Nghena endzeni

Xana Yesu A A Languteka Njhani?

Xana Yesu A A Languteka Njhani?

Nhlamulo ya Bibele

A nga kona loyi a swi tivaka hi kongoma leswaku Yesu a a languteka njhani, tanihi leswi ndlela leyi a a languteka ha yona yi nga hlamuseriwangiki eBibeleni. Leswi swi kombisa leswaku ndlela leyi Yesu a a languteka ha yona a hi ya nkoka. Kambe, Bibele ya hi hlamusela leswaku Yesu a nga ha va a languteka njhani.

  • Ndlela leyi a languteka ha yona: Yesu a a ri Muyuda naswona swi tikomba a ve Muyuda hikwalaho ka mana wakwe. (Vaheveru 7:​14) Yesu a a nga hambananga ni vanhu van’wana. Eka xiyimo xin’wana u swi kotile ku suka eGaleliya a ya eYerusalema va nga n’wi lemuki. (Yohane 7:​10, 11) Naswona hambi vadyondzisiwa van’wana va yena a va nga n’wi tivi. Tsundzuka leswaku siku rin’wana Yudasi Iskariyoti u bohoke ku komba ntshungu lowu a wu tele ku ta khoma Yesu leswaku hi wihi.​—Matewu 26:47-​49.

  • Ku leha ka misisi: Misisi ya Yesu a yi nga lehanga hikuva Bibele yi vula leswaku “loko wanuna a ri ni misisi yo leha swa n’wi tsongahata.”​—1 Vakorinto 11:14.

  • Malebvu: Yesu a a ri ni malebvu. A a landzela nawu wa Xiyuda, lowu a wu alela vavanuna ku ‘tsemeta malebvu ya le tlhelo yi koma.’ (Levhitica 19:27; Vagalatiya 4:4) Nakambe, vuprofeta bya le Bibeleni byi vulavula hi malebvu ya yena loko a xanisiwa.​—Esaya 50:6.

  • Miri: Swikombiso hinkwaswo swi kombisa leswaku Yesu a a ri ni miri wa wanuna wo toloveleka. Hi nkarhi wa vutirheli bya yena, u fambafambe tindhawu to tala. (Matewu 9:​35) U basise tempele ya Vayuda kambirhi, a wisetela matafula ya vacincisi va mali naswona siku rin’wana u hlongole tihomu ni tinyimpfu hi nkharisa. (Luka 19:45, 46; Yohane 2:​14, 15) Cyclopedia ya McClintock na Strong yi ri: “Rungula hinkwaro ra tievhangeli ri kombisa matimba ya mpfumawulo wa rito ra [Yesu]ni xivumbeko xa miri wa yena.”​—Vholumo IV, tluka 884.

  • Xikandza xa yena: Yesu a a ri ni rirhandzu ni twelavusiwana, handle ko kanakana a swi vonaka eka ndlela leyi a languteka ha yona exikandzeni. (Matewu 11:28, 29) Vanhu va tinxaka hinkwato a va n’wi lava leswaku va ta chaveleriwa ni ku pfuniwa. (Luka 5:​12, 13; 7:​37, 38) Vana na vona a va nga chavi ku ya eka yena.​—Matewu 19:13-​15; Marka 9:​35-​37.

Mianakanyo leyi hoxeke mayelana ni ndlela leyi Yesu a a languteka ha yona

Mianakanyo leyi hoxeke: Van’wana va vula leswaku Yesu a a ri Muafrika hikuva buku ya Nhlavutelo yi fanisa misisi ya yena ni voya ni milenge ya yena ni wulu kasi milenge yakwe yi yi fanisa ni“koporo yo tenga.”​—Nhlavutelo 1:​14, 15.

Ntiyiso: Buku ya Nhlavutelo yi vulavula hi “swikombiso.” (Nhlavutelo 1:1) Misisi ni milenge ya Yesu swi kombisa timfanelo leti a nga ta va na tona endzhaku ka loko a pfuxiwile, a swi kombisi leswi a a ri xiswona loko a ha ri laha misaveni. Loko yi vula leswaku “nhloko ya [Yesu] ni misisi ya yena a yi basile wonge i voya byo basa, wonge i gamboko,” buku ya Nhlavutelo 1:​14 yi tirhisa muvala ku nga ri xivumbeko, ko va xifananisi ntsena. Leswi swi fanekisela vutlhari lebyi a nga na byona hileswi a nga munhu wa khale. (Nhlavutelo 3:​14) Ndzimana leyi a yi fanisi xivumbeko xa misisi ya yena ni voya kambe yi yi fanisa ni gamboko.

Milenge ya Yesu yi languteka ku fana ni “koporo yo tenga loko yi hisiwa ekheleni ra ndzilo.” (Nhlavutelo 1:​15) Nakambe, xikandza xa yena a xi fana ni “dyambu loko ri voninga hi matimba ya rona.” (Nhlavutelo 1:​16) Tanihi leswi ku nga riki rixaka ro karhi leri nga ni misisi yo fana ni muvala lowu, xivono lexi ko va xikombiso, lexi kombisaka Yesu la pfuxiwaka tanihi loyi a “tshamaka eku vonakaleni loku nga tshinelelekiki.”​—1 Timotiya 6:​16.

Mianakanyo leyi hoxeke: Yesu a a tsanile.

Ntiyiso: Yesu a a hanya ku fana ni wanuna. Hi xikombiso, hi xivindzi u titivisile eka ntshungu lowu hlomeke lowu a wu tele ku ta n’wi khoma. (Yohane 18:​4-8) Nakambe Yesu a a ri muvatli a tirha hi mavoko.​—Marka 6:3.

Kambe, ha yini Yesu a a lava ku pfuniwa ku rhwala mhandzi ya nxaniso? Naswona ha yini a fe lavan’wana a va beleriwe na yena va nga si fa? (Luka 23:26; Yohane 19:31-​33) Loko a nga si beleriwa, miri wakwe a wu karhele swinene. A nga etlelanga vusiku hinkwabyo, kumbexana hinkwalaho ka gome. (Luka 22:42-​44) Vusiku hinkwabyo Vayuda va n’wi xanisile naswona eka mixo wa siku leri landzelaka Varhoma va n’wi belerile. (Matewu 26:67, 68; Yohane 19:​1-3) Sweswo hinkwaswo swi endle leswaku a hatla a fa.

Mianakanyo leyi hoxeke: Yesu a a tshama a miyerile, a nga tsakanga.

Ntiyiso: Yesu u kombise timfanelo ta Yehovha, Tata wakwe wa le tilweni hi ku hetiseka, loyi yi n’wi hlamuselaka tanihi “Xikwembu lexi tsakeke.” (1 Timotiya 1:​11; Yohane 14:9) Yesu u dyondzise van’wana ndlela yo va ni ntsako. (Matewu 5:​3-9; Luka 11:28) Leswi swi kombisa swona leswaku minkarhi hinkwayo Yesu a a tshama a tsakile.