“Xo hetelela vamakwerhu, swilo hinkwaswo leswi nga ntiyiso, swilo hinkwaswo leswi nga swa nkoka, swilo hinkwaswo leswi lulameke, swilo hinkwaswo leswi tengeke, swilo hinkwaswo leswi rhandzekaka, swilo hinkwaswo leswi ku vulavuriwaka kahle ha swona, swilo hinkwaswo leswi nga swinene ni swilo hinkwaswo leswi dzunekaka, yanani emahlweni mi anakanyisisa ha swona.”—Vafilipiya 4:8, Bibele—Matsalwa Yo Kwetsima Ya Misava Leyintshwa.

 “Eku heteleleni vamakwerhu, hinkwaswo leswi nga ntiyiso, hinkwaswo leswi chavisekaka, hinkwaswo leswi lulameke, hinkwaswo leswi tengeke, hinkwaswo leswi tsakisaka, hinkwaswo leswi nkhensekaka, ni loko ku ri ni swin’wana leswi nga ni vunene kumbe ku dzuneka, swilo leswi hinkwaswo, tshamani mi ri karhi mi swi anakanya.”—Vafilipiya 4:8, Bibele ya Mahungu Lamanene.

Leswi Vafilipiya 4:8 Yi Vulaka Swona

 Xikwembu xi ni mhaka ni leswi vanhu va swi ehleketaka hikuva mikarhi yo tala swi khumba swiendlo swa vona. (Pisalema 19:14; Marka 7:20-23) Hikwalaho, vanhu lava lavaka ku tsakisa Xikwembu va papalata ku ehleketa hi swilo leswi nga xi tsakisiki ivi va ehleketa hi swilo leswi amukelekaka eka xona.

 Ndzimana leyi yi vulavula hi swilo leswinene swa nhungu leswi Vakreste va faneleke va ya ‘emahlweni va anakanyisisa ha swona,’ leswi vulaka leswaku va fanele va titoloveta ku ehleketa ha swona.

•   “Ntiyiso.” Rito leri ri hlamusela swilo leswinene ni leswi tshembekaka swo fana ni rungula leri kumekaka eRitweni ra Xikwembu ku nga Bibele.—1 Timotiya 6:20.

•   “Leswi nga swa nkoka.” Xiga lexi xi kombetela eka swilo swa nkoka swinene. A hi swilo leswi nga riki swa nkoka, leswi nga pfuniki nchumu kumbe leswi nga tshembekiki. Ku ri na sweswo, swi pfuna Mukreste leswaku a tlhela a tiyimisela ku endla leswinene.—Tito 2:6-8.

•   “Lulameke.” Rito leri ri kombetela eka swikongomelo ni swiendlo leswi fambisanaka ni milawu ya Xikwembu ya leswi lulameke ku ri ni ku titshega hi vutlhari bya munhu lebyi pimiweke.—Swivuriso 3:5, 6; 14:12.

•   “Tengeke.” Rito leri ri hlamusela swilo leswi tengeke leswi munhu a swi ehleketaka ni ku swi endla, ku nga ri eka timhaka ta masangu ntsena kambe eka hinkwaswo.—2 Vakorinto 11:3.

•   “Rhandzekaka.” Rito leri ri kombetela eka swilo leswi tsakisaka, leswi pfuxetaka rirhandzu ku ri ni ku pfuxeta rivengo, ku hlundzuka ni timholovo.—1 Petro 4:8.

•   “Leswi ku vulavuriwaka kahle ha swona.” Xiga lexi xi kombetela eka swilo leswi endlaka munhu a va ni ndhuma leyinene ni leswi vanhu lava xiximaka Xikwembu va nga swi amukelaka.—Swivuriso 22:1.

•   “Leswi nga swinene.” Xiga lexi xi kombetela eka matikhomelo lamanene hi ku ya hi nawu wa Xikwembu. I manene mikarhi hinkwayo.—2 Petro 1:5, 9.

•   “Dzunekaka.” Rito leri ri kombetela eka swilo leswinene leswi xiyekaka ngopfungopfu ematihlweni ya Xikwembu. Leswi swi katsa mitirho leyinene ya Xikwembu leyi vanhu va faneleke va anakanyisisa ha yona.—Pisalema 78:4.

Mongo wa Vafilipiya 4:8

 Loko Muapostola Pawulo a tsala papila leri, leri a ri ya eka Vakreste va le Filipiya a a pfaleriwe endlwini eRhoma. Nilokoswiritano, vahlamuseri van’wana va Bibele va hlamusela papila leri tanihi “papila ra ntsako” hikuva loko Pawulo a ri tsala a twala a tsakile naswona marito ya rona a ma ri ni musa ni rirhandzu.—Vafilipiya 1:3, 4, 7, 8, 18; 3:1; 4:1, 4, 10.

 Pawulo a a va rhandza vamakwavo va le Filipi naswona a lava leswaku va va ni ntsako ni ku rhula loku a a ri na kona. (Vafilipiya 2:17, 18) Kutani eka xiyenge xo hetelela xa papila rakwe, u va khutaze leswaku va va ni ntsako, va anakanyela, va titshega hi Xikwembu hi xikhongelo ni ku anakanyisisa hi swilo leswi a swi ta endla leswaku va va ni ku rhula embilwini ni ku tlhela va va ni ku rhula ni Xikwembu.—Vafilipiya 4:4-9.

 Hlalela vhidiyo leyi yo koma leswaku u vona leswi buku ya Vafilipiya yi vulavulaka ha swona.