“Ndzi mi byele swilo leswi, leswaku mi va ni ku rhula hikwalaho ka mina. Misava yi ta mi xanisa kambe vanani ni xivindzi! Misava ndzi yi hlurile.”—Yohane 16:33, Bibele—Matsalwa Yo Kwetsima Ya Misava Leyintshwa.

 “Ndzi mi byerile swilo leswi leswaku mi va ni ku rhula eka mina. La misaveni, mi ta va ni mahlomulo, kambe tiyani timbilu, ndzi yi hlurile misava.”—Yohane 16:33, Bibele ya Mahungu Lamanene.

Leswi Yohane 16:33 Yi Vulaka Swona

 Hi marito lawa, Yesu a tiyisekisa valandzeri vakwe leswaku va nga swi kota ku tsakisa Xikwembu ku nga khathariseki miringo ni ku kanetiwa.

 “Ndzi mi byele swilo leswi, leswaku mi va ni ku rhula hikwalaho ka mina.”  aLoko ndzimana leyi yi ya emahlweni yi kombisa leswaku ku rhula loku ku vulavuriwaka hi kona a ku vuli swona leswaku vanhu a va nge he vi na swiphiqo. Ku ri na sweswo, i ku rhula ka le mbilwini ni le miehleketweni. Ku rhula koloko hi nga ku kuma “hikwalaho ka” Yesu loyi a tshembiseke ku hi rhumela moya wo kwetsima. “Mupfuni” yoloye loyi a nga ni matimba u ta pfuna vadyondzisiwa va Yesu leswaku va langutana ni miringo yin’wana ni yin’wana yo tika.—Yohane 14:16, 26, 27.

 “Misava yi ta mi xanisa kambe vanani ni xivindzi!” Yesu a a swi tiva leswaku vadyondzisiwa vakwe a va ta langutana ni miringo yo fana na ku nga khomiwi kahle ni ku xanisiwa. (Matewu 24:9; 2 Timotiya 3:12) Hambiswiritano, a va ta va ni xivangelo xo va ni “xivindzi.”—Yohane 16:33.

 “Misava ndzi yi hlurile.” Eka ndzimana leyi, rito “misava” ri vula vanhu lava nga riki na vuxaka lebyinene ni Xikwembu. b 1 Yohane 5:19 yi ri: “Misava hinkwayo yi le hansi ka matimba ya Sathana,” kumbe lowo homboloka. Vanhu va misava leyi va endla swilo ni ku ehleketa hi ndlela leyi nga fambisaniki na ku rhandza ka Xikwembu.—1 Yohane 2:15-17.

 Sathana ni vanhu vakwe va ringete ku sivela Yesu loko a hetisisa ku rhandza ka Xikwembu, loku a ku katsa leswaku a dyondzisa vanhu hi Xikwembu ni ku va a nyikela hi vutomi byakwe lebyi hetisekeke leswaku byi va nkutsulo. (Matewu 20:28; Luka 4:13; Yohane 18:37) Yesu a nga va pfumelelanga va kucetela ndlela leyi a a ehleketa hayona ni ku xandzukela Xikwembu. U tshame a tshembekile kukondza a fa. Hikwalaho, swa fanela ku va Yesu a vula leswaku u yi hlurile misava nileswaku Sathana “mufumi wa misava . . . a nge [n’wi] endli nchumu.”—Yohane 14:30.

 Yesu u tirhise leswi a langutaneke na swona ku komba valandzeri vakwe leswaku na vona va nga swi kota ku tshama va tshembekile eka Xikwembu hambiloko va ringiwa. Hi marito man’wana Yesu a ku: “Loko ndzi kote ku hlula misava, na n’wina mi nga swi kota.”

Mongo Wa Yohane 16:33

 Yesu u vule marito lawa hi vusiku byo hetelela a nga si fa. Leswi a swi tiva ku u ta fa ku nga ri kahle, u tirhise nkarhi wolowo ku khutaza vaapostola vakwe vo tshembeka ro hetelela. U va byele ntiyiso wun’wana wa nkoka ku nga leswaku a va nge he n’wi voni nileswaku a va ta xanisiwa hambi ku ri ku dlayiwa. (Yohane 15:20; 16:2, 10) Leswi a swi tiva leswaku sweswo a swi ta chavisa vaapostola vakwe, u gimete hi ku va byela marito lama nga eka Yohane 16:33 leswaku a va khutaza ni ku va tiyisekisa.

 Marito ni xikombiso xa Yesu swi nga ha khutaza valandzeri vakwe namuntlha. Vakreste hinkwavo va nga swi kota ku tshama va tshembekile eka Xikwembu ku nga khathariseki miringo.