Nghena endzeni

TIVHESE TA BIBELE LETI HLAMUSERIWEKE

Yoxuwa 1:9​—“Vana ni xivindzi, u tiya”

Yoxuwa 1:9​—“Vana ni xivindzi, u tiya”

 “Xana a ndzi ku lerisanga? Vana ni xivindzi, u tiya. U nga chuhi kumbe u chava, hikuva Yehovha Xikwembu xa wena u na wena kun’wana ni kun’wana laha u yaka kona.”—Yoxuwa 1:9. BibeleVuhundzuluxeri Bya Misava Leyintshwa.

 “Tsundzuka leswi ndzi ku leriseke swona: Tiya, u va ni xivindzi; u nga chavi nchumu, u nga heli matimba, hikuva mina HOSI Xikwembu xa wena ndzi ta va na wena hinkwako lomu u nga ta ya kona.”—Yoxuwa 1:9, Bibele Ya Mahungu Lamanene.

Leswi Yoxuwa 1:9 Yi Vulaka Swona

 Hi marito lawa Yehovha * Xikwembu u tiyise Yoxuwa mugandzeri wakwe wo tshembeka leswaku a va ni ‘xivindzi, a tiya’ ku nga khathariseki swiphiqo leswi a langutana na swona leswi a swi vonaka swi tika swinene. Yoxuwa a nga fanelanga chava hileswi nga ta endleke enkarhini lowu taka loko a yingisa swileriso swa Xikwembu hikuva a swi ta fana ni loko Yehovha a ri ekusuhi na yena a n’wi pfuna leswaku a humelela. Xikwembu a xi ri na Yoxuwa hi ku n’wi kongomisa ni ku n’wi pfuna leswaku a hlula valala vakwe.

 Yoxuwa a ta swi kotisa ku yini ku va ni ‘xivindzi, a tiya’? A a ta kuma xivindzi ni matimba eka Matsalwa lama huhuteriweke lawa Yehovha a a va nyike wona hi nkarhi wolowo. Leswi a swi katsa ‘Nawu hinkwawo lowu Muxe nandza wa Yehovha a wu leriseke Yoxuwa.’ * (Yoxuwa 1:7) Yehovha u byele Yoxuwa leswaku a wu “hlaya hi rito ra le hansi ni ku [‘wu anakanya, vusiku ni nhlikanhi]”—Bibele Ya Mahungu Lamanene . (Yoxuwa 1:8) Ku hlaya ni ku anakanyisisa swi tiyise miehleketo ni mbilu ya Yoxuwa leswaku a kota ku endla ku rhandza ka Xikwembu. Yoxuwa a fanele a endla leswi a swi dyondzeke eRitweni ra Xikwembu leswaku a kota ku “landzela hinkwaswo leswi tsariweke eka [rona].” Loko a endla tano, a ta endla swilo hi vutlhari a tlhela a humelela eka leswi a swi endlaka. Naswona swi ve tano. Hambileswi a langutaneke ni swiphiqo, Yoxuwa u enerisekile hi vutomi bya yena tanihi leswi a a gandzela Yehovha hi ku tshembeka.—Yoxuwa 23:14; 24:15.

 Marito lawa Yehovha a ma byeleke Yoxuwa na hina ma hi khutaza namuntlha. Ma kombisa leswaku Yehovha wa khathala hi malandza yakwe hinkwawo, ngopfungopfu loko ma langutane hi swiphiqo. U lava leswaku ma hlula ku fana ni leswi Yoxuwa a nga hlula! Naswona ku fana na Yoxuwa va nga va ni ‘xivindzi, va tiya’ loko mikarhi hinkwayo va hlaya ni ku anakanyisisa hi Rito ra Xikwembu, ku nga Bibele ni ku hanya hi ku ya hi leswi yi swi vulaka.

Mongo Wa Yoxuwa 1:9

 Endzhaku ka loko Muxe a file, Yehovha u lerise Yoxuwa leswaku a rhangela tiko ra Israyele. (Yoxuwa 1:1, 2) Hi nkarhi wolowo Vaisrayele a va lunghiselela ku nghena eTikweni Leri Tshembisiweke, etikweni ra Kanana. Kambe a va fanele va lwa ni valala va matimba. Hi xikombiso, Yoxuwa a fanele a lwa ni vakanana, lava a va ri ni tihanyi. * (Deteronoma 9:5; 20:17, 18) Nakambe Vakanana a va tele ngopfu naswona a va ri ni matlhari ku tlula Vaisrayele. (Yoxuwa 9:1, 2; 17:18) Kambe hikwalaho ka xivindzi Yoxuwa u landzele swiletelo swa Yehovha. Yehovha u swi kombisile leswaku u na yena hikuva Vaisrayele va hlule valala va vona vo tala hi malembe ya ntsevu ntsena.—Yoxuwa 21:43, 44.

^ Vito leri nge Yehovha i vito ra Xikwembu leri hundzuluxeriweke ri va hi Xinghezi ri suka eka Xiheveru, maletere lawa ya mune יהוה (YHWH), ma vitaniwa Tetragrammaton. Vito leri ri hundzuluxeriwe ri va “HOSI” eka Bibele ya Mahungu Lamanene. Leswaku u kuma rungula hi Yehovha ni leswaku hikwalaho ka yini Tibibele tin’wana ti nga ri tirhisi vito leri ra Xikwembu, vona nhlokomhaka leyi nge “Yehovha I Mani?

^ Yoxuwa a ri ni matsalwa lama huhuteriweke, na hina namuntlha hi na wona naswona ha tsaka leswi eBibeleni ku katsiweke ni tibuku ta ntlhanu ta Muxe (Genesa, Eksoda, Levhitika, Tinhlayo na Deteronoma), buku ya Yobo ni tipisalema tin’wana.

^ Ku tiva leswaku hikwalaho ka yini a swi fanela leswaku nyimpi yoleyo kona, vona nhlokomhaka leyi nge “Ha Yini Xikwembu Xi Lerise Vaisrayele Leswaku Va Lwa Ni Vakanana?” eka Xihondzo Xo Rindza xa January 1, 2010.