Nghena endzeni

Yerusalema Lontshwa I Yini?

Yerusalema Lontshwa I Yini?

Nhlamulo Ya Bibele

“Yerusalema Lowuntshwa,” i marito lama humelelaka kambirhi eBibeleni, ya vula muti wo fanekisela lowu yimelaka valandzeri va Yesu lava yaka etilweni va ya fuma na yena eMfun’weni wa Xikwembu. (Nhlavutelo 3:12; 21:2) Bibele yi vula leswaku ntlawa lowu wa Vakreste va nga ha vuriwa mutekiwa wa Kreste.

Tindlela to tiva Yerusalema Lontshwa

  1. Yerusalema Lontshwa u le tilweni. Nkarhi hinkwawo loko Bibele yi vulavula hi muti wa Yerusalema Lontshwa, yi vula leswaku wu huma etilweni, naswona tinyangwa ta wona ti rindziwe hi tintsumi. (Nhlavutelo 3:12; 21:2, 10, 12) Vukulu bya muti lowu byi kombisa leswaku a hi wa laha misaveni. Vukulu bya wona i “12 000 wa stadiya.” * (Nhlavutelo 21:16) Marhangu ya wona ma lehe 560 wa tikhilomitara ku ya ehenhla.

  2. Yerusalema Lontshwa u vumbiwa hi ntlawa wa valandzeri va Yesu, ku nga mutekiwa wa Kreste. Yerusalema Lontshwa u vitaniwa “mutekiwa, nsati wa Xinyimpfana.” (Nhlavutelo 21:9, 10) Eka nhlamuselo leyi yo fanekisela, Yesu Kreste hi yena Xinyimpfana. (Yohane 1:29; Nhlavutelo 5:12) “Nsati wa Xinyimpfana,” mutekiwa wa Kreste u yimela Vakreste lava nga ta va swin’we na Yesu etilweni. EBibeleni vuxaka bya Yesu ni Vakreste lava totiweke yi byi fanisa ni bya wanuna ni nsati. (2 Vakorinto 11:2; Vaefesa 5:23-25) Ku engetela kwalaho, maribye ya masungulo ya Yerusalema Lontshwa ma tsariwe “mavito ya 12 ya vaapostola va 12 va Xinyimpfana.” (Nhlavutelo 21:14) Vuxokoxoko lebyi byi hi pfuna ku tiva leswaku Yerusalema Lontshwa i wa njhani, tanihi leswi Vakreste lava vitaneriwaka ku ya hanya etilweni va ‘akiweke ehenhla ka masungulo ya vaapostola ni vaprofeta.’—Vaefesa 2:20.

  3. Yerusalema Lontshwa i xiphemu xa mfumo. Muti wa khale wa Yerusalema a wu ri ntsindza wa tiko ra Israyele, ku nga ndhawu leyi Hosi Davhida ni n’wana wakwe Solomoni ni vatukulu va vona va fumeke va ri “exiluvelweni xa Yehovha.” (1 Tikronika 29:23) Yerusalema wu vuriwa ‘muti wo kwetsima,’ xisweswo wu yimela vulawuri bya Xikwembu eka rixaka ra Davhida. (Nehemiya 11:1) Yerusalema Lontshwa, lowu nakambe wu vuriwaka “muti wo kwetsima,” wu vumbiwa hi lava nga ta ya fuma na Yesu etilweni va ri ‘tihosi va fuma misava.’—Nhlavutelo 5:9, 10; 21:2.

  4. Yerusalema Lontshwa u tisela vanhu mikateko emisaveni. Muti wa Yerusalema Lontshwa wu hlamuseriwa wu ri lowu ‘xikaka hi le tilweni wu huma eka Xikwembu,’ leswi kombaka leswaku Yehovha u tirhisa wona ku lulamisa swilo emisaveni. (Nhlavutelo 21:2) Xiga lexi xi komba leswaku Yerusalema Lontshwa wu fambisana ni Mfumo wa Xikwembu lowu xi tirhisaka wona ku endla xikongomelo xa xona ‘emisaveni ni le tilweni.’ (Matewu 6:10) Xikongomelo xa Xikwembu hi vanhu emisaveni xi katsa ku va katekisa hi ndlela leyi:

    • Xi susa xidyoho. “Nambu wa mati ya vutomi” wu khuluka wu suka eYerusalema Lowuntshwa wu cheleta “mirhi ya vutomi” leyi nga ta “hanyisa matiko.” (Nhlavutelo 22:1, 2) Ku hanyisiwa emirini ni le moyeni swi ta susa xidyoho ni ku pfuna vanhu leswaku va kuma vutomi lebyi hetisekeke hilaha Xikwembu a xi swi lavisa xiswona ku sukela eku sunguleni.—Varhoma 8:21.

    • Vuxaka lebyinene exikarhi ka Xikwembu ni vanhu. Xidyoho xi endle leswaku vanhu va va ekule ni Xikwembu. (Esaya 59:2) Ku susiwa ka xidyoho ku ta endla leswaku byi hetiseka hilaha ku heleleke vuprofeta lebyi nge: “Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona.”—Nhlavutelo 21:3.

    • Ku ta herisiwa ku xaniseka ni rifu. Xikwembu xi ta tirhisa Mfumo wa xona ku “sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:4.

^ par. 5 Ku tirhisiwe xitediyamu xa le Rhoma lexi a xi lehe timitara ta 185.