“Ndzi vitane ndzi ta ku hlamula, ndzi ku byela swilo leswikulu ni leswi nga twisisekiki, leswi u nga swi tivangiki.”—Yeremiya 33:3, Bibele—Matsalwa Yo Kwetsima Ya Misava Leyintshwa.

 “Ndzi huweleleni, kutani ndzi ta mi hlamula, ndzi mi komba swilo leswikulu leswi tumbeleke, leswi ni ku swi tiva mi nga swi tiviki.”—Yeremiya 33:3, Bibele ya Mahungu Lamanene.Xoo

Leswi Yeremiya 33:3 Yi Vulaka Swona

 Hi marito lawa, Xikwembu xi rhambe vanhu leswaku va khongela eka xona. Lava twaka xirhambo xexo ni ku xi amukela ivi va khongela eka Xona, a xi ta va hlavutela leswi a swi ta endleka enkarhini lowu taka.

 “Ndzi vitane ndzi ta ku hlamula.” Xiga lexi nge “ndzi vitane,” a xo vula ku huwelela vito ra Xikwembu. Ku ri na sweswo, ku vitana Xikwembu swi katsa ku kombela mpfuno ni nkongomiso wa xona hi xikhongelo.—Pisalema 4:1; Yeremiya 29:12.

 Xirhambo lexi, a xi kongomisiwe eka tiko ra khale ra Israyele. Tiko rero, a ri xandzukele Xikwembu naswona a ri lava ku hlaseriwa hi vuthu ra Vababilona. (Yeremiya 32:1, 2) Yehovha a u va rhambe leswaku va tlhelela eka yena hi ku n’wi vitana hi xikhongelo.

 “Ndzi ta . . . ku byela swilo leswikulu ni leswi nga twisisekiki, leswi u nga swi tivangiki.” Swilo leswi Xikwembu xi tshembiseke ku va paluxela swona, a swi twisiseki hikuva vanhu a va nga ta swi kota ku swi tiva hi voxe. Xiga lexi nge “leswi nga twisisekiki” xi nga tlhela xi hundzuluxeriwa xi va “leswi tumbeleke.”

 I yini swilo “leswi tumbeleke” leswi Xikwembu a xi ta swi paluxa? I swilo leswi a swi ta endleka enkarhini lowu taka, ku nga ku lovisiwa ka muti wa khale wa Yerusalema ni vuhomboloki bya wona ni ku tlhela wu pfuxetiwa enkarhini lowu taka. (Yeremiya 30:1-3; 33:4, 7, 8) Hambiswiritano, Xikwembu xi tlhele xi tshembisa leswaku vagandzeri va xona a va nga ta lovisiwa hinkwavo tanihi tiko.—Yeremiya 32:36-38.

Mongo wa Yeremiya 33:3

 Yehovha u byele muprofeta Yeremiya vuprofeta lebyi hi 608 B.C.E., hi lembe ra vukhume ra ku fuma ka Hosi Sedekiyasi. Yeremiya u profete leswaku Yerusalema a wu ta lovisiwa naswona Sedekiyasi a ta yisiwa evukhumbini. Leswi hosi a yi nga tsakanga hikwalaho ka vuprofeta byebyo, yi pfalele Yeremiya.—Yeremiya 32:1-5; 33:1; 37:21.

 Loko ku endleka sweswo, Xikwembu xi vule marito lama nga eka Yeremiya 33:3. Lexi vavaka, Hosi Sedekiyasi ni van’wana vo tala etikweni va ye emahlweni va nga xi yingisi Xikwembu. (Yeremiya 7:26; 25:4) A va xi vitananga Xikwembu va kombela nkongomiso wa xona. Endzhaku ka lembe, Sedekiyasi u tekeriwe vuhosi, Yerusalema yi lovisiwa naswona vo tala lava poneke va yisiwe evuhlongeni eBabilona.—Yeremiya 39:1-7.

 Marito lama kumekaka eka Yeremiya 33:3 ma hi tsundzuxa leswaku loko hi khongela eka Xikwembu ni ku hlaya Rito ra xona ku nga Bibele, xi nga hi nyika “vutivi bya ntiyiso bya ku rhandza ka Xikwembu” ni ku hi paluxela “swilo leswi enteke.” (Yeremiya 33:3; Vakolosa 1:9; 1 Vakorinto 2:10) Swilo sweswo leswi enteke swi katsa leswi Xikwembu xi tshembiseke ku hi endlela swona enkarhini lowu taka.—Nhlavutelo 21:3, 4.

 Hlalela vhidiyo leyi yo koma leswaku u vona leswi buku ya Yeremiya yi vulavulaka ha swona.