“Hikuva Xikwembu a xi tsandziwi hi nchumu.”—Luka 1:37, Bibele—Matsalwa Yo Kwetsima Ya Misava Leyintshwa.

 “Hikuva a ku na xilo na xin’we lexi hlulaka Xikwembu.”—Luka 1:37, Bibele ya Mahungu Lamanene.

Leswi Luka 1:37 Yi Vulaka Swona

 Xikwembu xa Matimba Hinkwawo xi nga endla swilo leswi vanhu va vonaka onge a swi koteki ku swi endla. A ku na nchumu lexi nga xi sivelaka ku hetisisa leswi xi swi hlambanyeke kumbe leswi xi swi tshembiseke.

 Rito leri hundzuluxeriweke ri va “xihlambanyo” ri vula “rito” kumbe “leswi vuriweke” hi Xikwembu. Ri nga tlhela ri kombetela eka vuyelo bya leswi Yehovha a Xikwembu a swi hlambanyeke. Leswi Xikwembu xi swi vulaka swa hetiseka, hikwalaho Luka 1:37 yi nga tlhela yi hundzuluxeriwa yi ku: “Switshembiso swa Xikwembu swa hetiseka mikarhi hinkwayo” kumbe “A ku na nchumu lowu nga tsandzaka Xikwembu.” Marito lawa lama hundzuluxeriweke ku suka eka Xigriki, ma ni ntiyiso lowu fanaka wa leswaku: Leswi Xikwembu xi swi tshembiseke kumbe leswi xi swi hlambanyeke, swi ta hetiseka hikuva a xi tsandziwi hi nchumu.—Esaya 55:10, 11.

 Marito lama fanaka lama vulavulaka hi switshembiso swa Xikwembu, ma humelela ko tala eBibeleni. Hi xikombiso, Yehovha u rhumele ntsumi yakwe ku profeta leswaku nsati wa Abrahama loyi a nga ri na vana ku nga Sara, a a ta tika hambileswi a dyuharile. U tlhele a ku: “Xana xi kona lexi nga tsandzaka Yehovha?” (Genesa 18:13, 14) Loko Yobo loyi a a ri nandza wo tshembeka wa Xikwembu a anakanyisise hi ntumbuluko wa xona, u te: “A wu tsandziwi hi nchumu.” (Yobo 42:2) Kasi loko valandzeri va Yesu va vilerisiwa hileswaku a va nge swi koti ku hanya hi milawu ya Xikwembu leswaku va ponisiwa, Yesu u va tsundzuxe leswaku “eka Xikwembu swilo hinkwaswo swa koteka.”—Matewu 19:25, 26. b

Mongo wa Luka 1:37

 Ntsumi leyi vuriwaka Gabriyele yi byele wanhwana wa Muyuda la vuriwaka Mariya marito lama kumekaka eka Luka 1:37. Gabriyele u byele wanhwana yoloye leswaku a a ta veleka “N’wana wa La Nga Le Henhlahenhla” naswona a fanele “n’wi thya vito ra Yesu.” N’wana yoloye a a ta va Hosi ya Mfumo wa Xikwembu naswona a ta fuma hilaha ku nga heriki.—Luka 1:26-33; Nhlavutelo 11:15.

 Mariya u vutisile leswaku sweswo a swi ta endlekisa ku yini hikuva a a nga ri na nuna naswona ‘a nga si tshama a etlela ni wanuna.’ (Luka 1:34, 35) Loko Gabriyele a n’wi hlamula, u n’wi byele leswaku Xikwembu a xi ta tirhisa moya wa xona wo kwetsima kumbe matimba ya xona lama xi ma tirhisaka. Hi nkarhi wolowo, Yesu a a ri ntsumi ya Xikwembu etilweni. Hikwalaho, Yehovha u tirhise moya wakwe wo kwetsima ku hundzisela vutomi bya N’wana wakwe ekhwirini ra Mariya. (Yohane 1:14; Vafilipiya 2:5-7) Hi ndlela yoleyo, Mariya u tikile hi singita. Leswaku a tiyisa ripfumelo ra yena eka matimba ya Xikwembu, ntsumi yi n’wi byele leswaku xaka ra yena Elizabeta a ha ku tika n’wana wa jaha hambileswi “a dyuhaleke.” Elizabeta ni nuna wakwe Zakariya, a va nga ri na vana hikuva a a ri mhika. (Luka 1:36) N’wana wa vona ku ve Yohane Mukhuvuri loyi Yehovha a a profete hi yena.—Luka 1:10-16; 3:1-6.

 Loko Gabriyele a vula marito lama nga eka Luka 1:37, kumbexana a ehlekete hi Mariya na Elizabeta. Marito wolawo ma tiyisekisa vagandzeri va Yehovha namuntlha leswaku u ta ya emahlweni a hetisisa switshembiso swakwe. Xin’wana xa switshembiso sweswo, i ku siva mifumo ya vanhu hi mfumo wa N’wana wakwe Yesu Kreste, ku nga yena Hosi ya Mfumo wa Xikwembu wa le tilweni.—Daniyele 2:44; 7:13, 14.

 Hlalela vhidiyo leyi yo koma leswaku u vona leswi buku ya Luka yi vulavulaka ha swona.