“Hi nga tshiki ku endla leswinene, hikuva hi ta tshovela hi nkarhi lowu faneleke loko hi nga karhali.”—Vagalatiya 6:9, Bibele—Matsalwa Yo Kwetsima Ya Misava Leyintshwa.

 “Hi nga tshuki hi karhala ku endla leswinene, hikuva hi ta tshovela enkarhini wa kona, loko hi nga lolohi.”—Vagalatiya 6:9, Bibele Ya Xitsonga.

Leswi Vagalatiya 6:9 Yi Vulaka Swona

 Muapostola Pawulo u khutaze Vakreste leswaku va tshama va ri karhi va endla leswi amukelekaka eka Xikwembu. Loko va endla tano va nga tiyiseka leswaku Xikwembu xi ta va hakela.

 “Hi nga tshiki.” Marito lawa ma nga tlhela ma hundzuluxeriwa ma ku, “hi nga karhali.” Hi ku ya hi Xigriki, ma vula ku nga heli matimba kumbe nkhinkhi. Ku va muapostola Pawulo a tikatsile eka marito lawa, swi vula leswaku na yena a pfa a hela matimba.—Varhoma 7:21-24.

 “Leswinene,” kumbe swa kahle i swilo hinkwaswo leswi Mukreste a faneleke a swi endlela Xikwembu. Leswi swi katsa leswi a swi endlaka ku pfuna Vakrestekulobye ni van’wana.—Vagalatiya 6:10.

 “Hi ta tshovela hi nkarhi lowu faneleke loko hi nga karhali.” Pawulo u tsundzuxa Vakreste leswaku swi teka nkarhi ku va munhu a vona vuyela bya swiendlo swakwe leswinene, tanihi leswi swi tekaka nkarhi ku va murimi a vona leswi a swi byaleke swi kula. Hi ku vulavula hi ntshovelo, Pawulo u fanisa ndzimana leyi ni marito lama vuriweke eka ndzimana 7 lama nge: “Xin’wana ni xin’wana lexi munhu a xi byalaka, u ta tlhela a tshovela xona.” Hi marito man’wana, loko Mukreste a endla leswi amukeriwaka hi Xikwembu, u ta kuma hakelo leyikulu leyi katsaka ni vutomi lebyi nga heriki.—Varhoma 2:6, 7; Vagalatiya 6:8.

Mongo wa Vagalatiya 6:9

 Muapostola Pawulo u tsalele Vakreste va le Galatiya papila leri kwalomu ka va 50-52 C.E. U endle tano leswaku a sirhelela Vakreste eka nkucetelo wa vanhu lava a va tivula Vakreste kambe va ri karhi va lwisana ni tidyondzo ta Yesu. (Vagalatiya 1:6, 7) Vadyondzisi lava va mavunwa a va vula leswaku Vakreste va fanele va landzela Nawu lowu Xikwembu xi wu nyikeke tiko ra khale ra Israyele hi ku tirhisa Muxe. (Vagalatiya 2:15, 16) Pawulo u hlamusele leswaku Nawu wolowo wu hetisise xikongomelo xa wona naswona a swi nga ha bohi leswaku vagandzeri va Xikwembu va wu yingisa.—Varhoma 10:4; Vagalatiya 3:23-25.

 Loko Pawulo a khutaza Vakrestekulobye leswaku va ya emahlweni va “endla leswinene,” a nga vulavuli hi ku yingisa Nawu wa Muxe. Ku ri na sweswo, u va khutaze ku “yingisa nawu wa Kreste,” lowu katsaka swilo hinkwaswo leswi Yesu a swi dyondziseke mayelana ni ku endlela van’wana leswinene.—Vagalatiya 6:2; Matewu 7:12; Yohane 13:34.

 Hlalela vhidiyo leyi yo koma leswaku u vona leswi buku ya Vagalatiya yi vulavulaka ha swona.