TIVHESE TA BIBELE LETI HLAMUSERIWEKE

Vaheveru 11:1—“Ku Pfumela I Ku Tshemba Loku Tiyeke , Ehenhla Ka Swilo Leswi Languteriwaka”

TLANGA

“Ripfumelo i ntshembo lowu tiyeke wa leswaku leswi swi languteriweke swi ta endleka, i vumbhoni lebyi khorwisaka bya swilo swa xiviri leswi nga voniwiki.”—Vaheveru 11:1, Bibele—Matsalwa Yo Kwetsima Ya Misava Leyintshwa.

“Ku pfumela i ku tshemba loku tiyeke, ehenhla ka swilo leswi languteriwaka, ni ku kholwa swinene hi tlhelo ra swilo leswi nga voniwiki.”—Vaheveru 11:1, Bibele ya Mahungu Lamanene.

Leswi Vaheveru 11:1 Yi Vulaka Swona

Ndzimana leyi yi hlamusela hi ku kongoma leswi ripfumelo ri vulaka swona hi ku ya hi matsalwa naswona yi kombisa leswaku ku va ni ripfumelo swi katsa swo tala ku tlula ku tshembela eka swo karhi ntsena.

“Ripfumelo i ntshembo lowu tiyeke wa leswaku leswi swi languteriweke swi ta endleka.” Eka ririmi ro sungula ra tsalwa ra Vaheveru 11:1, rito ra Xigriki leri hundzuluxeriweke ri va “ripfumelo” ri vula ku tiyisekisa, ku tshemba ni ku kucetela. Ripfumelo ro tano a ri sekeriwanga eka leswi hi navelaka leswaku swi endleka, kambe i “ntshembo lowu tiyeke.” Xiga xa Xigriki lexi nge “ntshembo lowu tiyeke” a xi nga hundzuluxeriwa xi va “xitiyisekiso lexi sayiniweke,” naswona xi hi tiyisekisaka leswaku nchumu wo karhi i wa hina.

“Ripfumelo i . . . vumbhoni lebyi khorwisaka bya swilo swa xiviri leswi nga voniwiki.” Ripfumelo ri titshege hi vumbhoni lebyi khorwisaka. Vumbhoni byebyo byi endla leswaku munhu a tiyiseka leswaku nchumu wo karhi i wa xiviri hambiloko a nga wu voni.

Mongo wa Vaheveru 11:1

Buku ya Vaheveru i papila leri muapostola Pawulo a ri tsaleleke Vakreste vo sungula lava a va tshama eYerusalema ni le kusuhi na yona. Eka ndzima leyi, Pawulo u vulavula hi nkoka wa ku va ni ripfumelo. Hi xikombiso u tsale a ku: “A swi koteki ku tsakisa Xikwembu kahle handle ka ripfumelo, hikuva loyi a tshinelaka eka Xikwembu u fanele a tshemba leswaku xi kona ni leswaku hi xona lexi hakelaka lava xi lavaka hi mbilu hinkwayo.” (Vaheveru 11:6) Endzhaku ka loko Pawulo a hlamusele leswi ripfumelo ri vulaka swona eka Vaheveru 11:1, u vulavule hi swikombiso swa vavanuna ni vavasati va le Bibeleni lava a va ri na ripfumelo. U vulavule hi ndlela leyi va kombiseke ripfumelo hayona hi ku hanya hi ku pfumelelana ni ku rhandza ka Xikwembu.—Vaheveru 11:4-38.

a Rito ra Xigriki leri hundzuluxeriweke ri va “ntshembo lowu tiyeke” i hy·poʹsta·sis, leri nga hlamuseriwaka tanihi “masungulo lamanene.” Hi Xilatini, rito leri ri hundzuluxeriwe ri va sub·stanʹti·a naswona hi xinghezi ri hundzuluxeriwe ri va “substance,” hilaha ri tirhisiweke hakona eka Bibele ya King James Version.