“Hikuva rito ra Xikwembu ra hanya naswona ri ni matimba, ri kariha ku tlula banga rin’wana ni rin’wana leri tsemaka hi matlhelo mambirhi, ri nghena endzeni ka munhu lerova ri kombisa leswi munhu a nga swona endzeni ni le handle, ri nghena emahlanganweni ni le ka mongo wa munhu naswona ra swi kota ku twisisa miehleketo ni makungu ya mbilu.”—Vaheveru 4:12, Bibele—Matsalwa Yo Kwetsima Ya Misava Leyintshwa.

 “Hikuva Rito ra Xikwembu ra hanya, naswona ra tirha, ri kariha ku tlula tlhari rin’wana ni rin’wana leri lotiweke matlhelo mambirhi, ri tlhava ku ya fika emahlanganeni ya hika ni moya, ni ya marhambu ni mongo, ri kota ku hlaya mianakanyo ni makungu ya mbilu.”—Vaheveru 4:12, Bibele Ya Mahungu Lamanene.

Leswi Vaheveru 4:12 Yi Vulaka Swona

 Rungula ra Xikwembu leri tsariweke eBibeleni, ri ni matimba yo paluxa miehleketo ni makungu ya munhu. Rungula rero ri nga tlhela ri n’wi endla a hundzuka.

 “Rito ra Xikwembu ra hanya.” Xiga lexi nge, “rito ra Xikwembu” xi kombetela eka xitshembiso xa Xikwembu kumbe xikongomelo xa xona, hilaha xi tsariweke hakona eBibeleni. a Xiphemu xa nkoka xa xikongomelo xexo i ku va vanhu lava yingisaka va hanya hi ku rhula ni vun’we laha misaveni hilaha ku nga heriki.—Genesa 1:28; Pisalema 37:29; Nhlavutelo 21:3, 4.

 Xana Rito ra Xikwembu, ku nga xikongomelo xa xona, ra “hanya” hi ndlela yihi? Ra hanya hikuva ri ni matimba yo khumba timbilu ta lava ri amukelaka, ri va nyika ntshembo ni xikongomelo evuton’wini. (Deteronoma 30:14; 32:47) Xivangelo xin’wana lexi endlaka ri “hanya,” hileswaku Xikwembu xa ntiyiso xi le ku endleni ka leswaku switshembiso swa xona swi hetiseka. (Yohane 5:17) Ku hambana ni vanhu, Xikwembu a xi endli xitshembiso ivi xi rivala hi xona kumbe xi lemuka leswaku a xi nge he swi koti ku xi hetisisa. (Tinhlayo 23:19) Rito ra xona ‘a ri nge tlheleli eka xona ri nga endlanga leswi xi ri rhumeke swona.’—Esaya 55:10, 11.

 “Rito ra Xikwembu . . . ri ni matimba.” Xiga lexi nge, “ri ni matimba” xi nga tlhela xi hundzuluxeriwa xi va “ri ni ntamu,” “ra tirha” kumbe “ri hetisisa xin’wana ni xin’wana lexi ri faneleke ri xi hetisisa.” Hikwalaho, xin’wana ni xin’wana lexi Yehovha b Xikwembu a xi vulaka kumbe a xi tshembisaka xi ta hetiseka hakunene. (Pisalema 135:6; Esaya 46:10) Kahlekahle, Xikwembu xi nga hetisisa switshembiso swa xona hi tindlela letikulu ku tlula leti hi ti languteleke.—Vaefesa 3:20. c

 Rito ra Xikwembu ri tlhela ri va “ni matimba” hi ku pfuna lava ri tekaka ri ri ra nkoka leswaku va cinca vutomi bya vona ni mahanyelo ya vona. Va hanya hi leswi va swi dyondzaka eka rona, leswi kucetelaka miehleketo, mahanyelo ni swikongomelo swa vona. (Varhoma 12:2; Vaefesa 4:24) Hi ndlela yoleyo, ‘rito ra Xikwembu ra tirha’ eka lava va ri tekaka tanihi rito ra xona.—1 Vatesalonika 2:13.

 “Rito ra Xikwembu . . . ri kariha ku tlula banga rin’wana ni rin’wana leri tsemaka hi matlhelo mambirhi.” Hi ndlela yo fanekisela, rito ra Xikwembu ri kariha ku tlula banga rihi ni rihi leri endliweke hi vanhu hikwalaho ka leswi ri tlhavaka hi matimba. Rungula ra Xikwembu ri nga fikelela mbilu ya munhu ku tlula tidyondzo ta vanhu. Sweswo swi vonaka eka leswi Vaheveru 4:12 yi yaka emahlweni yi swi vula.

