“Onge Xikwembu lexi nyikaka ntshembo xi nga mi nyika ntsako lowukulu ni ku rhula loko mi xi tshemba, leswaku mi ta va ni ntshembo lowukulu hi matimba ya moya lowo kwetsima.”—Varhoma 15:13, Bibele—Matsalwa Yo Kwetsima Ya Misava Leyintshwa.

 “Ingi Xikwembu lexi ku langutela ku humaka ka xona xi nga mi tata hi ku tsaka hinkwako ni ku rhula hinkwako eku pfumeleni, leswaku, hi matimba ya Moya lowo Kwetsima, ku langutela ku talela, ku va ku khapa.”—Varhoma 15:13, Bibele ya Mahungu Lamanene.

Leswi Varhoma 15:13 Yi Vulaka Swona

 Loko muapostola Pawulo a vula marito lawa, a kombisa ndlela leyi a navelaka hayona leswaku Xikwembu xi nyika vapfumerikulobye “ntsako lowukulu ni ku rhula.” Vumunhu lebyi byi fambisana ni ntshembo lowu Xikwembu xi wu nyikaka ni matimba ya moya wo kwetsima.

 Hi dyondza hi ntshembo lowu Xikwembu xi hi nyikaka wona eRitweni ra xona ku nga Bibele. Hi ku ya hi Varhoma 15:4, “Swilo hinkwaswo leswi tsariweke enkarhini lowu hundzeke [eBibeleni] swi tsaleriwe ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.” Bibele yi hlamusela switshembiso swa Xikwembu swo tlhantlha swiphiqo leswi endlaka leswaku hi nga vi ni ntshembo namuntlha swo tanihi vusweti, ku nga khomiwi kahle, mavabyi ni rifu. (Nhlavutelo 21:4) Xikwembu xi ta tirhisa Yesu ku hetisisa switshembiso swa xona naswona hikwalaho ka sweswo hi nga tshemba leswaku hi ta va ni vumundzuku lebyinene.—Varhoma 15:12.

 Hi nga va ni “ntshembo lowukulu” kumbe lowu ‘taleke’ lowu Xikwembu xi hi nyikeke wona ntsena loko hi xi tshemba. Loko hi ya hi dyondza hi xona, hi ta ya hi tiyiseka leswaku hi nga xi tshemba hi ku helela. (Esaya 46:10; Tito 1:2) Ha wu khensa ntshembo lowu Xikwembu xi hi nyikaka wona hikuva wu endla leswaku hi va ni ntsako ni ku rhula hambiloko hi langutana ni swiyimo swo tika.—Varhoma 12:12.

 Ku rhula, ntsako ni ntshembo swi fambisana ni “moya lowo kwetsima” ku nga matimba ya Xikwembu lama tirhaka. a Xikwembu xi tirhisa moya wo kwetsima ku hetisa switshembiso swa xona naswona sweswo swi hi nyika ntshembo. Moya lowu wu nga tlhela wu hi pfuna leswaku hi va ni vumunhu lebyinene byo tanihi ntsako ni ku rhula.—Vagalatiya 5:22.

Mongo Wa Varhoma 15:13

 Buku ya Varhoma i papila leri tsaleriweke Vakreste lava a va tshama emutini wa Rhoma. Van’wana va Vakreste volavo a va ri Vayuda kasi van’wana a va nga ri vona. Pawulo u va khutaze leswaku va ehleketa ni ku endla swilo leswi fanaka swi nga ri na mhaka leswaku va huma eka mindhavuko yo hambana kumbe makaya lama hambaneke.—Varhoma 15:6.

 Pawulo u tsundzuxe Vakreste va le Rhoma leswaku Xikwembu i khale xi vurile leswaku vanhu va matiko va ta xi gandzela hi vun’we. U tshahe Matsalwa ya Xiheveru b ka mune leswaku a kandziyisa mhaka yoleyo. (Varhoma 15:9-12) Kahlekahle a ku: Vayuda ni vanhu van’wana va matiko a va ta vuyeriwa eka vutirheli bya Kreste. Mitlawa leyi yimbirhi yi ni ntshembo lowu fanaka lowu humaka eka Xikwembu. Hinkwavo lava humaka evandlheni ra Rhoma swi nga ri na mhaka leswaku va huma kwihi, a va fanele va ‘amukelana’ leswi vulaka leswaku a va fanele va kombisana musa ni malwandla.—Varhoma 15:7.