Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Xana Yesu U Fele eXihambanweni?

Xana Yesu U Fele eXihambanweni?

Nhlamulo ya Bibele

Vanhu vo tala va teka xihambano ku ri mfungho lowu tolovelekeke ngopfu wa Vukreste. Hambiswiritano, Bibele a yi vuli nchumu malunghana ni lexi Yesu a feleke eka xona, xisweswo a ku na munhu la nga tivaka xivumbeko xa xona hi ku helela. Nilokoswiritano, Bibele yi nyikela vumbhoni bya leswaku Yesu u fele emhandzini leyi ololokeke ku nga ri exihambanweni.

Hakanyingi loko Bibele yi kombetela eka nchumu lowu Yesu a feleke eka wona yi tirhisa rito ra Xigriki leri nge, stau·ros′. (Matewu 27:40; Yohane 19:17) Hambileswi vuhundzuluxeri byi tirhisaka rito leri nge “xihambano,” swidyondzi swo tala swi pfumela leswaku ri vula “mhandzi leyi ololokeke.” * Hi ku ya hi buku leyi vuriwaka A Critical Lexicon and Concordance to the English and Greek New Testament rito leri nge, stau·ros′ “a ri si tshama ri hlamuseriwa tanihi timhandzi timbirhi leti hingakanyaneke ti endla xivumbeko xo karhi.”

Bibele yi tlhela yi tirhisa rito ra Xigriki leri nge, xy′lon tanihi mavizweni wa rito leri nge, stau·ros′. (Mintirho 5:30; 1 Petro 2:24) Rito leri ri vula “rihunyi,” “mhandzi kumbe “nsinya.” * Xisweswo The Companion Bible yi gimeta yi ku: “A ku na marito eka Testamente Leyintshwa ya Xigriki lama vulaka timhandzi timbirhi.”

Xana Xikwembu xa ku pfumelela ku tirhisiwa ka xihambano evugandzerini?

Crux simplex—i rito ra Xilatini leri vulaka mhandzi yin’we leyi tirhiseriweke ku belela xigevenga

Ku nga khathariseki xivumbeko xa nchumu lowu Yesu a feleke eka wona, tinhla leti landzelaka ni tindzimana ta Bibele ti kombisa leswaku a hi fanelanga hi tirhisa xihambano evugandzerini.

  1. Xikwembu a xi byi amukeli vugandzeri lebyi tirhisaka swifaniso kumbe mimfungho, ku katsa ni xihambano. Xikwembu xi lerise Vaisrayele leswaku va nga tirhisi “xivumbeko xa xifanekiselo xin’wana ni xin’wana” evugandzerini bya vona, hilaha ku fanaka ni Vakreste va byeriwe leswaku va ‘balekela ku gandzela swifaniso swa hava.’Deteronoma 4:15-19; 1 Vakorinto 10:14.

  2. Vakreste va lembe-xidzana ro sungula a va xi tirhisanga xihambano evugandzerini. * Tidyondzo ni xikombiso xa vaapostola swi vekele Vakreste hinkwavo ntila lowu va faneleke va wu landzela.2 Vatesalonika 2:15.

  3. Ku tirhisiwa ka xihambano swi sukela eka vuhedeni. * Endzhaku ka malembe ya madzana Yesu a file, loko tikereke ti hambuka eka leswi a a swi dyondzisa, swirho leswintshwa swa kereke “a swi pfumeleriwe hi vunyingi leswaku swi tlhelela eka ku tirhisa mimfungho ya vuhedeni,” ku katsa ni xihambano. (The Expanded Vine’s Expository Dictionary of New Testament Words) Hambiswiritano, Bibele a yi swi seketeli leswaku vanhu va tirhisa mimfungho ya vuhedeni leswaku yi va pfuna va kota ku hundzuka.2 Vakorinto 6:17.

^ ndzim. 4 Hlaya New Bible Dictionary, Nkandziyiso Wa Vunharhu, leyi tsariweke hi D. R. W. Wood, tluka 245; Theological Dictionary of the New Testament, Vholumo VII, tluka 572; The International Standard Bible Encyclopedia, Nkandziyiso Lowu Pfuxetiweke, Vholumo 1, tluka 825; The Imperial Bible-Dictionary, Vholumo II, tluka 84.

^ ndzim. 5 Hlaya The Expanded Vine’s Expository Dictionary of New Testament Words, tluka 1165; A Greek-English Lexicon, leyi tsariweke hi Liddell na Scott, Nkandziyiso Wa Vukaye, matluka 1191-1192; ni Theological Dictionary of the New Testament, Vholumo V, tluka 37.

^ ndzim. 9 Hlaya Encyclopædia Britannica, 2003, eka “Cross”; The Cross—Its History and Symbolism, tluka 40; ni The Companion Bible, Oxford University Press, appendix 162, tluka 186.

^ ndzim. 10 Hlaya The Encyclopedia of Religion, Vholumo 4, tluka 165; The Encyclopedia Americana, Vholumo 8, tluka 246; ni Symbols Around Us, matluka 205-207.