“Hakelo ya xidyoho i rifu, kambe nyiko leyi hi nyikiwaka hi Xikwembu i vutomi lebyi nga heriki ha Kreste Yesu Hosi ya hina.”—Varhoma 6:23, Bibele—Matsalwa Yo Kwetsima Ya Misava Leyintshwa.

 “Ku dyoha ka hakela, hakelo ya kona i rifu, kambe nyiko leyi nyikiwaka ntsena, leyi humaka eka Xikwembu, i vutomi lebyi nga heriki, ha Kriste Yesu Hosi ya hina.”—Varhoma 6:23, Bibele Ya Mahungu Lamanene.

Leswi Varhoma 6:23 Yi Vulaka Swona

 Loko muapostola Pawulo a tsala marito lawa, a a vula leswaku vanhu va fa hikwalaho ka leswi va nga ni xidyoho. Hambiswiritano, Xikwembu xi nyika vagandzeri va xona vo tshembeka ntshembo wo kuma vutomi lebyi nga heriki.

 “Hakelo ya xidyoho i rifu.” Vanhu hinkwavo va velekiwe va nga hetisekanga, xisweswo va tala ku endla swidyoho. a (Pisalema 51:5; Eklesiasta 7:20) Leswi va velekiwaka va ri ni xidyoho, va hetelela va dyuhala ivi va fa.—Varhoma 5:12.

 Ku kandziyisa yinhla leyi, Pawulo u fanisa xidyoho ni muthori loyi a holelaka vatirhi. Leswi mutirhi a languteleke ku holeriwa hikwalaho ka ntirho lowu a wu endleke, ni vanhu va nga langutela ku fa hikwalaho ka swidyoho leswi va swi endlaka.

 Hambiswiritano, Pawulo u tlhela a hlamusela leswaku munhu “loyi a feke u tshunxiwile eka xidyoho xakwe.” (Varhoma 6:7) Loko munhu a fa, wa tshunxiwa eka swidyoho leswi a swi endleke. Hi yona mhaka, a ku na xivangelo xo ehleketa leswaku loko munhu a file wa ha ya emahlweni a xaniseka hikwalaho ka swidyoho leswi a swi endleke. Kahlekahle, Bibele yi swi veka erivaleni leswaku vafi a va tivi nchumu hambi ku ri ku twa nchumu.—Eklesiasta 9:5.

 “Kambe nyiko leyi hi nyikiwaka hi Xikwembu i vutomi lebyi nga heriki ha Kreste Yesu.” Swi nga ri na mhaka leswaku xidyoho xi tisa “hakelo” yihi, Xikwembu xi hi tshembisa vutomi lebyi nga heriki. Rito “nyiko” ri nga tlhela ri hundzuluxeriwa ri va “nyiko leyi nga hi faneriki” kumbe “nyiko ya nkoka.” Ri hlamusela nchumu lowu munhu a nyikiweke wona hambi a nga wu tirhelanga. A nga kona munhu loyi a nga kumaka ntirho lowu nga n’wi holelaka ku ponisiwa ni ku kuma vutomi lebyi nga heriki. Hambiswiritano, Xikwembu xi nyika vanhu lava nga ni ripfumelo eka Yesu nyiko ya mahala, ku nga vutomi lebyi nga heriki.—Yohane 3:16; Varhoma 5:15, 18.

Mongo wa Varhoma 6:23

 Pawulo u tsalele Vakreste va le Rhoma papila leri hi va 56 C.E. Van’wana va Vakreste volavo a va ri ni langutelo leri hoxeke hi tintswalo ta Xikwembu. Leswi a va kuceteriwa hi vativi va filosofi va Magriki, a va ehleketa leswaku loko va ya va dyoha, Xikwembu a xi ta va rivalela mikarhi hinkwayo. (Varhoma 6:1) Van’wana a va nga lavi ku xupuriwa hikwalaho ka swidyoho swa vona hikuva a va nga ha wu landzeli Nawu wa Muxe. (Varhoma 6:15) Eka papila rakwe, Pawulo u kandzeyise leswaku Vakreste a va nge tikumi tintswalo ta Xikwembu loko va pfumela ku lawuriwa hi xidyoho.—Varhoma 6:12-14, 16.

 Pawulo u tiyisekisa vagandzeri va Xikwembu namuntlha leswaku hambileswi va velekiweke va ri ni xidyoho, va nga va ni ntshembo. Loko va landzela milawu ya mahanyelo ya Xikwembu, va nga endli swilo swo biha leswi va swi navelaka, Xikwembu xi va tshembisa ku va nyika vutomi lebyi nga heriki.—Varhoma 6:22.

 Hlalela vhidiyo leyi yo koma leswaku u vona nkatsakanyo wa buku ya Varhoma.