Nghena endzeni

TIVHESE TA BIBELE LETI HLAMUSERIWEKE

Varhoma 10:13​—“[Vitana] Vito Ra Yehovha”

Varhoma 10:13​—“[Vitana] Vito Ra Yehovha”

 “Un’wana ni un’wana loyi a vitanaka vito ra Yehovha u ta ponisiwa.”—Varhoma 10:13, Bibele—Matsalwa Yo Kwetsima Ya Misava Leyintshwa.

 “Un’wana ni un’wana la khongelaka vito ra Hosi u ta ponisiwa.”—Varhoma 10:13, Bibele—Mahungu Lamanene.

Leswi Varhoma 10:13 Yi Vulaka Swona

 Xikwembu a xi na xihlawuhlawu naswona xi lava vanhu hinkwavo va ponisiwa va tlhela va kuma vutomi lebyi nga heriki hambi va huma eka tiko rihi, i varixaka rihi kumbe va yime njhani hi swa timali. Kambe leswaku hi ponisiwa, hi fanele hi vitana vito ra Yehovha ku nga vito ra Xikwembu xa Matimba Hinkwawo. *Pisalema 83:18.

 EBibeleni xiga “[ku vitana] vito ra Yehovha” xi vula swo tala ku tlula ku tiva vito ra Xikwembu ni ku ri tirhisa loko hi gandzela. (Pisalema 116:12-14) Xi vula ku tshemba Xikwembu ni ku kombela mpfuno eka xona.—Pisalema 20:7; 99:6.

 Vito ra Xikwembu a ri ri ra nkoka eka Yesu Kreste. U vule leswi eka xikhongelo lexi a xi dyondziseke vanhu: “Tata wa hina la nga matilweni, vito ra wena a ri kwetsimisiwe.” (Matewu 6:9) Yesu u kombise leswaku hi fanele hi tiva, hi yingisa ni ku rhandza Xikwembu lexi vitaniwaka hi vito rero loko hi lava ku kuma vutomi lebyi nga heriki.—Yohane 17:3, 6, 26.

 Hikwalaho ka yini hi vula leswaku Yehovha i “Hosi” leyi boxiwaka eka Varhoma 10:13 eka Bibele ya Mahungu Lamanene? Hikuva vhese leyi yi tshaha Yuwele 2:32 laha ku humelelaka vito ra Xikwembu ku nga ri rito “Hosi” eka Xiheveru * xo sungula.

Mongo Wa Varhoma 10:13

 Eka Varhoma ndzima 10, Bibele yi kombisa leswaku munhu u fanele a va ni ripfumelo eka Yesu Kreste leswaku a va munghana wa Xikwembu. (Varhoma 10:9) Tindzimana to hlayanyana ta le ka Testamente ya Khale ta yi seketela mhaka leyi. Munhu u kombisa ripfumelo hi ku “vula erivaleni hi nomu wakwe,” leswi katsaka ku chumayela vanhu lava nga riki vapfumeri mahungu lamanene lama ponisaka. Hikwalaho ka sweswo, van’wana va kume njombo yo kombisa ripfumelo leri nga ta endla va kuma vutomi.—Varhoma 10:10, 14, 15, 17.

Hlaya Varhoma ndzima 10 swin’we ni tinhlamuselo ta le hansi ni tivhese leti fambisanaka na ndzima leyi.

^ Vito ra Xikwembu ri humelela kwalomu ka 7 000 ematsalweni ya khale ya Bibele lama tsariweke hi voko. Hi Xiheveru, vito ra Xikwembu ri tsariwa ri ri maletere ya mune lama vitaniwaka Tetragrammaton. Hi Xitsonga ri hundzuluxeriwe ri va “Yehovha” kambe swidyondzeki swin’wana swi vona swi antswa ri va “Yahweh.”

^ Swi tikomba onge vatsari va Bibele va Vakreste a va tirhisa vito ra Xikwembu loko va tshaha tivhese ta “Testamente ya Khale” leti nga ni vito rero. The Anchor Bible Dictionary yi ri: “Ku ni vumbhoni bya leswaku Tetragrammaton, Vito ra Xikwembu, Yahweh, a swi humelela eka mintshaho yin’wana kumbe hinkwayo eka Testamente Leyintshwa loko yi tsariwa ro sungula.” (Vholumo 6, tluka 392) Leswaku u kuma leswi engetelekeke, hlaya nhlokomhaka leyi nge “Vito Ra Xikwembu eMatsalweni Ya Vukreste Ya Xigriki” eka Xiengetelo A5 eka Bibele—Matsalwa Yo Kwetsima Ya Misava Leyintshwa.