“A nga kona loyi a nga ni rirhandzu ro tlula leri, lerova a kala a fela vanghana vakwe.”—Yohane 15:13, Bibele—Matsalwa Yo Kwetsima Ya Misava Leyintshwa.

 “A ku na munhu la nga ni rirhandzu leri tlulaka ra loyi a nyiketaka vutomi bya yena hikwalaho ka vanakulobye.”—Yohane 15:13, Bibele ya Mahungu Lamanene.

Leswi Yohane 15:13 Yi Vulaka Swona

 Yesu a pfuna valandzeri vakwe ku twisisa leswaku rirhandzu ra vona a ri fanele ri va lerikulu lerova va tiyimisela ku fela van’wana.

 Loko Yesu a nga si vula marito lawa, u byele vaapostola vakwe a ku: “Ndzi mi lerisa leswaku mi rhandzana hilaha ndzi mi rhandzeke hakona.” (Yohane 15:12) Xana Yesu a va rhandza hi ndlela yihi? A va rhandza hi ndlela leyi pfumalaka vutianakanyi ni hi rirhandzu ra ku tinyiketela. Loko a ha ri laha misaveni, a a rhangisa swilaveko ni ntsako wa valandzeri vakwe ni van’wana. U horise vanhu eka mavabyi ya vona ni ku va dyondzisa hi Mfumo wa Xikwembu. a A endla ni mitirho ya xiyimo xa le hansi leswaku a vuyerisa van’wana. (Matewu 9:35; Luka 22:27; Yohane 13:3-5) Kambe eka Yohane 15:13, Yesu a vulavula hi rirhandzu lerikulu swinene. Kahlekahle endzhaku ka tiawara a vule marito lawa, u kombise rirhandzu lerikulu hi ku “nyikela vutomi byakwe leswaku byi va nkutsulo wa lavo tala” hi ku swi rhandza. (Matewu 20:28; 22:39) Hi ndlela yoleyo, u kombise leswaku u rhandza van’wana ku tlula yena n’wini hi ndlela leyi nga tolovelekangiki.

Yesu u rhandza vanhu. Kambe u va rhandza swinene lava endlaka leswi a swi dyondziseke. A teka vadyondzisiwa va yena va ri vanghana vakwe lavakulu hikuva a va yingisa swileriso swakwe naswona va ve na yena loko a langutana ni miringo. (Luka 22:28; Yohane 15:14, 15) Hikwalaho, a ri ni xivangelo xo nyikela hi vutomi byakwe hikwalaho ka vona.

Vakreste vo sungula a va ma teka ma ri ya nkoka marito ya Yesu naswona a va tiyimisele ku fela van’wana. (1 Yohane 3:16) Hakunene rirhandzu ro pfumala vutianakanyi ku nga rirhandzu leri Yesu a ri kombiseke, a ri ta va mfungho wa Vakreste va ntiyiso.—Yohane 13:34, 35.

Mongo wa Yohane 15:13

Tindzima 13 ku ya eka 17 ta Evhangeli ya Yohane ti vulavula hi ndzayo leyi Yesu a yi nyikeke vaapostola vakwe vo tshembeka va 11 ni hi xikhongelo xakwe xo hetelela. Endzhaku ka sweswi, u ve a fa. Ku kombisa leswaku vadyondzisiwa vakwe a va fanele va va ni vun’we na yena leswaku swi va erivaleni ku i valandzeri vakwe, Yesu eka ndzima 15 u va fanisa ni marhavi ya murhi wa mudiriva lama tswalaka mihandzu. U va khutaza leswaku va ya emahlweni va “tswala mihandzu yo tala.” (Yohane 15:1-5, 8) Ndlela yin’wana yo endla tano i ku kombisa rirhandzu ra ku tinyiketela leri katsaka ku chumayela hi leswi Yesu a chumayeleke ha swona, ku nga “mahungu lamanene ya Mfumo wa Xikwembu.”—Luka 4:43; Yohane 15:10, 17.

Hlalela vhidiyo leyi yo koma leswaku u vona leswi buku ya Yohane yi vulavulaka ha swona.