“Letela mufana endleleni leyi a faneleke a famba ha yona; Hambiloko a kurile a nge yi tshiki.”—Swivuriso 22:6, Bibele—Matsalwa Yo Kwetsima Ya Misava Leyintshwa.

 “Komba n’wana wa wena ndlela ya vutomi a ha ri ntsongo, leswaku loko a kurile, a ta ka a nga hambuki eka yona.”—Swivuriso 22:6, Bibele Ya Mahungu Lamanene.

Leswi Swivuriso 22:6 Yi Vulaka Swona

 Loko vatswari lava letelaka vana va vona va va dyondzisa ku rhandza Xikwembu ni ku xixima milawu ya xona, swi ta pfuna vana vutomi bya vona hinkwabyo.

 “Letela mufana endleleni leyi a faneleke a famba ha yona.” Marito lawa ma nga tlhela ma vula “ku kurisa n’wana endleleni leyinene.” Nkarhi ni nkarhi, buku ya Swivuriso yi khutaza vatswari ku dyondzisa vana va vona leswinene ni leswo biha va ha ri vatsongo. (Swivuriso 19:18; 22:15; 29:15) Nilokoswiritano, vatswari lava nga ni rirhandzu va swi xiya leswaku vana va vona, na vona va ni tshunxeko wo tihlawulela. Hikwalaho, ematshan’weni yo va byela ntsena leswi va faneleke va swi endla, va va byela ni swivangelo swo va va swi endla ni ku va pfuna va kula va ri ni vutihlamuleri leswaku va ta kota ku tiendlela swiboho leswinene.—Deteronoma 6:6, 7; Vakolosa 3:21.

 Swidyondzeki swin’wana swa Bibele swi ringanyeta leswaku xiga lexi xi vula ku “letela n’wana hi ku ya hi vuswikoti byakwe,” kumbe hi ku ya hi ku a nga kota ku endla yini. Sweswo swa twala kambe xiga xa Xiheveru eka marito lama nge, “endleleni leyi a faneleke a famba ha yona,” xi nga ha vula ku hanya vutomi lebyinene kumbe lebyi lulameke. Buku ya swivuriso yi boxa tindlela timbirhi leti munhu a nga hanyaka ha tona. Yin’wana i ‘ndlela ya vanhu lavanene,’ ‘ndlela ya vutlhari’ ni ‘ndlela leyinene.’ (Swivuriso 2:20; 4:11; 23:19) Kasi leyin’wana i ‘ndlela ya vanhu lavo biha,’ “ndlela ya xiphukuphuku” ni ‘ndlela leyi hoxeke.’ (Swivuriso 4:14; 12:15; 16:29) Kutani, ndlela leyi n’wana “a faneleke a famba ha yona” i ‘ndlela leyinene,’ ku nga mahanyelo lamanene lama dyondziwaka eRitweni ra Xikwembu ku nga Bibele.—Pisalema 119:105.

 “Hambiloko a kurile a nge yi tshiki.” Loko vatswari va dyondzisa n’wana wa vona milawu ya Xikwembu ya mahanyelo, u ta famba endleleni leyinene vutomi bya yena hinkwabyo. Hambiswiritano, leswi a swi vuli swona leswaku n’wana la leteriweke kahle “a nge yi tshiki” ndlela leyinene ya Xikwembu kumbe ku tlula milawu ya xona. Hi xikombiso, loko munhu a heta nkarhi ni vanhu lava endlaka swo biha, a nga tshika “tindlela to lulama” ivi a endla leswi hoxeke. (Swivuriso 2:12-16; 1 Vakorinto 15:33) Nilokoswiritano, loko vatswari va letela vana va vona ku landzela milawu ya Xikwembu, va va pfulela ndlela leyinene ngopfu yo humelela evuton’wini.—Swivuriso 2:1, 11.

Mongo wa Swivuriso 22:6

 Swivuriso ndzima 22 yi ni swivulwa swo koma leswi nga hi pfunaka ku tirhisa vutlhari bya Xikwembu evuton’wini. Swivulwa sweswo swi kandziyisa nkoka wo va ni vuxaka lebyinene na Yehovha, a lebyi munhu a nga byi kumaka hi ku va a titsongahata, a hanana ni ku gingiriteka. (Swivuriso 22:1, 4, 9, 29) Hi hala tlhelo, tindzimana tin’wana ti kombisa leswaku lava bakanyaka milawu ya Xikwembu ni ku tshikilela swisiwana, va ta langutana ni vuyelo byo biha.—Swivuriso 22:8, 16, 22-27.

 Hambileswi tindzimana to tala eka Swivuriso ndzima 22 ti nga vulavuriki hi ku letela vana, ti kombisa ndlela leyi munhu a nga hanyaka hayona leswaku a amukeriwa hi Xikwembu ni ku kuma ntsako wa xiviri. (Swivuriso 22:17-19) Loko vatswari va letela vana va vona ku hanya hi ndlela yoleyo, va kombisa leswaku va va navelela leswinene.—Vaefesa 6:1-3.

 Hlalela vhidiyo leyi yo koma leswaku u vona nkatsakanyo wa buku ya Swivuriso.