“Wena munhu, u ku byerile leswi nga swinene. Xana Yehovha u lava yini eka wena? U lava u kombisa vululami, u tshembeka, U tlhela u titsongahata eka Xikwembu xa wena!”—Mikiya 6:8, Bibele—Matsalwa Yo Kwetsima Ya Misava Leyintshwa.

 “N’wina vanhu, mi byeriwile leswinene leswi HOSI Xikwembu xi lavaka leswaku mi endla swona: I ku endla leswi lulameke, mi tshembeka minkarhi hinkwayo, mi hanya hi ku titsongahata emahlweni ka Xikwembu xa n’wina.”—Mikiya 6:8, Bibele ya Mahungu Lamanene.

Leswi Mikiya 6:8 Yi Vulaka Swona

 Muprofeta Mikiya u vule leswaku a swi tiki ku va vanhu va tsakisa Yehovha a Xikwembu. (1 Yohane 5:3) Leswi Xikwembu xi swi languteleke eka hina swi katsakanyiwe eka ndzimana leyi hi tinhla tinharhu ta nkoka. Tinhla timbirhi to sungula ti vulavula hi ndlela leyi munhu a faneleke a khoma van’wana hayona kasi ya vunharhu yi vulavula hi vuxaka bya yena na Xikwembu.

 “Kombisa vululami.” Xikwembu xi lava leswaku vagandzeri va xona va endla swilo hi ndlela leyi lulameke. Leswi swi katsa ku ehleketa ni ku endla swilo hi ndlela leyi fambisanaka ni milawu ya Xikwembu ya leswinene ni leswo biha. (Deteronoma 32:4) Hi xikombiso, vanhu lava hanyaka hi milawu ya Xikwembu va endla hinkwaswo leswi va nga swi kotaka leswaku va khoma vanhu hi ndlela leyinene ni leyi nga riki na xihlawuhlawu ku nga khathariseki leswaku va huma kwihi, i va rixaka rihi kumbe xiyimo xa vona xa timali xi njhani.—Levhitika 19:15; Esaya 1:17; Vaheveru 13:18.

 “Tshembeka.” Xiga lexi xi nga tlhela xi vula ku “tshembeka.” (Mikiya 6:8) Eka ririmi ro sungula ra Xiheveru, rito ku “tshembeka” a ro vula ntsena ku tshembeka eka vuxaka kambe ri nga tlhela ri vula ku kombisa musa ni tintswalo eka munhu un’wana ni ku n’wi endlela swo tlula leswi languteriweke. Xikwembu xi lava leswaku lava lavaka ku xi tsakisa va nga kombisi tintswalo ni musa ntsena kambe va tlhela va tlangela ni ku rhandza vumunhu lebyi. Leswi swi vula leswaku vagandzeri va xona va fanele va tsaka loko va pfuna van’wana ngopfungopfu lava lavaka mpfuno. Phela ku nyika swi tisa ntsako.—Mitirho 20:35.

 “U Titsongahata eka Xikwembu xa wena!” EBibeleni, xiga ‘ku famba’ xi nga vula “ku tekelela swiendlo swo karhi.” Munhu a nga famba ni Xikwembu hi ku hanya hi ndlela leyi xi tsakisaka. Nowa i xikombiso lexinene. U ‘fambe ni Xikwembu xa ntiyiso’ hikuva a lulamile emahlweni ka Xikwembu naswona “a nga ri na xisolo exikarhi ka vanhu lava a a hanya na vona.” (Genesa 6:9) Namuntlha hi “famba ni Xikwembu” hi ku hanya hi ku pfumelelana ni tidyondzo leti nga eRitweni ra xona ku nga Bibele. Leswi swi lava ku hi pfumela leswaku ku na leswi hi nga koteki ku swi endla ni ku xiya leswaku hi fanele hi titshega hi Xikwembu eka hinkwaswo.—Yohane 17:3; Mitirho 17:28; Nhlavutelo 4:11.

Mongo wa Mikiya 6:8

 Mikiya a ri muprofeta eIsrayele wa khale ku sukela hi 777-717 B.C.E. Hi nkarhi wolowo a ku tale swikwembu swa mavunwa etikweni, vukungundzwana ni ku xanisiwa. (Mikiya 1:7; 3:1-3, 9-11; 6:10-12) Vaisrayele a va swi ba hi makatla leswi Xikwembu a xi swi lava ku nga leswi a swi ri eka Nawu lowu a wu nyikiwe Muxe, lowu vuriwaka Nawu wa Muxe. Hi nkarhi wolowo vo tala a va ehleketa leswaku va nga tsakeriwa hi Xikwembu loko va endla swa vukhongeri ni ku nyikela magandzelo.—Swivuriso 21:3; Hosiya 6:6; Mikiya 6:6, 7.

 Madzana ya malembe ku hundze nkarhi wa Mikiya, Yesu u vule leswaku Tata wakwe u rhandza vanhu lava kombisaka rirhandzu, vululami ni ntwelavusiwana kambe a nga va rhandzi lava endlaka onge va n’wi gandzela kambe swi nga humi embilwini. (Matewu 9:13; 22:37-39; 23:23) Marito ya Yesu ma hi pfuna hi twisisa leswi Xikwembu xi swi languteleke eka vagandzeri va xona namuntlha.

 Hlalela vhidiyo leyi yo koma leswaku u vona leswi buku ya Mikiya yi vulavulaka ha swona.