“Dzunisani Xikwembu lexi nga ematilweni, naswona lava xi va rhandzaka emisaveni va ta va ni ku rhula.”—Luka 2:14, Bibele—Matsalwa Yo Kwetsima Ya Misava Leyintshwa.

 “Ku dzuneka a ku ve eka Xikwembu ematilweni ya le henhlahenhla, ni ku rhula a ku ve emisaveni eka vanhu lava xi va tsakelaka.”—Luka 2:14, Bibele Ya Mahungu Lamanene.

Leswi Luka 2:14 Yi Vulaka Swona

 Marito lawa ya ku dzunisa lama vuriweke hi tintsumi hi nkarhi lowu Yesu a velekiweke hawona, ma kombisa leswaku lava nga ni ripfumelo eka yena va nga tiphina hi ku amukeriwa hi Xikwembu ni ku va ni ku rhula.

 “Dzunisani Xikwembu lexi nga ematilweni.” Tintsumi ti tirhise xiga lexi ku kombisa leswaku Xikwembu xi faneriwa hi ku dzunisiwa. Nakambe xi tlhela xi kombisa leswaku ku velekiwa ka Yesu ni vutirheli byakwe a swi ta endla leswaku Yehovha a Xikwembu a dzunisiwa. Hi xikombiso, Yesu a yisa ku dzuneka eka Xikwembu loko a dyondzisa, u te: “Leswi ndzi swi dyondzisaka a swi humi eka mina, kambe swi huma eka loyi a ndzi rhumeke.” (Yohane 7:16-18) Loko Yesu a endla masingita, mikarhi yo tala vahlaleri a va “sungula ku dzunisa Xikwembu.” (Luka 5:18, 24-26; Yohane 5:19) Hambi ku ri rifu ra Yesu ri endle leswaku Xikwembu xi dzunisiwa. Ri endle swi koteka leswaku Xikwembu xi hetisisa xikongomelo xa xona xo tata misava hi vanhu vo lulama ni lava nga ni ku rhula.—Genesa 1:28.

 “Emisaveni va ta va ni ku rhula.” Ku rhula loku ku katsa swo tala ku tlula ku kayivela ka nyimpi. I ku rhula ka le mbilwini loku munhu a vaka na kona loko ntsena a amukeriwa hi Xikwembu. Hi khensa Yesu hileswi a endleke swi koteka leswaku hi va ni vuxaka lebyinene ni Xikwembu. (Yakobo 4:8) Leswi a nga Hosi ya Mfumo wa Xikwembu, Yesu u ta tisa ku rhula loku nga heriki emisaveni hinkwayo.—Pisalema 37:11; Luka 1:32, 33.

  “Lava xi va rhandzaka.” Xiga lexi xi kombetela eka vanhu lava Xikwembu xi va amukelaka hileswi va nga ni ripfumelo eka xona ni le ka loyi xi n’wi rhumeke, ku nga Yesu. A xi hlamuseli swona leswaku Xikwembu xi amukela vanhu hinkwavo swi nga ri na mhaka leswaku va hanya njhani naswona a xi kombeteli eka vanhu lava nga ha endlaka leswinene. Vuhundzuluxeri byin’wana bya Bibele, byo tanihi King James Version, loko byi hlamusela xiga lexi byi ri i “vanhu lava kwetsimaka.” Hambiswiritano, matsalwa yo tala ya khale ya Xigriki ma seketela leswi Bibele Ya Matsalwa Yo Kwetsima Ya Misava Leyintshwa ni vuhundzuluxeri byin’wana byi swi vulaka mayelana ni ku rhula loku vanhu lava amukelekaka eka Xikwembu va nga na kona.—Vona “ Luka 2:14 Eka Vuhundzuluxeri Byin’wana”

Mongo wa Luka 2:14

 Luka ndzima 2 yi hlamusela vutomi bya Yesu loko a ha ri ntsongo. Endzhakunyana ka loko a velekiwile, ku humelele ntsumi eka varisi lava “a va tshama ehandle ka muti, va rindza mintlhambi ya vona nivusiku.” b (Luka 2:4-8) Ntsumi yoleyo yi byele varisi “mahungu lamanene lama nga ta tisa ntsako lowukulu” yi ku: “Namuntlha mi velekeriwe muponisi emutini wa Davhida, loyi a nga Kreste Hosi.” (Luka 2:9-11) Varisi va tlhele va byeriwa laha a va ta n’wi kuma kona n’wana yoloye, ivi endzhaku va vona tintsumi to tala ti ri karhi ti dzunisa Xikwembu. Loko va fika eBetlehema, va kume Mariya na Yosefa va ri na Yesu loyi a ha ri ricece. (Luka 2:12-16) Endzhaku ka loko va va byele swilo swo hlamarisa leswi a va ha ku swi vona, va tlhelele eka mitlhambi ya vona, “va ri karhi va vangamisa ni ku dzunisa Xikwembu hikwalaho ka hinkwaswo leswi va swi tweke ni ku swi vona.” (Luka 2:17-20)

 Luka 2:14 Eka Vuhundzuluxeri Byin’wana

 “Ku kwetsima a ku ve eka Xikwembu ematilweni ya le henhla, ku tsaka a ku ve emisaveni eka vanhu lava kwetsimaka.”—Luka 2:14, Bibele Ya Xitsonga.

 “Ku vangama a ku ve ehenhla-henhla eka Xikwembu, ni le henhla ka misava ku va ni ku rhula exikarhi ka vanhu lava amukelekaka.”—Luka 2:14, Vuhundzuluxeri Bya Misava Leyintshwa Bya Matsalwa Yo Kwetsima.

 “Ku dzuneka a ku ve eka Xikwembu ematilweni ya le henhlahenhla, ni ku rhula a ku ve emisaveni eka vanhu lava xi va tsakelaka.”—Luka 2:14, Bibele Ya Mahungu Lamanene.

 Hlalela vhidiyo leyi yo koma leswaku u vona nkatsakanyo wa buku ya Luka.