“Tanani eka mina, n’wina hinkwenu lava karhaleke ni lava tikeriwaka, ndzi ta mi phyuphyisa. Rhwalani joko ra mina mi tlhela mi dyondza eka mina, hikuva ndzi ni musa naswona ndza titsongahata, kutani mi ta phyuphyisiwa. Hikuva joko ra mina ra olova ni ndzhwalo wa mina wa vevuka.”—Matewu 11:28-30, Bibele—Matsalwa Yo Kwetsima Ya Misava Leyintshwa.

 “Tanani ka mina, n’wina hinkwenu lava karheleke, ni lava tikeriwaka, ndzi ta mi wisisa. Rhwalani joko ra mina, mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’wina yi ta kuma ku wisa; hikuva joko ra mina ra olova, ni ndzhwalo wa mina wa vevuka.”—Matewu 11:28-30, Bibele ya Mahungu Lamanene.

Leswi Matewu 11:28-30 Yi Vulaka Swona

 Hi musa Yesu u rhambe vayingiseri vakwe leswaku va ta eka yena. U va tiyisekise leswaku loko va dyondza eka yena, va ta phyuphya.

 “Tanani eka mina, n’wina hinkwenu lava karhaleke ni lava tikeriwaka.” Lava Yesu a va nyikeke xirhambo lexi a va ri ni “mindzhwalo yo tika” yo fana ni milawu ni mindhavuko ya vanhu leyi varhangeri va vukhongeri a va va sindzisa ku yi landzela. (Matewu 23:4; Marka 7:7) Vanhu vo tala a va vilela ni ku tikeriwa hileswi a va tirha nkarhi wo leha ni hi matimba leswaku va ta ti hanyisa.

 “Ndzi ta mi phyuphyisa.” Yesu u tshembise ku phyuphyisa lava a va ta amukela xirhambo xakwe. U endle tano hi ku va pfuna va twisisa leswi Xikwembu xi swi lavaka eka vona. (Matewu 7:24, 25) Ku tiva sweswo ku va tshunxe eka tidyondzo ta mavunwa ni le ka mindhavuko ya vukhongeri leyi a va sindzisiwa ku yi landzela. (Yohane 8:31, 32) Hambileswi ku dyondza ni ku tirhisa leswi Yesu a swi dyondziseke a swi lava matshalatshala, ku endla sweswo a swi phyuphyisa.

 “Rhwalani joko ra mina mi tlhela mi dyondza eka mina.” Emikarhini ya Bibele vanhu a va tirhisa joko ku nga mhandzi leyi a va yi veka emakatleni leswaku va rhwala mindzhwalo yo tika. Hikwalaho, rito ‘joko’ a va ri teka onge ri hlamusela leswaku i ku va ehansi ka vulawuri ni nkongomiso wa munhu un’wana. (Levhitika 26:13; Esaya 14:25; Yeremiya 28:4) Xiga lexi nge “mi dyondza eka mina” xi nga tlhela xi vula “vanani vadyondzisiwa va mina.” Yesu a khutaza vayingiseri vakwe leswaku va va vadyondzisiwa va yena hi ku n’wi landzela ni ku tekelela xikombiso xakwe.—Yohane 13:13-15; 1 Petro 2:21.

 “Mi ta phyuphyisiwa.” Yesu a nga va byelanga leswaku swiphiqo hinkwaswo a swi ta hela hi ku copeta ka tihlo. Hambiswiritano, u chavelele vayingiseri vakwe ni ku va nyika ntshembo. (Matewu 6:25-32; 10:29-31) Lava va veke vadyondzisiwa vakwe ni ku amukela tidyondzo takwe, va kume leswaku ku tirhela Xikwembu a swi tiki kambe swi endla va eneriseka.—1 Yohane 5:3.

 “Hikuva joko ra mina ra olova ni ndzhwalo wa mina wa vevuka.” Ku hambana ni varhangeri va vukhongeri va le mikarhini yakwe, Yesu a titsongahata naswona a ri na musa. (Yohane 7:47-49) A nga ri na tihanyi naswona a nga tshikileli van’wana. Ku ri na sweswo a ri na musa naswona a ngheneka. A nga langutelanga swo tala eka valandzeri vakwe. (Matewu 7:12; Marka 6:34; Luka 9:11) U tlhele a va pfuna ku vona ndlela leyi va nga vuyeriwaka hayona eka tintswalo ta Xikwembu ni ku tiphina hi ku phyuphyisiwa loku hi ku kumaka hikwalaho ka ripfalo leri baseke. (Matewu 5:23, 24; 6:14) Vumunhu bya Yesu lebyinene a byi kokelanga vanhu eka yena ntsena kambe byi endle leswaku va amukela joko rakwe ni ku va vadyondzisiwa vakwe.

Mongo wa Matewu 11:28-30

 Yesu u vule marito lama kumekaka eka Matewu 11:28-30 loko a ri etsimeni ro chumayela eGaleliya hi lembe ra 31 C.E. Muapostola Matewu hi yena ntsena a nga tsala xirhambo xa Yesu eka vatsari hinkwavo va Tievhangeli. Leswi a nga tshama a va muhakerisi wa swibalo ni leswi a ri Muyuda, Matewu a yi tiva kahle ndlela leyi vanhu a va tshikileriwa hayona ku nga ri hi swibalo swa Varhoma ntsena kambe ni hi vukanganyisi bya vukhongeri bya Xiyuda. Handle ko kanakana, u khutazekile loko a vona Yesu a tirhisa vulawuri lebyi a nyikiweke byona hi Tata wakwe Yehovha a leswaku a rhamba lava titsongahataka ni lava tshikileriweke leswaku va ta eka yena.—Matewu 11:25-27.

 Evhangeli ya Matewu yi boxa vumunhu lebyinene lebyi Yesu a byi kombiseke tanihi Mesiya loyi a tshembisiweke ni mufumi eka Mfumo wa Xikwembu enkarhini lowu taka.—Matewu 1:20-23; Esaya 11:1-5.

 Hlalela vhidiyo leyi yo koma leswaku u vona leswi buku ya Matewu yi vulavulaka ha swona.