Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Ndzi Nga Endla Yini Leswaku Ndzi Pasa Kahle?

Ndzi Nga Endla Yini Leswaku Ndzi Pasa Kahle?

Leswi u nga swi endlaka

Vana ni langutelo lerinene! U nga tivangeli ku feyila hi ku tibyela leswaku a wu nge swi koti ku pasa. Loko u fikeriwa hi miehleketo ya ku tinyadza, yi bakanye ivi u ehleketa hi swilo leswi ku khutazaka. Hi xikombiso, loko vanhu va sole vuswikoti bya muapostola Pawulo byo vulavula (kumbexana hi ndlela leyi nga fanelangiki), u va hlamule a ku: “Hambiloko ndzi pfumala vutshila eku vulavuleni, hakunene a ndzi byi pfumali evutivini.” (2 Vakorinto 10:10; 11:6) Pawulo a a ku tiva ku tsana kakwe. Kambe a a byi tiva vuswikoti lebyi a nga na byona. Ku vuriwa yini hi wena? Xana wa byi tiva vuswikoti bya wena? Loko u nga byi tivi, ha yini u nga vutisi munhu lonkulu la ku rhandzaka. Munhu yoloye a nga ku pfuna leswaku u tiva vuswikoti bya wena nileswaku u byi tirhisa hi ndlela leyinene.

Hlakulela tindlela letinene to hlaya. A ku na ndlela yin’wana yo pasa handle ko hlaya tibuku ta xikolo. Kambe vana vo tala a va swi rhandzi ku hlaya. Hambiswiritano, ku hlaya swa vuyerisa. Entiyisweni, loko u tinyika nkarhi wo hlaya u ta kuma leswaku u sungula ku swi tsakela swinene. Kambe leswaku u kota ku tiphina hi ku hlaya, u fanele u wu hlela kahle nkarhi wa wena. Tsundzuka leswaku ku hlaya ku fanele ku va ka nkoka swinene eka wena. I ntiyiso leswaku Bibele yi vula leswaku ku ni “nkarhi wa ku hleka” ni “nkarhi wa ku tlula-tlula.” (Eklesiasta 3:1, 4; 11:9) Kutani ku fana ni vantshwa vo tala, wa swi lava ku tivekela nkarhi wa ku tihungasa. Kambe Eklesiasta 11:4 ya hi tsundzuxa: “Loyi a langutaka mheho a nge byali mbewu; naswona loyi a langutaka mapapa a nge tshoveli.” U dyondza yini eka tsalwa leri? U nga veketeli hikuva u ta tsandzeka ku endla ntirho wa nkoka. Rhanga hi ku hlaya ivi endzhaku u ya tihungasa. U nga vileli, u ta wu kuma nkarhi wo swi endla haswimbirhi.

Tanihi leswi ku tlakula tinsimbi swi nga tiyisaka misiha, tindlela letinene to hlaya ti nga ku pfuna leswaku u pasa kahle.