“Hi yona mhaka leyi ndzi nge, swilo hinkwaswo leswi mi swi khongelelaka ni ku swi kombela, vanani ni ripfumelo ra leswaku se mi swi kumile, kutani mi ta nyikiwa swona.”—Marka 11:24, Bibele—Matsalwa Yo Kwetsima Ya Misava Leyintshwa.

 “Hikwalaho ndzi ri ka n’wina: Hinkwaswo leswi mi swi kombelaka hi ku khongela, pfumelani leswaku mi nyikiwile swona, kutani mi ta endleriwa swona.”—Marka 11:24, Bibele ya Mahungu Lamanene.

Leswi Marka 11:24 Yi Vulaka Swona

 Marito lawa Yesu a ma vuleke, ma kombisa leswaku valandzeri vakwe va fanele va va ni ripfumelo leri tiyeke eka matimba ya xikhongelo. U va tiyisekisa leswaku Xikwembu a xo twa ntsena swikhongelo swa vona kambe xi tlhela xi swi hlamula. Munhu loyi a khongelelaka leswi fambisanaka ni ku rhandza ka Xikwembu swi huma embilwini, a nga tiyiseka leswaku leswi a swi khongelelaka swi ta endleka. Swi fana ni loko xikhongelo se xi hlamuriwile.

 Yesu u kandziyisa nkoka wo khongela hi ri ni ripfumelo. U hlamusela leswaku loyi a khongelaka u fanele “a nga kanakani embilwini yakwe” kambe a va ni “ripfumelo ra leswaku leswi a swi vulaka swi ta humelela.” (Marka 11:23) Hikwalahokayini? Hikuva munhu wo tano a nga fanelanga a ‘langutela ku amukela nchumu eka Yehovha.’ a—Yakobo 1:5-8.

 Munhu loyi a nga ni ripfumelo u khongela nkarhi na nkarhi. (Luka 11:9, 10; Varhoma 12:12) Loko a endla tano u kombisa leswaku wa swi lava leswi a swi kombelaka naswona u tshemba leswaku Xikwembu xi ta hlamula xikhongelo xakwe. Wa swi twisisa leswaku Xikwembu xi nga hlamula xikhongelo xakwe hi ndlela leyi a nga yi langutelangiki ni hi nkarhi lowu hambaneke ni lowu a wu languteleke.—Vaefesa 3:20; Vaheveru 11:6.

 Hambiswiritano, marito ya Yesu a ma vuli swona leswaku munhu un’wana ni un’wana a nga langutela ku kuma hinkwaswo leswi a swi kombelaka hi xikhongelo eka Xikwembu. Yesu a vulavula ni valandzeri vakwe, ku nga vavanuna va ripfumelo lava a va ringeta ku endla hinkwaswo leswi va nga swi kotaka leswaku va gandzela Yehovha Xikwembu hi ndlela leyi amukelekaka. Bibele yi vula leswaku Yehovha u yingisela swikhongelo leswi fambisanaka ni ku rhandza kakwe ntsena. (1 Yohane 5:14) A nga swi yingisi swikhongelo swa vanhu lava nga tiyimiselangiki ku landzela milawu yakwe kumbe lava endlaka swilo swo biha va nga tiyimiselanga ku hundzuka. (Esaya 1:15; Mikiya 3:4; Yohane 9:31) Leswaku u dyondza leswi engetelekeke hi swikhongelo leswi Xikwembu xi swi yingiselaka, hlalela vhidiyo leyi yo koma.

Mongo Wa Marka 11:24

 Eka masiku yo hetelela Yesu a ri laha misaveni, u vulavule ni vadyondzisiwa vakwe hi nkoka wo kombisa ripfumelo eka Xikwembu. U kombise nkoka wa dyondzo leyi hi ku tirhisa xifaniso. Loko a ri endleleni yo ya eYerusalema, u vone murhi wa nkuwa lowu a wu ri ni matluka nkarhi wa wona wu nga si fika. Hambiswiritano, a wu nga ri na mihandzu kutani Yesu u wu rhukanile. (Marka 11:12-14) Ndlela leyi murhi lowu a wu kanganyisa hayona, a yi fana ni ndlela leyi tiko ra Israyele wa khale a ri vula leswaku ri gandzela Xikwembu kambe ri nga ri na ripfumelo. (Matewu 21:43) Endzhaku ka sweswo, murhi wa nkuwa a wu omile naswona sweswo a swi kombisa leswi a swi ta endleka eka Vaisrayele lava a va nga ri na ripfumelo.—Marka 11:19-21.

 Ku hambana ni sweswo, Yesu a tiyiseka leswaku valandzeri vakwe a va ta va ni ripfumelo leri lavekaka leswaku va hlula miringo ni ku fikelela swilo swo hlamarisa. (Marka 11:22, 23) Xitsundzuxo xa Yesu mayelana ni xikhongelo a xi fike hi nkarhi eka valandzeri vakwe hikuva ripfumelo ra vona a ri ta ringiwa ku nga ri khale. A va fanele va tiyiselela rifu ra Yesu ni ku langutana ni nkaneto lowukulu eka ntirho wa vona wo chumayela. (Luka 24:17-20; Mitirho 5:17, 18, 40) Ninamuntlha valandzeri va Yesu va nga swi kota ku hlula miringo loko va va ni ripfumelo eka Xikwembu ni le ka matimba ya xikhongelo.—Yakobo 2:26.

 Hlalela vhidiyo leyi yo koma leswaku u vona leswi buku ya Marka yi vulavulaka ha swona.