“Tsakani hikwalaho ka ntshembo. Mi tiyisela nhlomulo. Mi phikelela exikhongelweni.”—Varhoma 12:12, Bibele—Matsalwa Yo Kwetsima Ya Misava Leyintshwa.

 “Tsakani eku languteleni, mi tiyisela emaxangwini, mi chivirika eku khongeleni.”—Varhoma 12:12, Bibele ya Mahungu Lamanene.

Leswi Varhoma 12:12 Yi Vulaka Swona

 Eka ndzimana leyi, muapostola Pawulo u khutaze Vakreste va le Rhoma ku endla swilo swinharhu leswi a swi ta va pfuna leswaku va tshama va tshembekile swi nga ri na mhaka leswaku va xanisiwa kumbe va langutane na swiphiqo swin’wana.

 “Tsakani hikwalaho ka ntshembo.” Vakreste va ni ntshembo wo tsakisa wo hanya hilaha ku nga heriki, van’wana etilweni kasi vo tala eparadeyisini laha misaveni. (Pisalema 37:29; Yohane 3:16; Nhlavutelo 14:1-4; 21:3, 4) Ntshembo lowu wu katsa ku vona Mfumo wa Xikwembu a wu ri karhi wu tlhantlha swiphiqo swa vanhu. (Daniyele 2:44; Matewu 6:10) Vagandzeri va Xikwembu va nga tsaka hambiloko va langutane ni swiyimo swo tika hikuva va tiyiseka leswaku ntshembo wa vona i wa xiviri nileswaku ku tiyisela ka vona ku ta endla leswaku va amukeriwa hi Xikwembu.—Matewu 5:11, 12; Varhoma 5:3-5.

 “Mi tiyisela nhlomulo.” EBibeleni rito ra Xigriki leri nge, “tiyisela” mikarhi yo tala ri tirhisiwa ku vula “ku nga baleki, ku tiyisela ni ku tshembeka.” Valandzeri va Yesu a hi “xiphemu xa misava,” b kutani va langutele leswaku va ta xanisiwa naswona swi lava va tiyisela. (Yohane 15:18-20; 2 Timotiya 3:12) Loko Mukreste a tirhela Yehovha hi ku tshembeka hambiloko sweswo swi ta vula leswaku u fanele a tiyisela miringo, ripfumelo rakwe ra leswaku Xikwembu xi ta n’wi katekisa ri ta ya ri kula. (Matewu 24:13) Ripfumelo rero ri ta n’wi pfuna leswaku a lehisa mbilu ni ku tiyisela swiphiqo a tsakile.—Vakolosa 1:11.

 “Mi phikelela exikhongelweni.” Vakreste va khutaziwa ku khongela nkarhi na nkarhi leswaku va tshama va tshembekile eka Xikwembu. (Luka 11:9; 18:1) Va kombela nkongomiso eka Xikwembu nkarhi ni nkarhi naswona va titshega hi xona eka swilo hinkwaswo evuton’wini bya vona. (Vakolosa 4:2; 1 Vatesalonika 5:17) Va tiyiseka leswaku Xikwembu xi ta hlamula swikombelo swa vona hikuva va yingisa milawu ya xona ni ku endla hinkwaswo leswi va nga swi kotaka leswaku va xi tsakisa. (1 Yohane 3:22; 5:14) Nakambe va swi tiva leswaku loko va khongela nkarhi na nkarhi, Xikwembu xi ta va nyika matimba lama va ma lavaka leswaku va tshama va tshembekile swi nga ri na mhaka leswaku va langutane na xiyimo xihi.—Vafilipiya 4:13.

Mongo wa Varhoma 12:12

 Pawulo u tsalele Vakreste va le Rhoma papila kwalomu ka va 56 C.E. Eka ndzima 12 ya papila leri, u nyikele switsundzuxo leswi tirhaka swa ndlela leyi va nga vaka ni mahanyelo ya Vakreste hayona, ndlela leyi va nga khomaka Vakrestekulorhi hayona ni ndlela leyi va nga tshamaka va rhulile hayona loko va xanisiwa. (Varhoma 12:9-21) Xitsundzuxo lexi a xi fike hi nkarhi eka Vakreste va le Rhoma hikuva a va ta langutana ni ku kanetiwa lokukulu ku nga ri khale.

 Endzhaku ka malembe ma nga ri mangani, hi 64 C.E., ndzilo lowukulu wu onhe muti wa Rhoma. Vanhu vo tala a va vula leswaku Mufumi Nero hi yena a nga sungula ndzilo wolowo. Hi ku ya hi Tacitus loyi a ri n’wamatimu wa le Rhoma, u vula leswaku Nero u ringete ku ti sirhelela hi ku vula leswaku Vakreste hi vona va sunguleke ndzilo wolowo. Sweswo swi endle leswaku Vakreste va xanisiwa hi ndlela leyikulu. Xitsundzuxo xa Pawulo xo tiyisela nxaniso xi va pfunile leswaku va langutana na xiyimo xexo xo tika hi ripfumelo naswona va ri karhi va tikhoma kahle. (1 Vatesalonika 5:15; 1 Petro 3:9) Swa fanela leswaku vagandzeri va Xikwembu va tekelela xikombiso xexo namuntlha.

 Hlalela vhidiyo leyi yo koma leswaku u vona leswi buku ya Varhoma yi vulavulaka ha swona.