“Kutani eka loyi matimba yakwe ma tirhaka eka hina, loyi a kotaka ku endla swo tala swinene ku tlula leswi hi swi kombelaka kumbe leswi hi swi ehleketaka, vanhu hinkwavo a va n’wi dzunise.”—Vaefesa 3:20, 21, Bibele—Matsalwa Yo Kwetsima Ya Misava Leyintshwa.

 “Eka yena loyi a kotaka ku endla, hi matimba lama tirhaka eka hina, ku tlula ngopfu swinene hinkwaswo leswi hi nga swi kombelaka, kumbe leswi hi nga swi ehleketaka.”—Vaefesa 3:20, 21, Bibele ya Mahungu Lamanene.

Leswi Vaefesa 3:20 Yi Vulaka Swona

 Muapostola Pawulo u hlamusela ndlela leyi a tiyisekaka hayona leswaku Xikwembu xi nga hlamula swikhongelo ni ku hetisisa leswi vagandzeri va xona va swi languteleke hi tindlela leti va nga tiehleketiki. Xi nga hlamula swikhongelo swa vona hi tindlela to hlamarisa ku tlula leti va ti languteleke.

 “Kutani eka loyi matimba yakwe ma tirhaka eka hina.” Loko ndzimana 21 yi vulavula hi “loyi,” yi kombetela eka Yehovha Xikwembu. a Eka yona, Pawulo u tsale a ku: “Vanhu hinkwavo a va n’wi dzunise . . . hikwalaho ka vandlha ni hikwalaho ka Kreste Yesu.” Ku engetela kwalaho, Xikwembu xi nga hi nyika matimba lawa hi ma lavaka leswaku hi endla ku rhandza ka xona.—Vafilipiya 4:13.

 Eka ndzimana 20, muapostola Pawulo u kandziyisa nchumu wo hlawuleka hi vuswikoti bya Yehovha byo pfuna vagandzeri Vakwe. Loko matsalwa man’wana ma hlamusela xiga lexi hundzuluxeriweke xi va “loyi a kotaka,” ma ri: “A hi vuswikoti lebyi Xikwembu xi nga na byona byo endla nchumu wo karhi ntsena kambe i matimba lawa xi nga na wona ku endla nchumu wolowo.” Ku hambana ni munghana loyi a lavaka ku hi pfuna kambe a tsandzekaka mikarhi yin’wana, Yehovha u ni matimba yo endla xin’wana na xin’wana lexi lavekaka leswaku a khathalela vagandzeri vakwe. Hi yena ntsena a nga ni matimba ni vulawuri lebyi nga pimiwangiki.—Esaya 40:26.

 “[Xikwembu xi kota] ku endla swo tala swinene ku tlula leswi hi swi kombelaka kumbe leswi hi swi ehleketaka.” Yehovha a nga endlela vagandzeri vakwe “swo tala swinene” ku tlula leswi va swi languteleke. A nga va pfuna hi tindlela letikulu ku tlula leti va nga ha vonaka onge i tikulu.

 Xiga lexi nge, “ku tlula leswi hi swi kombelaka kumbe leswi hi swi ehleketaka,” xi hi dyondzisa hi tinhlamuselo tin’wana ta ndzimana leyi. Loko Muapostola a vula leswaku “ku tlula leswi hi swi kombelaka kumbe leswi hi swi ehleketaka,” a lava leswaku Vakreste hinkwavo va twisisa leswaku Xikwembu xi nga va pfuna hi tindlela leti tlulaka leti va ti languteleke. Xiphemu xo sungula xa ndzimana 20 eka Bibele Ya Mahungu Lamanene xi ri: “Ku tlula ngopfu swinene hinkwaswo leswi hi nga swi kombelaka, kumbe leswi hi nga swi ehleketaka.” Mikarhi yin’wana, Vakreste va nga titwa onge swiphiqo swa vona i swikulu kumbe swirharhanganile lerova a swi nge koteki ku swi lunghisa. Kumbexana a va swi tivi leswaku va nga khongelela yini. Kambe Yehovha u twisisa hi ndlela leyikulu naswona a nga va pfuna. Hi nkarhi lowu faneleke a nga lunghisa xiphiqo xin’wana na xin’wana naswona a nga endla tano hi tindlela leti a va nga ti ehleketi. (Yobo 42:2; Yeremiya 32:17) Loko va ha rindzile, u va nyike matimba yo tiyisela va tsakile.—Yakobo 1:2, 3.

Mongo wa Vaefesa 3:20

 Buku ya Vaefesa i papila leri Muapostola Pawulo a ri tsaleleke Vakreste lava a va tshama emutini wa le Efesa eAsia Minor lowu namuntlha wu tivekaka tanihi Turkey. Eka papila rakwe, Pawulo u tsale leswi a swi vuleke loko a va khongelela. (Vaefesa 3:14-21) U va khongelele leswaku tanihi Vakreste va tiva rirhandzu ra Kreste leswi vulaka leswaku a va fanele va tekelela ndlela leyi Yesu a ehleketa ni ku endla swilo hayona. Pawulo u gimete xikhongelo xakwe hi ku dzunisa Yehovha hi ku vula marito lama kumekaka eka Vaefesa 3:20, 21.

 Hlalela vhidiyo leyi yo koma leswaku u vona leswi buku ya Vaefesa yi vulavulaka ha swona.