Nghena endzeni

LESWI NGA PFUNAKA NDYANGU

Ndlela Yo Kombisa Rirhandzu

Ndlela Yo Kombisa Rirhandzu

Loko malembe ma ri karhi ma famba, ndlela leyi vatekani van’wana a va rhandzana ha yona yi nga ha hunguteka. Xana loko ku humelela leswi evukatini bya wena swi fanele swi ku tsona vurhongo?

 Leswi u faneleke u swi tiva

Ku kombisana rirhandzu swi tiyisa vukati. Tanihi leswi ku dya swakudya nkarhi na nkarhi ni ku nwa mati swi pfunaka munhu leswaku a tshama a hanye kahle, ni ku kombisana rirhandzu swi tiyisa vukati. Hambiloko se ku hundze malembe nuna ni nsati va tekanile, va fanele va tshama va ri karhi byelana leswaku va rhandzana.

Rirhandzu ra ntiyiso a ri na vutianakanyi. Munhu la nga ni rirhandzu ro tano u lava ku tsakisa munghana wakwe wa vukati. Ematshan’weni yo kombisa rirhandzu loko swi laviwa hi yena, munghana la anakanyelaka wa swi xiya loko nsati kumbe nuna wakwe a lava ku kombiwa rirhandzu naswona u tikarhatela ku endla tano.

Hi ntolovelo vavasati va lava ku kombisiwa rirhandzu ku tlula vavanuna.Wanuna a nga ha rhandza nsati wakwe swinene. Kambe loko a kombisa nsati wakwe rirhandzu nimixo kumbe nimadyambu ntsena kumbe loko va lava ku endla swa masangu ntsena, nsati a nga ha kanakana loko nuna wakwe a n’wi rhandza hakunene. I swinene leswaku nuna a kombisa nsati wakwe rirhandzu mikarhi hinkwayo, siku ni siku.

 Leswi u nga swi endlaka

Kombisa rirhandzu hi marito. Marito yo olova yo fana ni lama nge, “Ndza ku rhandza” kumbe “U wa risima eka mina” ma nga endla munghana wa wena wa vukati a titwa a rhandziwa.

Nsinya wa nawu wa Bibele: “Nomu wu vulavula leswi mbilu yi taleke swona.”Matewu 12:34.

Xiringanyeto: U nga n’wi byeli ndlela leyi u titwaka ha yona hi nomu ntsena. Swi tsale​—ephepheni, eka imeyili kumbe u n’wi rhumela swona hi foni.

Kombisa rirhandzu hi swiendlo. Ku n’wi angarha, ku n’wi ntswontswa kumbe ku n’wi khoma hi xandla swi nga endla leswaku a swi vona leswaku hakunene u tiyisile loko u ku “Ndza ku rhandza.” U nga kombisa leswaku wa n’wi rhandza loko u n’wi khumba ni ku n’wi languta hi ndlela ya rirhandzu kumbe mikarhi yin’wana u n’wi nyika nyiko yo karhi. Swi nga va njhani loko wo pfuna nsati wa wena hi swo karhi, u n’wi khomela bege, u n’wi pfulela rivanti, u hlantswa swibye, u hlantswa swiambalo, kumbe u sweka? Leswi vavanuna vo tala va nga swi endliki siku na siku sweswo, loko va swi endla va va va kombisa rirhandzu!

Nsinya wa nawu wa Bibele: “A hi veni ni rirhandzu, ku nga ri hi marito [ntsena] kumbe ririmi, kambe hi swiendlo ni ntiyiso.”1 Yohane 3:18.

Xiringanyeto: Khoma munghana wa wena wa vukati hilaha a wu n’wi khoma hakona loko ma ha ku sungula ku rhandzana.

Tinyikeni nkarhi wo va swin’we. Ku heta nkarhi mi ri vambirhi ntsena swi ta tiyisa vukati bya n’wina naswona nuna kumbe nsati wa wena u ta swi vona leswaku wa swi tsakela ku va swin’we na yena. Hambiswiritano, a swi olovi ku kuma nkarhi wo va vambirhi ntsena loko mi ri ni vana kumbe loko ku ri ni swilo swo tala leswi lavaka ku lulamisiwa. Kumbexana, nkarhi ni nkarhi mi nga ha kunguhata ku fambafamba swin’we mi tiolola.

Nsinya wa nawu wa Bibele: “Tiyiseka hi swilo swa nkoka”—Vafilipiya 1:10.

Xiringanyeto: Vatekani van’wana lava tshamaka va khomekile, va tinyika nkarhi wo va swin’we nkarhi ni nkarhi ni madyambu kumbe hi mahelovhiki.

N’wi tive kahle munghana wa wena wa vukati. Ndlela leyi hi lavaka ku kombisiwa rirhandzu ha yona a yi fani. Phofula ndlela leyi u lavaka ku kombisiwa rirhandzu ha yona ni laha munghana wa wena a faneleke a antswisa kona. Kutani tikarhatele ku endla leswi nuna kumbe nsati wa wena a swi lavaka. Tsundzuka leswaku rirhandzu ri tiyisa vukati.

Nsinya wa nawu wa Bibele: “Rirhandzu . . . a ri lavi leswi vuyerisaka rona ntsena.”—1 Vakorinto 13:4, 5.

Xiringanyeto: Ematshan’weni yo rilela ku rhandziwa, tivutise leswi, ‘Ndzi nga endla yini leswaku munghana wa mina wa vukati a ndzi rhandza swinene?’

“Hi ringeta ku ehleketa hi leswi rhandziwaka hi munghana lon’wana. Hi xikombiso, nuna wanga wa tsaka loko ndzi khensa swilo leswi a ndzi endlelaka swona. Sweswo swi n’wi kombisa leswaku ndza n’wi rhandza. Kasi mina ndza tsaka loko a ndzi vutisa ndlela leyi ndzi titwaka ha yona. Sweswo swi ndzi kombisa leswaku wa ndzi rhandza.​—Flavia ni nuna wakwe Aron.