“Kutani Xikwembu xi ku: “A hi endle munhu hi xifaniso xa hina, a fana na hina. A a fume tihlampfi ta le lwandle, swivumbiwa leswi hahaka swa tilo, swifuwo ni misava hinkwayo ni swiharhi leswi kokovaka emisaveni.”—Genesa 1:26, Bibele—Matsalwa Yo Kwetsima Ya Misava Leyintshwa.

 “Kutani Xikwembu xi ku: “A hi endleni munhu hi xifaniso xa hina, a fana na hina, a ta fuma tinhlampfi ni tinyanyana, a fuma ni swifuwo ni misava, ni swiharhi hinkwaswo emisaveni, ni swikokovi hinkwaswo.”—Genesa 1:26, Bibele ya Mahungu Lamanene.

Leswi Genesa 1:26 Yi Vulaka Swona

 Vanhu va endliwe hi xifaniso xa Xikwembu va ri ni vuswikoti byo kombisa vumunhu lebyi xi nga na byona byo tanihi rirhandzu, ntwelavusiwana ni vululami. Hi yona mhaka vanhu va nga swi kota ku tekelela vumunhu bya Xikwembu.

 “Kutani Xikwembu xi ku: ‘A hi endle munhu hi xifaniso xa hina.’” Yehovha Xikwembu a u rhange a vumba ntsumi ya matimba leyi endzhaku ka nkarhi yi tivekeke tanihi Yesu, a nga si vumba nchumu. Xi tirhise Yesu “ku tumbuluxa swilo leswin’wana hinkwaswo ematilweni ni la misaveni.” (Vakolosa 1:16) Yesu u ni vumunhu lebyi fanaka na Yehovha hikuva “i xifaniso xa Xikwembu lexi nga vonakiki.” (Vakolosa 1:15) Kutani swa twala ku va Xikwembu xi byela Yesu xi ku: “A hi endle munhu hi xifaniso xa hina.”

 “A a fume . . . swifuwo ni misava hinkwayo.” Swiharhi a swi vumbiwanga hi xifaniso xa Xikwembu. A swi vumbiwanga swi ri ni vumunhu lebyi kombisiwaka hi vanhu byo tanihi rirhandzu ni ripfalo. Nilokoswiritano, Xikwembu xa khathala hi swiharhi. Hi yona mhaka xi leriseke leswaku vanhu va ‘fuma’ swiharhi, xileriso lexi xi nga tlhela xi vula ku “lawula” (New International Version) kumbe “ku rhangela” (Common English Bible). Hi ndlela yoleyo Xikwembu a xi kombisa leswaku xi tshemba vanhu hi ku va nyika vutihlamuleri byo khathalela swiharhi. (Pisalema 8:6-8; Swivuriso 12:10) Yehovha u langutele leswaku vanhu va khathalela misava ni swilo hinkwaswo leswi hanyaka eka yona hi ndlela leyinene.

Mongo Wa Genesa 1:26

 Tindzima to sungula ta buku ya Genesa ti hi hlamusela hi vuako hinkwabyo, pulanete ya hina ni hi vutomi emisaveni. Hinkwaswo leswi Yehovha a swi vumbeke swa hlamarisa kambe vanhu hi vona swivumbiwa leswi hlamarisaka ngopfu emisaveni. Loko Xikwembu xi heta ntirho wa xona wo tumbuluxa, xi “languta hinkwaswo leswi xi swi endleke, kutani xi vona leswaku swi saseke ngopfu.”—Genesa 1:31.

 Hlalela vhidiyo leyi yo koma leswaku u dyondza leswi engetelekeke hileswi buku ya Genesa yi swi vulaka hi ku tumbuluxiwa ka swilo.

Matwisiselo Lama Hoxeke Hi Genesa 1:26

 Mavunwa: Genesa 1:26 yi kombisa leswaku Yesu i Xikwembu.

 Ntiyiso: Xikwembu na Yesu va ni vuxaka lebyikulu lebyi tatana ni n’wana va nga na byona kambe a hi munhu un’we. Yesu u dyondzise leswaku Xikwembu i xikulu eka yena. (Yohane 14:28) Leswaku u kuma leswi engetelekeke hlalela vhidiyo leyi nge, Xana Yesu Kreste I Xikwembu? kumbe u hlaya nhlokomhaka leyi nge, “Hikwalaho Ka Yini Yesu A Vitaniwa N’wana Wa Xikwembu?”

 Hlalela vhidiyo leyi yo koma leswaku u vona leswi buku ya Genesa yi vulavulaka ha swona.