela swi hundza. Kambe loko u ya u tshikileleka nkarhi wo leha, swi nga antswa leswaku u kombela mpfuno.

NAWU WA BIBELE: “Loyi a tihambanisaka ni van’wana . . . u ta hambana ni vutlhari hinkwabyo lebyi pfunaka.”​—Swivuriso 18:1.

Leswi nga pfunaka eka xiringanyeto B​—ku vulavula ni mutswari kumbe munhu un’wana lonkulu loyi a tshembekaka​—hi swona leswi nga ku pfunaka leswaku u pfuneka hi ntokoto wa u’wana loyi a koteke ku hlula loko a langutane ni gome.

U nga ha ku: ‘Kambe vatswari va mina a va swi tivi leswaku swi njhani ku va eka xiyimo lexi ndzi nga eka xona!’ Xana wa tiyiseka hi sweswo? Hambi loko swiyimo leswi va langutaneke na swona va ha ri vantshwa swi hambanile ni swa wena, ndlela leyi va titweke ha yona yi nga ha fana ni leswi u titwisaka xiswona naswona va yi tiva ndlela yo swi hlula!

NAWU WA BIBELE: “Xana vutlhari a byi kona eka lava kuleke ni ku twisisa eka lava nga ni malembe yo tala?”​—Yobo 12:12.

Yinhla hi leswaku loko u tiphofula eka mutswari kumbe munhu un’wana lonkulu la tshembekaka, u ta kuma xitsundzuxo lexi nga ku pfunaka.

Ku va ni ntshikilelo wa mianakanyo swi fana ni ku lahleka endhawini leyi nga ni khombo. Leswaku u wu hlula, kombela mpfuno

 Ku vuriwa yini loko ku ri xiphiqo lexi lavaka vutshunguri?

Loko siku ni siku u titwa u tshikilelekile, u nga ha va u ri ni xiphiqo lexi lavaka vutshunguri lexi lavaka ku tshunguriwa, tanihi ntshikilelo lowukulu wa mianakanyo.

Loko wa ha ri muntshwa, swikombiso swa ku va ni ntshikilelo lowukulu wa mianakanyo swi nga tekiwa ku ri nchumu lowu tolovelekeke eka vantshwa, kambe va nga ha tshikileleka ngopfu ni ku karhala. Kutani loko u va ni gome swinene leri tekaka nkarhi wo leha, ha yini u nga vulavuli ni mutswari wa wena hi ku ya eka dokodela u ya kamberiwa?

NAWU WA BIBELE: “Vanhu lava hanyeke a va lavi n’anga, kambe yi laviwa hi lava va vabyaka.”​—Matewu 9:​12.

Loko swi kumeka leswaku u ni ntshikilelo lowukulu wa mianakanyo, a ku na xivangelo xo va u khomiwa hi tingana. Vuvabyi bya ntshikilelo wa mianakanyo byi tolovelekile eka vantshwa naswona bya tshunguleka! Vanghana va wena va ntiyiso a va nge ku teki u nga pfuni nchumu.

Xitsundzuxo: Lehisa mbilu. Swi teka nkarhi leswaku munhu loyi a nga ni ntshikilelo wa mianakanyo a hlakarhela naswona u nga ha langutela ku va masiku man’wana swi famba kahle, man’wana swi nga fambi kahle. *

 Goza leri nga ku pfunaka leswaku u titwa u antswa

Ku nga khathariseki leswaku u lava vutshunguri, ku na leswi u nga swi endlaka leswaku u langutana ni gome. Hi xikombiso, ku endla vutiolori nkarhi na nkarhi, ku dya swakudya leswi nga ni rihanyo ni ku etlela nkarhi lowu eneleke swi nga pfuna leswaku u nga tshikileleki ngopfu. (Eklesiasta 4:6; 1 Timotiya 4:8) Swi nga ku pfuna ku va ni buku leyi eka yona u nga ta tsala ndlela leyi u titwaka ha yona, tipakani leti u tivekeleke tona leti nga ta ku endla u antswa, leswi ku endlaka u khunguvanyeka ni leswi nga ta ku endla u humelela.

Ku nga khathariseki leswaku u karhatiwa hi ntshikilelo lowukulu wa mianaknyo kumbe u tshikileleke swa xinkarhana hikwalaho ka swiyimo swo tika leswi u langutaneke na swona, tsundzuka leswi: Loko u amukela mpfuno wo huma eka vanhu van’wana ni ku teka magoza lama nga ta ku endla u titwa u antswa, u nga swi kota ku langutana ni ntshikilelo wa mianakanyo.

 Rungula ra Bibele leri nga ku pfunaka

  • “Yehovha u le kusuhi ni lava va tshovekeke mbilu ; ni lava va pfotlokeke emoyeni wa va ponisa.”​—Tipisalema 34:18.

  • “Lahlela ndzhwalo wa wena eka Yehovha, u ta kuseketela. A nge pfuki a pfumerile leswaku la lulameke a tsekatseka.”​—Tipisalema 55:22.

  • “Hikuva mina, Yehovha Xikwembu xa wena, ndzi khoma voko ra wena ra xinene, yena Loyi a ku byelaka a ku, ‘U nga chavi. Mina ndzi ta ku pfuna.’”​—Esaya 41:13.

  • “Mi nga tshuki mi vilela hi siku leri tlhandlamaka.”​—Matewu 6:​34.

  • “Tivisani Xikwembu swikombelo swa n’wina ; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina.”​—Vafilipiya 4:​6, 7.

^ par. 28 Loko u anakanya hi ku tidlaya, lava mpfuno hi ku hatlisa eka munhu lonkulu loyi a tshembekaka. Leswaku u kuma rungula leri engetelekeke, vona swihloko leswi tlhandlamanaka sa mune leswi nge, “Ha Yini Ndzi Fanele Ndzi Ya Emahlweni Ndzi Hanya?” eka nkandziyiso wa Xalamuka! ya April 2014