Nghena endzeni

Yesu Wa Ponisa​—Njhani?

Yesu Wa Ponisa​—Njhani?

Nhlamulo ya Bibele

Yesu u ponise vanhu vo tshembeka loko a nyikela vutomi byakwe tanihi gandzelo ra nkutsulo. (Matewu 20:28) Xisweswo, Bibele yi n’wi vula “Muponisi wa misava.” (1 Yohane 4:14) Yi tlhela yi ku: “A ku na ku ponisiwa eka un’wana, hikuva ku hava vito rin’wana ehansi ka tilo leri nyikiweke vanhu leri hi faneleke ku ponisiwa ha rona.”—Mintirho 4:12.

Yesu u ‘nantswe rifu hikwalaho ka vanhu hinkwavo’ lava nga ni ripfumelo eka yena. (Vaheveru 2:9; Yohane 3:16) Endzhaku ka sweswo, “Xikwembu xi n’wi pfuxile eka lava feke” kutani a tlhelela etilweni a ri xivumbiwa xa moya. (Mintirho 3:15) Leswi a nga etilweni u va “ponisa hi ku helela lava tshinelelaka Xikwembu ha yena, hikuva nkarhi hinkwawo wa hanya leswaku a va kombelela.”—Vaheveru 7:25.

Ha yini hi lava Yesu leswaku a hi kombelela eka Xikwembu?

Hinkwerhu hi vadyohi. (Varhoma 3:23) Xidyoho xi hi hambanisa ni Xikwembu, naswona xi hi yisa eku feni. (Varhoma 6:23) Yesu i “mupfuni” wa lava nga ni ripfumelo egandzelweni ra nkutsulo. (1 Yohane 2:1) Wa va kombelela eka Xikwembu leswaku xi yingisa swikhongelo swa vona ni ku va rivalela swidyoho swa vona hikwalaho ka rifu ra yena ra gandzelo. (Matewu 1:21; Varhoma 8:34) Xikwembu xi hlamula swikombelo leswi Yesu a swi endlaka hikuva swi fambisana ni ku rhandza ka xona. Xikwembu xi rhume Yesu emisaveni “leswaku misava yi ponisiwa ha yena.”—Yohane 3:17.

Ku pfumela eka Yesu ntsena hi swona swi lavekaka leswaku hi ponisiwa?

Doo! Hambileswi hi faneleke hi pfumela eka Yesu leswaku hi ponisiwa, ku ni swin’wana swo tala leswi hi faneleke hi swi endla. (Mintirho 16:30, 31) Bibele yi ri: “tanihi leswi miri lowu nga riki na moya wu feke, xisweswo ni ripfumelo leri nga riki na mintirho ri file.” (Yakobo 2:26) Leswaku hi ponisiwa hi fanele hi:

  • Dyondza hi Yesu ni hi Tata wakwe Yehovha.—Yohane 17:3.

  • Va ni ripfumelo eka vona.​—Yohane 12:44; 14:1.

  • Kombisa ripfumelo hi ku yingisa milawu ya vona. (Luka 6:​46; 1 Yohane 2:​17) Yesu u dyondzise leswaku a hi hinkwavo lava n’wi vitanaka “Hosi” lava nga ta ponisiwa, kambe ku ta ponisiwa ntsena lava “endlaka ku rhandza ka Tata wa [yena] la nge matilweni.”—Matewu 7:21.

  • Yana emahlweni u kombisa ripfumelo hambiloko u xanisiwa. Yesu u swi veke erivaleni sweswo a ku: “Loyi a tiyiseleke ku fika emakumu hi yena la nga ta ponisiwa.”—Matewu 24:13.