Nghena endzeni

I Yini Nkhuvulo

I Yini Nkhuvulo

Nhlamulo ya Bibele

 Nkhuvulo i ku va munhu a petiwa ematini a tlhela a humesiwa. a Hi yona mhaka Yesu a khuvuleriwe enambyeni. (Matewu 3:13, 16) Hilaha ku fanaka, wanuna wa Muetiyopiya u kombele ku khuvuriwa laha a ku ri ni “nhlengeleto wa mati.”​—Mintirho 8:36-40.

Leswi ku khuvuriwa swi vulaka swona

 Bibele yi fanisa nkhuvulo ni ku lahla. (Varhoma 6:4; Vakolosa 2:12) Nkhuvulo wa mati wu kombisa ku va munhu a tshiki vutomi byakwe bya khale kutani a sungula ku hanya vutomi lebyintshwa tanihi Mukreste la ti nyiketeleke eka Xikwembu. Nkhuvulo ni magoza lama yisaka eka wona, i malunghiselelo ya Xikwembu ku endlela leswaku munhu a va ni ripfalo leri baseke hi ku pfumelelana ni ripfumelo leri a nga na rona eka gandzelo ra Yesu Kreste. (1 Petro 3:21) Hi yona mhaka Yesu a dyondzise vadyondzisiwa vakwe leswaku va khuvuriwa.—Matewu 28:19, 20.

Xana nkhuvulo wa mati wu hlantswa swidyoho?

 Doo! Bibele yi dyondzisa leswaku i ngati ya Yesu ntsena leyi yi nga hi hlantswaka swidyoho. (Varhoma 5:8, 9; 1 Yohane 1:7) Leswaku munhu a vuyeriwa eka gandzelo ra Yesu, swi lava leswaku a kombisa ripfumelo eka Yesu, a cinca mahanyelo, a hanya hi ku pfumelelana ni tidyondzo ta Yesu, kutani a khuvuriwa.— Mintirho 2:38; 3:19.

I yini nkhuvulo wa tincece?

 Rito leri nge “nkhuvulo wa tincece” a ri kumeki eBibeleni. Ri kombisa xiendlakalo lexi xi endliwaka etikerekeni tin’wana la ha tincece ti “khuvuriwaka” (hi ndlela yo ti haxa hi mati kumbe ku ti chela hi mati enhlokweni) ti tlhela ti thyiwa mavito.

Xana Bibele ya vulavula hi nkhuvulo wa tincece?

 Doo! Nkhuvulo wa Vukreste i wa lava kuleke kahle lerova va ta kota ku twisisa ni ku pfumela eka “mahungu lamanene ya Mfumo wa Xikwembu.” (Mintirho 8:12) Swi fambisana ni ku twa rito ra Xikwembu, u ri amukela, kutani u hundzuka​—ku nga leswi tincece ti nga taka ti nga swi koti ku swi endla.—Mintirho 2:​22, 38, 41.

 Nakambe, Bibele yi komba leswaku Xikwembu xi languta vana va Vakreste va ri lava kwetsimaka, kumbe lava baseke, hikwalaho ka ripfumelo ra vatswari va vona. (1 Vakorinto 7:14) Loko nkhuvulo wa tincece a wu amukeleka, vana valavo a va nga ta kwetsimisiwa hi kwalaho ka vatswari va vona. b

Mavunwa hi nkhuvulo wa Vakreste

 Mavunwa: Swa pfumeleleka ku va munhu a haxiwa hi mati ematshan’weni yo va a petiwa hi laha ku heleleke.

 Ntiyiso: Minkhuvulo hinkwayo leyi boxiweke eBibeleni a yi katsa ku peta hi ku helela ematini. Hi xikombiso, loko Filipi a khuvula wanuna wa Muetiyopiya, va “rhelele ematini” leswaku a n’wi khuvula. Loko va heta, “va humile ematini.”​— Mintirho 8:36-39. c

 Mavunwa: Bibele yi vula leswaku ni tincece a ti katseka loko ndyangu hinkwawo wu khuvuriwa. Hi xikombiso, yi vula leswi, hi mulanguteri wa khotso eFilipiya yi ri: “Yena ni lava va nga va yena va khuvuriwa.”—Mintirho 16:31-34.

 Ntiyiso: Mhaka ya mulanguteri wa khotso yi komba leswaku hinkwavo lava va khuvuriweke va twisise “rito ra Yehovha” naswona va ‘tsakile swinene.’ (Mintirho 16:32, 34) Leswi vulaka leswaku tincece ta le ndlwini ya mulanguteri wa khotso a ti katsekanga eka nkhuvulo, hikuva a ti nga ri si twisisa rito ra Yehovha.

 Mavunwa: Yesu a a dyondzisa hi nkhuvulo wa tincece loko a vula leswaku Mfumo wa Xikwembu i wa vana lavatsongo.—Matewu 19:13-15; Marka 10:13-16.

 Ntiyiso: Yesu a a nga vulavuli hi nkhuvulo loko a vula marito lawa. Kambe, a a vula leswaku lava va lavaka ku nghena Mfun’weni wa Xikwembu va fanele va kotisa vana​—va olova ni ku yingisa.​—Matewu 18:4; Luka 18:16,17.

a Rito ra Xigriki leri hundzuluxeriweke leri nge “nkhuvulo” ri huma eka rimitsu leri vulaka ku “peta.” Vona Theological Dictionary of the New Testament, Vholumo I, tluka 529.

b Hi ku ya hi The International Standard Bible Encyclopedia, “a ku kona laha ku vulavuriwaka hi nkhuvulo wa tincece eka Testamente Leyintshwa.” Yi tlhela yi boxa leswaku endlelo leri ri ye ri andza “hi laha ku hoxeke ri tlhela ri nyanyisiwa hi ku anakanya leswaku nkhuvulo i wa nkoka,” lerova wu nga hlantswa swidyoho.—Vholumo 1, tluka 416-​417.

c Ehansi ka xihloko lexi nge “Nkhuvulo (eBibeleni),” New Catholic Encyclopedia yi ri: “Swi le rivaleni leswaku eka tikereke ta le ku sunguleni nkhuvulo a ku ri wa ku peta hi laha ku heleleke ematini.”—Vholumo 2, tluka 59.