Nghena endzeni

Rifu Ra Yesu “Ri Kutsula Vo Tala” Hi Ndlela Yihi?

Rifu Ra Yesu “Ri Kutsula Vo Tala” Hi Ndlela Yihi?

Nhlamulo Ya Bibele

Xikwembu xi tirhisa rifu ra Yesu ku kutsula kumbe ku ponisa vanhu eka xidyoho ni rifu. Bibele yi fanisa ngati ya Yesu leyi halatiweke ni mali leyi humesiwaka ku kutsula munhu. (Vaefesa 1:7; 1 Petro 1:​18, 19) Hikwalaho, Yesu u vule leswaku u tele ku ta “nyikela moyaxiviri wakwe wu va nkutsulo wa lavo tala.”​—Matewu 20:28.

Ha yini a swi laveka leswaku “vo tala va kutsuriwa”?

Munhu wo sungula, Adamu, u vumbiwe a hetisekile kumbe a nga ri na xidyoho. A a ri ni lunghelo ro hanya hilaha ku nga heriki kambe u hlawule ku nga xi yingisi Xikwembu. (Genesa 3:​17-​19) U hundzisele xidyoho eka vana va yena. (Varhoma 5:​12) Hikwalaho ka xivangelo lexi, Bibele yi vula leswaku Adamu u “tixavisile” yena ni vana va yena evuhlongeni bya xidyoho ni rifu. (Varhoma 7:​14) Leswi va nga hetisekangiki, a nga kona loyi a nga vuyiselaka leswi Adamu a swi lahleke. ​—Pisalema 49:​7, 8.

Xikwembu xi twele vana va Adamu vusiwana hikwalaho ka xiyimo xa vona xo biha. (Yohane 3:​16) Kambe, milawu ya Xikwembu ya vululami a yi nga lavi leswaku xi honisa kumbe ku tshika xidyoho xa vona handle ka xivangelo lexi twalaka. (Pisalema 89:14; Varhoma 3:​23-​26) Xikwembu xa va rhandza vanhu, hikwalaho xi endle lunghiselelo ra le nawini leswaku xi nga va rivaleli swidyoho ntsena kambe ni ku tlhela xi swi herisa. (Varhoma 5:​6-8) Nkutsulo i lunghiselelo ra le nawini.

Xana nkutsulo wu tirha njhani?

EBibeleni, rito “nkutsulo” ri katsa tinhla tinharhu leti landzelaka:

  1. I hakelo.​Tinhlayo 3:​46, 47.

  2. I nkutsulo, kumbe ku vuyisela.​—Eksoda 21:30.

  3. Wu ringana ni ntsengo lowu hakeriwaka, kumbe wa wu siva. *

Vona leswaku tinhla leti ti fambisana njhani ni nkutsulo wa Yesu Kreste.

  1. Hakelo. Bibele yi vula leswaku Vakreste va “xaviwe hi nxavo.” (1 Vakorinto 6:​20; 7:​23) Ntsengo wolowo i ngati ya Yesu, leyi a “[xaveleke] Xikwembu vanhu lava humaka eka tinyimba hinkwato ni tindzimi hinkwato ni vanhu hinkwavo ni matiko hinkwawo.”​—Nhlavutelo 5:​8, 9.

  2. Nkutsulo. Rifu ra Yesu ri endle leswaku ku va ni ku “ntshunxiwa hi nkutsulo” eka xidyoho.​—1 Vakorinto 1:​30; Vakolosa 1:​14; Vaheveru 9:​15.

  3. Ku ringana. Rifu ra Yesu ri ringana hi ku kongoma ni leswi Adamu a swi lahleke​—vutomi bya munhu la hetisekeke. (1 Vakorinto 15:21, 22, 45, 46) Bibele yi ri: “Hikuva tanihi leswi vo tala va veke vadyohi hi ku ka munhu un’we [Adamu] a nga yingisanga, hi ku fanana, vo tala va ta va lava lulameke hikwalaho ka ku yingisa ka munhu un’we [Yesu Kreste].” (Varhoma 5:​19) Leswi swi hlamusela ndlela leyi rifu ra munhu un’we ri nga kutsulaka vo tala ha yona. Kahlekahle, rifu ra Yesu ri ve “nkutsulo lowu yelanaka eka hinkwavo” lava tekaka magoza lama faneleke leswaku va vuyeriwa hi rona.​—1 Timotiya 2:​5, 6.

^ par. 11 EBibeleni, marito yo sungula lama hundzuluxeriweke ma va “nkutsulo” ma kombetela eka ntsengo kumbe leswi hakeriwaka. Hi xikombiso, riendli ra Xiheveru leri nge ka·pharʹ kahlekahle ri vula ku “funengeta.” (Genesa 6:​14) Hi ntolovelo ri vula ku funengetiwa ka xidyoho. (Pisalema 65:3) Riviti leri nge koʹpher ri kombetela eka ntsengo lowu humesiwaka ku hakela nkutsulo. (Eksoda 21:30) Hilaha ku fanaka, rito ra Xigriki leri nge lyʹtron leri hakanyingi ri hundzuluxewaka ri va “nkutsulo,” ri nga ha tlhela ri kombetela eka ntsengo lowu humesiwaka “ku ntshunxa.” (Matthew 20:28; The New Testament in Modern Speech, leyi tsariweke hi R. F. Weymouth.Vatsari va Magriki va tirhisa rito leri ku kombetela eka ntsengo lowu hakeriwaka ku kutsula mubohiwa kumbe ku ntshunxa nhlonga.