“Eka hinkwaswo ndzi ni matimba hikwalaho ka loyi a ndzi nyikaka matimba.”—Vafilipiya 4:13, Bibele—Matsalwa Yo Kwetsima Ya Misava Leyintshwa.

 “Ndzi nga endla hinkwaswo hi matimba ya Loyi a ndzi tiyisaka.”—Vafilipiya 4:13, Bibele ya Mahungu Lamanene.

Leswi Vafilipiya 4:13 Yi Vulaka Swona

 Marito lawa tsariweke hi muapostola Pawulo, ma tiyisekisa vagandzeri va Xikwembu leswaku va ta kuma matimba yo hetisisa ku endla ku rhandza ka Xona.

 Vuhundzuluxeri byin’wana bya Bibele byi vula leswaku Kreste hi yena a nyikeke Pawulo matimba. Hambiswiritano, rito “Kreste” a ri humeleli eka matsalwa ya khale ya Xigriki. Hikwalaho, vuhundzuluxeri byo tala bya manguva lawa byi tirhisa marito lama nge “loyi a ndzi nyikaka matimba” (Bibele—Matsalwa Yo Kwetsima Ya Misava Leyintshwa), “Loyi a ndzi tiyisaka” (Bibele ya Mahungu Lamanene) ni marito lama nge, “loyi a nga xihlovo xa matimba yanga” (New American Bible). Xana Pawulo a a vulavula hi mani?

 Mongo wa leswi Pawulo a swi tsaleke wu kombisa leswaku a a kombetela eka Xikwembu. (Vafilipiya 4:6, 7, 10) Eku sunguleni ka papila rero, Pawulo u tsalele Vafilipiya a ku: “Xikwembu . . . xi mi nyika matimba yo . . . endla swilo hinkwaswo leswi xi swi lavaka.” (Vafilipiya 2:13) Nakambe eka 2 Vakorinto 4:7 u tsale leswaku Xikwembu hi xona xi n’wi nyikeke matimba yo hetisisa vutirheli byakwe. (Ringanisa 2 Timotiya 1:8) Kutani swa twala ku vula leswaku loko Pawulo a ku, “loyi a ndzi nyikaka matimba” a a kombetela eka Xikwembu.

 Xana Pawulo a a vula yini loko a tsala a ku, u ta kuma matimba “eka hinkwaswo”? Swilo hinkwaswo leswi Pawulo a vulavuleke ha swona a ku ri swiyimo hinkwaswo leswi a langutaneke na swona loko a ri karhi a endla ku rhandza ka Xikwembu. Swi nga ri na mhaka leswaku a ri ni swilo leswitsongo kumbe swo tala swo tihanyisa ha swona, a a tshemba leswaku Xikwembu xi ta n’wi hlayisa. Hikwalaho, Pawulo u dyondze ku eneriseka swi nga ri na mhaka leswaku a langutane na yini.—2 Vakorinto 11:23-27; Vafilipiya 4:11.

 Marito ya Pawulo ma nga tiyisekisa vagandzeri va Xikwembu namuntlha. Xikwembu xi ta va nyika matimba lawa va ma lavaka leswaku va kota ku tiyisela miringo ni ku endla ku rhandza ka xona. Xi ta va nyika matimba hi ku tirhisa moya wa xona wo kwetsima, vamakwerhu ni hi Rito ra xona ku nga Bibele.—Luka 11:13; Mitirho 14:21, 22; Vaheveru 4:12.

Mongo wa Vafilipiya 4:13

 Marito lawa i xiphemu xo hetelela xa papila leri Pawulo a ri tsaleleke Vakreste va le Filipiya. U tsale papila leri kwalomu ka 60-61 C.E. loko a khotsiwe ro sungula eRhoma. Ku ringana nkarhi wo karhi, Vakreste va le Filipiya a va nga swi koti ku seketela muapostola Pawulo hi swa ku tihanyisa. Kambe sweswi a va rhumela Pawulo tinyiko leti a ti n’wi pfuna leswaku a kota ku tihanyisa.—Vafilipiya 4:10, 14.

 Pawulo u bumabumele Vakreste va le Filipiya hileswi va n’wi kombeke musa ni ku va tiyisekisa leswaku u na swilo leswi a swi lavaka leswaku a kota ku tihanyisa. (Vafilipiya 4:18) U tlhele a tirhisa nkarhi lowu n’wi pfulekeleke leswaku a va byela xihundla xo hanya tanihi Mukreste lexi nge: Vakreste hinkwavo swi nga ri na mhaka leswaku i swisiwana kumbe va fuwile, va nga kuma ntsako wa xiviri loko va titshega hi mpfuno wa Xikwembu.—Vafilipiya 4:12.