“Hiloko ndzi vona tilo lerintshwa ni misava leyintshwa; hikuva tilo ro sungula ni misava yo sungula a swi nga ha ri kona ni lwandle a ri nga ha ri kona.”—Nhlavutelo 21:1, Bibele—Matsalwa Yo Kwetsima Ya Misava Leyintshwa.

“Kutani ndzi vona tilo lerintswa ni misava leyintshwa, hikuva tilo lero sungula ni misava leyo sungula a swi hundzile, ni lwandle a ri nga ha ri kona.”—Nhlavutelo 21:1, Bibele ya Mahungu Lamanene.

Leswi Nhlavutelo 21:1 Yi Vulaka Swona

Ndzimana leyi yi tirhisa ririmi ro fanekisela ku komba leswaku mfumo wa Xikwembu wa le tilweni wu ta siva mifumo hinkwayo ya vanhu. Mfumo wolowo wu ta herisa vanhu vo homboloka ivi wu fuma vanhu lava tiyimiseleke ku va ehansi ka wona.

Buku ya Nhlavutelo yi tsariwe hi ku tirhisa “swikombiso.” (Nhlavutelo 1:1) Hikwalaho, swa twala ku vula leswaku matilo ni misava leswi ku vulavuriwaka haswona eka ndzimana leyi i swifanekiselo. Ku engetela kwalaho, “matilo lamantshwa” ni “misava leyintshwa” swo fanekisela swi boxiwile eka tindzimana tin’wana ta Bibele. (Esaya 65:17; 66:22; 2 Petro 3:13) Loko hi kambisisa ndzimana leyi ni tin’wana swi ta hi pfuna hi twisisa leswaku ti vulavula hi yini.

“Tilo lerintshwa.” Mikarhi yin’wana Bibele yi tirhisa rito “tilo” ku kombetela eka vulawuri kumbe mifumo. Hikwalaho, ndzimana yin’wana loko yi hlamusela vuprofeta lebyi yi vula leswaku “matilo i xikombiso xa vulawuri kumbe mfumo”. a Eka Nhlavutelo 21:1, “tilo lerintshwa” ri kombetela eka mfumo wa Xikwembu. Mfumo lowu, lowu nkarhi wun’wana wu vitaniwaka “Mfumo wa matilo”, ku vulavuriwa hi wona eka Nhlavutelo ni le ka tibuku tin’wana ta Bibele. (Matewu 4:17; Mitirho 19:8; 2 Timotiya 4:18; Nhlavutelo 1:9; 5:10; 11:15; 12:10) Mfumo wa Xikwembu, lowu Hosi ya wona ku nga Yesu, wu ta siva “tilo ro sungula,” ku nga mifumo ya vanhu leyi nga hetisekangiki.—Daniyele 2:44; Luka 1:31-33; Nhlavutelo 19:11-18.

“Misava leyintshwa.” Bibele yi vula leswaku misava yi nge pfuki hi herisiwile kumbe yi siviwa hi swin’wana. (Pisalema 104:5; Eklesiasta 1:4) Kutani i yini misava yo fanekisela? Mikarhi yo tala Bibele yi tirhisa rito “misava” ku kombetela eka vanhu. (Genesa 11:1; 1 Tikronika 16:31; Pisalema 66:4; 96:1) Hikwalaho, “misava yo sungula” yi kombetela eka vanhu lava nga ta tiyimisela ku va ehansi ka mfumo wa Xikwembu wa le tilweni. “Misava yo sungula” kumbe vanhu lava kanetaka mfumo wa Xikwembu va ta herisiwa.

“Lwandle a ri nga ha ri kona.” Loko Nhlavutelo 21:1 yi ya emahlweni, yi vulavula hi “lwandle” ro fanekisela. Mikarhi yo tala lwandle ra kariha ni ku va ni xidzedze kutani swa fanela ku va ri fanisiwa ni vanhu lava vangaka swiphiqo hileswi va nga laviki ku tiva Xikwembu kumbe ku hanya hi milawu ya xona. (Esaya 17:12, 13; 57:20; Nhlavutelo 17:1, 15) Na vona va ta herisiwa. Pisalema 37:10 yi ri: “Ku sele nkarhinyana leswaku lavo homboloka va herisiwa; u ta languta laha a va ri kona, kambe va ta va va nga ha ri kona.”

Mongo wa Nhlavutelo 21:1

Buku ya Nhlavutelo yi profete leswi a swi ta endleka “esikwini ra Hosi.” (Nhlavutelo 1:10) Hi ku ya hi vuprofeta bya le Bibeleni, siku leri ri sungule hi 1914 loko Yesu a va Hosi ya Mfumo wa Xikwembu. b Kambe a a nga ta fuma misava hi nkarhi wolowo. Kahlekahle, vuprofeta byin’wana byi vula leswaku swiyimo a swi ta ya swi nyanya ku biha loko ‘siku ra Hosi’ ri sungula. Nkarhi wolowo wu vuriwa ‘masiku yo hetelela.’ (2 Timotiya 3:1-5, 13; Matewu 24:3,  7; Nhlavutelo 6:1-8; 12:12) Loko masiku wolawo yo homboloka ma hela, mfumo wa Xikwembu wu ta herisa matilo ni misava yo fanekisela ivi wu tisa ku rhula ni vun’we. Vanhu lava nga ta va va ri ehansi ka mfumo wolowo, ku nga “Misava leyintshwa,” va ta tiphina hi vutomi ni hi rihanyo lerinene —Nhlavutelo 21:3, 4.

Hlalela vhidiyo leyi yo koma leswaku u vona leswi buku ya Nhlavutelo yi vulavulaka ha swona.