 “Rito ra Xikwembu . . . ri nghena endzeni ka munhu lerova ri kombisa leswi munhu a nga swona endzeni ni le handle.” Rito ra Xikwembu ri kota ku kombisa leswi munhu a vonakaka a ri xiswona ehandle ni leswi hakunene a nga xiswona endzeni. (Vagalatiya 6:18) Hi ndlela yo fanekisela, “rito ra Xikwembu” ri nghenelela endzeni “ka mongo,” ku nga emakorhweni ya mbilu ni miehleketo. Ku va rito ra Xikwembu ri paluxa leswi hi nga xiswona endzeni, leswi munhu a nga kotiki ku swi vona, swi endla leswaku hi endla ku cinca evuton’wini. Sweswo swa hi tsakisa ni ku tsakisa Muvumbi wa hina.

 “Rito ra Xikwembu . . . ra swi kota ku twisisa miehleketo ni makungu ya mbilu.” Ndlela leyi munhu a khumbiwaka hi rito ra Xikwembu hayona yi nga paluxa leswi a swi ehleketaka hambi ku ri makungu kumbe swikongomelo swakwe, leswi nga ta kucetela mahanyelo yakwe ni matikhomelo yakwe. Hi xikombiso, loko munhu a yingisa leswi rito ra Xikwembu ri swi vulaka ivi a cinca mahanyelo yakwe, u kombisa leswaku wa titsongahata naswona wa tshembeka. U lava ku tsakisa Muvumbi wa yena. Hi hala tlhelo, loko a ringeta ku xopaxopa rito ra Xikwembu, u paluxa mikhuva yo biha, yo tanihi ku tikukumuxa ni ku titeka a antswa ku tlula van’wana. Kumbexana a ringeta ku tiyimelela loko a endla leswi Xikwembu xi nga swi tsakeriki.—Yeremiya 17:9; Varhoma 1:24-27.

 Hilaha nhlamuselo yin’wana yi vulaka hakona, rito ra Xikwembu “ri nga fikelela endzenindzeni ka hina.” Xikwembu xi kota ku vona leswi hi nga xiswona endzeni naswona rito ra xona ra swi paluxa. Vaheveru 4:13 yi ri: “Swilo hinkwaswo swi lo dla, swi le rivaleni ematihlweni ya loyi hi faneleke hi tihlamulela eka yena.”

Mongo wa Vaheveru 4:12

 Buku ya Vaheveru i papila leri tsariweke hi muapostola Pawulo kwalomu ka va 61 C.E., a ri tsalela Vakreste va Vayuda lava a va tshama eYerusalema ni le Yudiya.

 Eka tindzima 3 na 4, Pawulo u vulavula hi ndlela leyi xikombiso xa Vaisrayele va khale xi nga xilemukiso hayona eka Vakreste. (Vaheveru 3:8-12; 4:11) Yehovha u tshembise Vaisrayele ku va tshunxa evuhlongeni ni ku va nyika tiko leri a va ta ‘tshama va sirhelelekile.’ (Deteronoma 12:9, 10) Hambiswiritano, Vaisrayele lava a va huma eEgipta a va vanga ni ripfumelo eka switshembiso swa Xikwembu naswona a va yi yingisanga milawu ya xona hi ku phindaphinda. Hikwalaho ka sweswo, a va ‘nghenanga eku wiseni ka Xikwembu’ naswona a va tiphinanga hi vuxaka lebyinene na xona. Ku ri na sweswo, va fele emananga. Hambileswi vatukulu va vona va ngheneke etikweni leri tshembisiweke, na vona va sungule ku nga ha n’wi yingisi Yehovha. Leswi swi endle leswaku va langutana ni switandzhaku swo vava.—Nehemiya 9:29, 30; Pisalema 95:9-11; Luka 13:34, 35.

 Pawulo u hlamusele leswaku Vakreste va fanele va dyondza swo karhi eka leswi Vaisrayele lava nga tshembekangiki va swi endleke. Ku hambana na vona, hi nga nghena eku wiseni ka Xikwembu hi ku yingisa rito ra xona ni ku va ni ripfumelo leri tiyeke eka switshembiso swa xona.—Vaheveru 4:1-3, 11.

 Hlalela vhidiyo leyi yo koma leswaku u vona nkatsakanyo wa buku ya Vaheveru.