“Hinkwaswo leswi mi swi endlaka, swi endleni hi mbilu ni matimba ya n’wina hinkwawo onge hi loko mi swi endlela Yehovha, ku nga ri vanhu.”—Vakolosa 3:23, Bibele—Matsalwa Yo Kwetsima Ya Misava Leyintshwa.

 “Xin’wana ni xin’wana lexi mi xi endlaka, xi endleni hi mbilu hinkwayo onge hi loko mi tirhela Hosi, ku nga ri vanhu.”—Vakolosa 3:23, Bibele—Mahungu Lamanene

Leswi Vakolosa 3:23 Yi Vulaka Swona

 Mukreste u fanele a tirha hi matimba hikuva langutelo rakwe hi ntirho ri khumba ndlela leyi a gandzelaka Yehovha hayona.

 “Xin’wana ni xin’wana lexi mi xi endlaka.” Lava lavaka ku gandzela Yehovha va ringeta hi tindlela hinkwato ku landzela leswi Bibele yi swi vulaka eka hikwaswo leswi va swi endlaka. Va tirha hi matimba leswaku va hetisisa mitirho ya vona ya le kaya, ya le xikolweni, ni ya laha va thoriweke kona hi ku hiseka, hi ntiyiso, ni hi ku tshembeka.—Swivuriso 11:13; Varhoma 12:11; Vaheveru 13:18.

 “Xi endleni hi mbilu hinkwayo.” Xiga lexi nge, “hi mbilu hinkwayo” xi hundzuluxeriwe ku suka eka xiga xa Xigriki lexi “hlamuselaka ku tinyiketela ka munhu eku endleni ni ku hetisisa ku rhandza ka Xikwembu hi matimba yakwe hinkwawo”. a

 Hikwalaho, munhu wo tano u tirhisa matimba ni vuswikoti byo anakanya leswaku a endla hinkwaswo ku hetisisa ntirho wolowo. Vuhundzuluxeri byin’wana bya Bibele byi hlamusela xiga lexi tanihi “hi mbilu hinkwayo” (New Catholic Bible) kumbe “swi suka embilwini” (King James Version).—Vona “ Vakolosa 3:23 Eka Vuhundzuluxeri Byin’wana”

 “Mi swi endlela Yehovha, ku nga ri vanhu.” Swi nga ri na mhaka leswaku Vakreste va endla ntirho wihi, va wu teka wu ri wa nkoka hikuva va swi xiya leswaku wu khumba vuxaka bya vona na Yehovha Xikwembu. Xikongomelo xa vona i ku n’wi tsakisa, ku nga ri ku tsakisa muthori kumbe munhu un’wana. Ntirho lowunene lowu Mukreste a wu endlaka ni langutelo lerinene leri a nga na rona a swi paluxi vumunhu lebyinene lebyi a nga na byona ntsena kambe swi paluxa ni ndlela leyi a gandzelaka Xikwembu hayona. Hi ndlela yoleyo, Mukreste u endla hinkwaswo leswi a nga swi kotaka “leswaku ku nga tshuki ku vulavuriwa ku biha hi vito ra Xikwembu.”—1 Timotiya 6:1; Vakolosa 3:22.

Mongo wa Vakolosa 3:23

 Buku ya Bibele ya Vakolosa yi tsariwe hi muapostola Pawulo naswona u yi tsalele Vakreste lava a va tshama emutini wa khale wa le Kolosa. b Swi tikomba a yi tsale loko a huma ekhotsweni ro sungula eRhoma, kwalomu ka va 60-61 C.E.

 Buku ya Vakolosa yi ni ndzayo leyi nga pfunaka Vakreste lava humaka etindhawini to hambanahambana ni lava hlanganaka ni swiyimo swo hambanahambana leswaku va gandzela Yehovha hi vun’we. (Vakolosa 3:11) Yi va khutaza leswaku va kombisa vumunhu lebyi fanaka ni bya Xikwembu, byo tanihi rirhandzu, musa ni ntwelavusiwana. (Vakolosa 3:12-14) Yi tlhela yi hlamusela ndlela leyi vugandzeri bya Xikwembu byi faneleke byi khumba swilo hinkwaswo evuton’wini bya munhu.—Vakolosa 3:18–4:1.

 Vakolosa 3:23 Eka Vuhundzuluxeri Byin’wana

 “Kutani leswi mi swi endlaka, hambi yi ri yini na yini, swi endleni hi timbilu ni ku rhandza, mi endlela Hosi, va nga ri vanhu.”—Bibele Ya Xitsonga.

 “Xin’wana ni xin’wana lexi mi xi endlaka, xi endleni hi mbilu hinkwayo onge hi loko mi tirhela Hosi, ku nga ri vanhu.”—Bibele ya Mahungu Lamanene.

 “Xin’wana ni xin’wana lexi u xi endlaka [kumbe ntirho wun’wana ni wun’wana lowu u wu endlaka], tirha swi suka embilwini [leswi vulaka, ku endla hinkwaswo leswi u nga swi kotaka], ku fana ni loko u endlela Hosi ku nga ri vanhu.”—The Amplified Study Bible.

 “Xin’wana ni xin’wana lexi mi xi endlaka, xi endleni hi moya-xiviri hinkwawo kukota loko mi xi endlela Yehovha, ku nga ri vanhu.”—Vuhundzuluxeri Bya Misava Leyintshwa.

 Hlalela vhidiyo leyi yo koma leswaku u vona leswi buku ya Vakolosa yi vulavulaka ha swona.