“Mi ta amukela matimba loko moya lowo kwetsima wu fika ehenhla ka n’wina, naswona mi ta va timbhoni ta mina eYerusalema, etikweni hinkwaro ra Yudiya ni le Samariya ni ku ya fika emakumu ka misava.”—Mitirho 1:8, Bibele—Matsalwa Yo Kwetsima Ya Misava Leyintshwa.

 “Mi ta nyikiwa matimba, siku Moya lowo Kwetsima wu taka eka n’wina; kutani mi ta va timbhoni ta mina kwala Yerusalema, ni le tikweni hinkwaro ra Yudiya, ni ra Samariya, ni ku ya fika emakun’wini ya misava.”—Mitirho 1:8, Bibele Ya Xitsonga.

Leswi Mitirho 1:8 Yi Vulaka Swona

 Yesu u tshembisa valandzeri vakwe leswaku va ta kuma matimba ya moya wo kwetsima wa Xikwembu leswaku va endla ntirho wa vona ku ya fika emakumu ka misava.

 “Mi ta amukela matimba loko moya lowo kwetsima wu fika ehenhla ka n’wina.” Yesu u phindha xitshembiso lexi a xi endleke eka vadyondzisiwa vakwe xa leswaku a va ta kuma mpfuno wa moya wo kwetsima wa Xikwembu a loko a tlhelele etilweni. (Yohane 14:16, 26) Loko se ku hundze malembe ya khume Yesu a tlhandlukele etilweni hi 33 C.E., valandzeri vakwe va kume moya wo kwetsima lowu a va tshembisiwe wona. (Mitirho 2:1-4) Moya wo kwetsima wu endle leswaku va kota ku vulavula hi tindzimi to hambanahambana, va endla masingita ni ku kota ku chumayela hi xivindzi mayelana ni ku va ni ripfumelo eka Yesu.—Mitirho 3:1-8; 4:33; 6:8-10; 14:3, 8-10.

 “Mi ta va timbhoni ta mina.” Rito leri hundzuluxeriweke ri va “mbhoni,” ri vula “munhu loyi a nyikelaka vumbhoni” kumbe “loyi a tiyisekisaka swo karhi” leswi a swi voneke kumbe leswi a swi tokoteke. Leswi vaapostola a va hanya na Yesu, va kote ku nyikela vumbhoni bya leswi endlekeke hi nkarhi wa ntirho wakwe ku katsa ni hi rifu rakwe ni ku pfuxiwa kakwe. (Mitirho 2:32; 3:15; 5:32; 10:39) Vumbhoni byebyo lebyi a byi lo tlangandla, byi tiyisekise vo tala leswaku Yesu a ku ri Kreste ku nga Mesiya loyi a tshembisiweke. (Mitirho 2:32-36, 41) Lava tshembeke vaapostola, va ve timbhoni ta Yesu ivi na vona va chumayela hi leswi vutomi bya yena, rifu rakwe ni ku pfuxiwa kakwe swi vulaka swona.—Mitirho 17:2, 3; 18:5.

 “Ku ya fika emakumu ka misava.” Xiga lexi xi nga tlhela xi hundzuluxeriwa xi va, “ku ya fika etindhawini ta le kule swinene ta misava” kumbe “ematikweni man’wana.” Marito ya Yesu ma kombisa matshalatshala lawa valandzeri vakwe a va ta ma endla leswaku va va timbhoni ta yena. A va ta ya ekule swinene ku hundza eYudiya ni le Samariya leswaku va ya chumayela hileswi va swi pfumelaka. Kahlekahle, a va ta chumayela ndhawu leyikulu ku tlula Yesu ni ku fikelela vanhu vo tala. (Matewu 28:19; Yohane 14:12) Ku nga si hela malembe ya 30 Yesu a vule marito lawa, muapostola Pawulo u tsale leswaku mahungu lamanene mayelana na Yesu a ma ‘chumayeriwile eka vanhu hinkwavo’ hambi ku ri etindhawini ta le kule to tanihi le Rhoma, eParthia (ku nga dzongavuxa bya lwandle ra Khaspi) ni le Afrika N’walungu.—Vakolosa 1:23; Mitirho 2:5, 9-11.

Mongo wa Mitirho 1:8

 Buku ya Mitirho yi yisa emahlweni laha evhangeli ya Luka yi nga gimeta kona. (Luka 24:44-49; Mitirho 1:4, 5) Mutsari wa yona ku nga mudyondzisiwa Luka, u sungula mhaka yakwe hi ku hlamusela ndlela leyi Yesu a humeleleke hayona eka vadyondzisiwa vakwe endzhaku ka loko a pfuxiwile. (Mitirho 1:1-3) Kutani u tlhela a hlamusela ndlela leyi vandlha ra Vukreste ri sunguriweke hayona ni ndlela leyi ri kuleke hayona ku sukela hi 33 C.E. ku fikela kwalomu ka 61 C.E.—Mitirho 11:26.

 Mongo wa Mitirho 1:8 wu kombisa leswaku valandzeri va Yesu a va tivutisa loko Yesu a ta sungula ku fuma tanihi Hosi ya Mfumo wa Xikwembu hi nkarhi wa vona. (Mitirho 1:8, 6) Loko a va hlamula, Yesu u va byele leswaku a va fanelanga va vilela ngopfu hileswaku Mfumo wu ta simekiwa rini. (Mitirho 1:7) Ku ri na sweswo, a va fanele va dzika ngopfu eka ku nyikela vumbhoni hi Yesu “ku ya fika emakumu ka misava.” (Mitirho 1:8) Namuntlha, Vakreste va landzela xikombiso xexo hi ku chumayela mahungu lamanene ya Mfumo wa Xikwembu hi ku hiseka. —Matewu 24:14.

 Hlalela vhidiyo leyi yo koma leswaku u vona nkatsakanyo wa buku ya Mitirho.