TIVHESE TA BIBELE LETI HLAMUSERIWEKE
Yeremiya 11:11—“Ndzi Va Tisela Khombo”
“Hikwalaho Yehovha u ri, ‘Ndzi va tisela khombo leri va nga ta ka va nga swi koti ku ri balekela. Loko va kombela mpfuno eka mina, a ndzi nge va yingisi.’”—Yeremiya 11:11, Bibele—Matsalwa Yo Kwetsima Ya Misava Leyintshwa.
“Hikwalaho, Yehovha u vula a ku: ‘Vonani, ndzi ta va humesela khombo leri va nga taka va nga poni eka rona; va ta huwelela eka mina, kambe ndzi nga ka ndzi nga va yingisi.’”—Yeremiya 11:11, Bibele Ya Xitsonga.
Leswi Yeremiya 11:11 Yi Vulaka Swona
Xikwembu a xi vulavula ni Vayuda lava a va hanya enkarhini wa muprofeta Yeremiya. Leswi vanhu a va yi ba hi makatla milawu ya Yehovha a yo lulama ni switsundzuxo leswi a a va nyika swona hi ku tirhisa vaprofeta, a a nga ta va sirhelela loko va langutana ni swilo swa biha hikwalaho ka swiendlo swa vona.—Swivuriso 1:24-32.
“Hikwalaho Yehovha u ri.” Rito leri nge, “hikwalaho” ri hlanganisa tindzimana leti hundzeke ni leti landzelaka. Eka Yeremiya 11:1-10, Yehovha u byele vanhu vakwe leswaku va tlule ntwanano kumbe xiboho lexi vakokwa wa vona va xi endleke na yena. (Eksoda 24:7) Vayuda va sungule ku gandzela swifaniso ematshan’weni yo gandzela Muvumbi wa vona. Va endle swilo swo tala swo homboloka, leswi katsaka ni ku endla magandzelo hi vana.—Yeremiya 7:31.
“Ndzi va tisela khombo.” Mikarhi yo tala, Bibele yi vula leswaku Xikwembu xi pfumelela swilo swa karhi leswaku swi endleka. Ni le mhakeni leyi xi endle tano. Loko vanhu va tlula milawu ya Yehovha yo lulama ivi va gandzela swikwembu swa mavunwa, va tivangele maxangu. Xikwembu a xi nga ha va pfuni. Hikwalaho ka sweswo, nala wa vona lonkulu, ku nga hosi ya Babilona, u hlule Yerusalema ni ku yisa vaaki va wona evukhumbini. Swikwembu swa mavunwa leswi a va swi tshemba swi va kombe xikosi.—Yeremiya 11:12; 25:8, 9.
Ku va Xikwembu xi pfumelele vanhu va xona leswaku va weriwa hi maxangu, a swi vuli swona leswaku a xi na vululami. Yakobo 1:13 yi ri: “Xikwembu xi nge ringiwi hi swilo swo biha naswona xona a xi ringi munhu.” King James Version yi vula leswaku Xikwembu “xi ta tisela [Vayuda] maxangu.” Hambiswiritano, rito ra Xiheveru b leri hundzuluxeriweke ri va “maxangu” eka Yeremiya 11:11, ri nga tlhela ri hundzuluxeriwa ri va “khombo,” ku nga rito leri ku hlamuselaka kahle ku xaniseka loku weleke Vayuda.
“Loko va kombela mpfuno eka mina, a ndzi nge va yingisi.” Yehovha a nga swi yingisi swikhongelo swa lava ‘mavoko ya vona ma halateke ngati yo tala’ kumbe lava tshembaka leswaku swikwembu swa mavunwa swi ta va ponisa. (Esaya 1:15; 42:17) Hambiswiritano, wa va yingisa lava hundzukaka eka swiendlo swa vona swo biha ivi va tlhelela eka yena.—Esaya 1:16-19; 55:6, 7.
Mongo wa Yeremiya 11:11
Hi lembe ra 647 B.C.E., Yehovha u endle Yeremiya a va muprofeta wakwe. Ku ringana malembe ya 40, Yeremiya u lemukise vanhu va le Yuda hi vuavanyisi bya Xikwembu lebyi taka. Kambe a va n’wi yingisanga. Hi nkarhi wolowo, Yeremiya u tsale marito lama kumekaka eka Yeremiya 11:11. Eku heteleleni, vuprofeta byebyo byi hetisekile hi 607 B.C.E., loko Vababilona va lovisa Yerusalema.—Yeremiya 6:6-8; 39:1, 2, 8, 9.
Buku ya Yeremiya yi tlhela yi va ni rungula leri nyikaka ntshembo. Yehovha u te: “Loko ku hela malembe ya 70 mi ri eBabilona . . . ndzi ta endla leswi ndzi mi tshembiseke swona hi ku mi tlherisela [etikweni ra Vayuda].” (Yeremiya 29:10) Yehovha u ‘endle’ leswi a swi tshembiseke hi 537 B.C.E., loko muti wa Babilona wu lovisiwa hi Vameda ni Vaperesiya. Yehovha u pfumelele vanhu vakwe lava a va hangalake ni tiko hinkwaro ra Babilona leswaku va tlhelela etikweni ra vona ni ku vuyetela vugandzeri bya ntiyiso.—2 Tikronika 36:22, 23; Yeremiya 29:14.
Hlalela vhidiyo leyi yo koma leswaku u vona nkatsakanyo wa buku ya Yeremiya.
a Yehovha i vito ra Xikwembu leri hundzuluxeriweke ri va hi Xitsonga ku suka eka ririmi ra Xiheveru. Leswaku u kuma ku hikwalahokayini ti Bibele tin’wana ti tirhisa xithopo lexi nge, “Hosi” ematshan’weni ya vito ra Xikwembu, vona nhlokomhaka leyi nge “I Mani Yehovha?”
b Matsalwa ya Xiheveru, lama tivekaka tanihi Testamente ya Khale, a ma tsariwe hi Xiheveru ni hi Xiaramu.
U Nga Ha Tsakela
TINHLAMUSELO TA TIVHESE TA BIBELE
Nhlamuselo Ya Yeremiya 29:11—“Ndzi Swi Tiva Kahle Leswi Ndzi Swi Ehleketaka Hi N’wina”
Xana Xikwembu xi kunguhatele un’wana ni un’wana wa hina swo karhi?
ESSENTIAL BIBLE TEACHINGS
Xana Xikwembu Xi Yingisa Swikhongelo Hinkwaswo?
Ku vuriwa yini loko xikhongelo xi ri xa vutianakanyi? Ku vuriwa yini loko wanuna a xanisa nsati ekaya, kutani endzhaku a khongela eka Xikwembu?
TIVHIDIYO TA TIDYONDZO TA NKOKA LETI HUMAKA EBIBELENI
Xana Xikwembu Xi Lava Hi Xi Gandzela Hi Ku Tirhisa Swifaniso?
Xana swi nga hi pfuna ku titwa hi ri ekusuhi ni Xikwembu lexi hi nga kotiki ku xi vona?
TIDYONDZO TA BIBELE
Switirhisiwa Swo Pfuneta Ku Dyondza Bibele
Nhlawula mikandziyiso leyi nga ku pfunaka ku dyondza Bibele leyi nga ta endla leswaku ku dyondza ka wena ku tsakisa.
TIDYONDZO TA BIBELE
Ringeta Dyondzo Ya Hina Ya Bibele
Kuma dyondzo ya Bibele ya mahala leyi katsaka wena ni mudyondzisi wa wena.
