Nghena endzeni

Xana U Nga Hanya Njhani Hilaha Ku Nga Heriki?

Xana U Nga Hanya Njhani Hilaha Ku Nga Heriki?

Nhlamulo ya Bibele

Bibele yi tshembisa leswi: “Loyi a endlaka ku rhandza ka Xikwembu, u tshama hilaha ku nga heriki.” (1 Yohane 2:17, Bibele Ya Mahungu Lamanene) Xikwembu xi lava leswaku u endla yini?

  • U dyondza hi Xikwembu ni N’wana wa xona Yesu. Yesu u khongele Xikwembu a ku: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Ku katseka yini emhakeni ya ku va ni “vutivi” hi Xikwembu na Yesu? Hi nga va tiva hi ku dyondza Bibele ni ku tirhisa leswi hi swi dyondzaka. * Bibele yi hlamusela leswi vuriweke hi Muvumbi wa hina, Yehovha Xikwembu, la nga munyiki wa vutomi. (Mintirho 17:24, 25) Bibele yi tlhela yi hi byela hi N’wana wa yena ku nga Yesu, loyi a dyondziseke “marito ya vutomi lebyi nga heriki.”—Yohane 6:67-69.

  • Vana ni ripfumelo eka gandzelo ra nkutsulo ra Yesu. Yesu u te emisaveni a ta “tirhela ni ku nyikela moya-xiviri wakwe wu va nkutsulo.” (Matewu 20:28) Gandzelo ra nkutsulo ra Yesu ri pfulele vanhu ndlela yo kuma vutomi lebyi nga heriki eParadeyisini emisaveni. * (Pisalema 37:29) Yesu u te: “Hikuva Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) A swi lavi u pfumela ntsena hi nomu kambe ku laveka ni mintirho. Hi fanele hi va ni ‘ripfumelo eka yena,’ hi hlawula ku hanya hi ku pfumelelana ni leswi a swi dyondzisaka swin’we ni ku endla ku rhandza ka Tata wakwe.—Matewu 7:21; Yakobo 2:17.

  • Ku va ni vuxaka lebyikulu ni Xikwembu. Xikwembu xi lava leswaku hi tshinela eka xona, hi va vanghana va xona. (Yakobo 2:23; 4:8) Xikwembu xi hanya hilaha ku nga heriki. A xi nge fi, naswona xi lava leswaku vanghana va xona na vona va hanya hilaha ku nga heriki. Vanhu lava lavaka Xikwembu, xi ri eka vona: “Onge timbilu ta n’wina ti nga hanya hi masiku.”—Pisalema 22:26.

Mavonelo Lama Hoxeke Mayelana Ni Ku Hanya Hilaha Hu Nga Heriki

Mavonelo lama hoxeke: Vanhu va ta hanya hilaha ku nga heriki hikwalaho ka matshalatshala lawa va ma endlaka.

Ntiyiso wa mhaka: Hambileswi va ta vutshunguri va tshembisaka leswaku mirhi ya vona yi ta pfuna vanhu leswaku va kota ku hanya nkarhi wo lehanyana, kambe matshalatshala ya vona a ma nge va pfuni vanhu leswaku va hanya hilaha ku nga heriki. I Xikwembu ntsena lexi nga hi nyikaka vutomi lebyi nga heriki, hikuva hi xona “xihlovo xa vutomi.” (Pisalema 36:9) Xi tshembisa leswaku xi ta “mita rifu hi masiku.”—Esaya 25:8; 1 Yohane 2:25.

Mavonelo lama hoxeke: I vanhu va rixaka ro karhi ntsena lava nga ta hanya hilaha ku nga heriki.

Ntiyiso wa mhaka: Xikwembu a xi rhandzi vanhu vo karhi ntsena. Hilaha ku fanaka, “eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” (Mintirho 10:34, 35) Vanhu va tinxaka ni mindhavuko hinkwayo lava yingisaka Xikwembu va ta hanya hilaha ku nga heriki.

Mavonelo lama hoxeke: Vutomi lebyi nga heriki byi ta phirha.

Ntiyiso wa mhaka: Xikwembu lexi hi rhandzaka, lexi lavaka leswaku hi tsaka hi xona xi nyikaka vanhu vutomi lebyi nga heriki. (Yakobo 1:17; 1 Yohane 4:8) Xa swi tiva leswaku loko hi lava ntsako hi fanele hi va ni xikongomelo evuton’wini. (Eklesiasta 3:12) Xikwembu xi tshembisa leswaku lava nga ta hanya hilaha ku nga heriki va ta va ni ntirho lowu eneriseka lowu nga ta pfuna vona ni mindyangu ya vona.—Esaya 65:22, 23.

Ku tlula kwalaho, lava nga ta hanya hilaha ku nga heriki va ta ya emahlweni va dyondza swilo leswintshwa hi Muvumbi ni ntumbuluko wa yena hinkwawo. U vumbe vanhu va ri ni ku navela ku hanya hilaha ku nga heriki ni ku navela ku dyondza ha yena, hambileswi va nga ta ka “va nga pfuki va wu twisisile ntirho lowu Xikwembu xa ntiyiso xi wu endleke ku sukela eku sunguleni ku ya eku heteleleni.” (Eklesiasta 3:10, 11) Xisweswo lava va hanyaka nkarhi hinkwawo va ta dyondza va tlhela va endla swilo swo tsakisa.

^ par. 4 Timbhoni ta Yehovha ti ni dyondzo ya Bibele ya mahala. Leswaku u kuma rungula leri engetelekeke, hlalela vhidiyo leyi nge, Leswi Endlekaka Eka Dyondzo Ya Bibele

^ par. 5 Vona nhlokomhaka leyi nge “Yesu Wa Ponisa—Njhani?”